ज़ैहसू 14
14
जरदण पछ़मा बाखा कनान देशे बांड
1जरदण नदी पछ़मा बाखा कनान देशे इज़राईली ज़ेतरी ज़ैगा भेटी सह दैनी एलीआजर प्रोहत, नूने शोहरू ज़ैहसू अर इज़राईली सोभी गोत्रे सैणैं इज़राईलीए सोभी टोली लै बांडी। 2ज़िहअ बिधाता मोसा लै हुकम त किअ द, तेऊ ई साबै बांडी जरदण पछ़मा बाखा कनान देशे ज़ैगा बाकी बच़ै दै साढै नौ गोत्रा लै परच़ी पाई।#गण. 34:13 3-4ढाई गोत्रा लै थिई मोसा जरदण नदी पुर्ब बाखे ज़ैगा बांड दैई हेरी दी। युसुफे खिंबे तै आजू दूई गोत्र मनिश्शे अर एप्रैम। इज़राईली बारा गोत्रा मांझ़ै निं मोसा लेबी गोत्र ऐहा बांडी दी बी हेस्सैदार डाहअ। तिन्नें हेस्सै दैनी नगरी बस्सणा लै, डागै-चैणैं अर च़राऊंणा लै घैहणीं। 5इज़राईली बांडी कनान देशे ज़ैगा ठीक तेही ई ज़िहअ बिधाता मोसा का खोज़ी त डाहअ द।
हेब्रोन दैनअ कालेबे हेस्सै
6एकी धैल़ै आऐ यहूदा गोत्रा मांझ़ा का धख मणछ गिलगाल ज़ैहसू सेटा। तिन्नां मांझ़ै एक मणछ तेऊ नाअं त कालेब अर सह थिअ कनजी यपुन्नेंओ शोहरू अर तेऊ बोलअ ज़ैहसू लै इहअ, “ताह हणीं इना गल्ले आद रही दी कि कादेश-बर्ना ज़ैगा बिधाता आपणैं दास मोसा का मेरै अर तेरै बारै किज़ै खोज़अ त।#गण. 14:24 7मेरी अमर ती तधू च़ाल़्ही साले ज़धू हुंह बिधाते दास मोसा एऊ देशे भेख लंदअ कादेश-बर्ना का इधा लै छ़ाडअ त अर मंऐं पजैल़अ त बापस पुजी दिल धोई एऊ देशो पूरअ हाल कि किहअ आसा। 8पर ज़ुंण मेरै होर इज़राईली साथी मुंह संघै थिऐ, तिन्नैं हेरै तै आपणीं गल्ला खोज़ी सोभ डरैऊई। पर हुंह रहअ आपणैं बिधाता लै हरेकी साबै शुचअ-पाक्कअ।
9“मेरै एऊ कामां पिछ़ू दैनी ती मोसा सोह खाई एही ज़बान, ‘बिधाता लै शुचअ-पाक्कअ रही तूह ज़हा ज़ैगा हांढी भेख लई आअ, तैहा ज़ैगे मालक हणैं तूह अर आजू तेरी लुआद सदा।’ 10पर ऐबै भाल़ तूह आप्पै, ज़धू बिधाता ईंयां गल्ला आपणैं दासा मोसा का बोली, तधा ओर्ही गई आझ़ तैणीं पंजताल़ी साला हई। अह त सह बगत ज़धू इज़राईली रेगीस्ताना बाती तै लागै दै आजू हांढदै अर ज़िहअ बिधाता बोलअ त, तेऊ डाहअ हुंह आझ़ तैणीं ज़िऊंदअ अर मेरी अमर गई आझ़ पजैस्सी साले हई।
11“ज़िहै ज़ोर-ज़ाहण मुंह पंजताल़ी साला आजी तधू थिऐ ज़धू हुंह मोसा सैणअ बणाईं भेख लंदअ छ़ाडअ थिअ, हुंह आसा आझ़ बी ज़ाथी तिहअ ई ज़ोर ज़ाहणा आल़अ। मुंह दी आसा आझ़ बी तिहअ ई बल कि हुंह सका जुध अर सोभ काम आझ़ बी राम्बल़ै करी। 12ऐबै दै तेऊ धारा बाखे मुल्खा मुल्है ज़ेते बारै बिधाता मुल्है तधू ज़बान आसा दैनी दी ज़धू हुंह एऊ देशो भेद लई बापस पुजअ त। मंऐं खोज़ी ती तम्हां का तधू गल्ला कि तेथ रहा बडै-बडै दैंत्तर मणछ ज़हा लै अनाकी बोला अर तेथ नगरी बी आसा बडी अर फेर फिरदी आसा उछ़टी-उछ़टी दुआली। इहअ बी सका हई कि बिधाता तिन्नां तेऊ देशा का पोर्ही काढणा मेरी मज़त करे ज़ेही तेऊ ज़बान आसा दैनी दी।”
13ज़ैहसू दैनी यपुन्नें शोहरू कालेबा लै बर्गत संघा दैनअ हेब्रोन सारअ मुल्ख तेऊए हेस्सै। 14हेब्रोन आसा आझ़ तैणीं बी कनजी टोली का यपुन्नें शोहरू कालेबे आजू आद-लुआद बस्सै दै। किल्हैकि तेऊ किअ त शुचअ-पाक्कअ रही तिहअ ई ज़िहअ इज़राईले परमेशर बिधाता करना लै बोलअ त। 15एता का आजी थिअ हेब्रोन नगरी नाअं किर्यात-अराबा। ऐहा नगरी थिअ अह अराब नाओं मणछ अनाकी मणछा मांझ़ै सोभी का बडअ दैंत्तर मणछ।
तधा बाद भेटी तेऊ देशा जुधा का शांती। #मूल. 23:2; ज़ैह. 11:23; 15:13
Currently Selected:
ज़ैहसू 14: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
