जेरमयाह 44
44
बिधाता दैनअ मिसर देशै बस्सै दै इज़राईली लै समाद
1बिधाता दैनअ मुंह जेरमयाह का तिन्नां सोभी यहूदी लै समाद ज़ुंण मिसर देशै मिगदोल, तपनेस, नोप अर दखणा बाखा पत्रोस मुल्खै थिऐ बस्सै दै। 2स्वर्गे सारी सैने मालक बिधाता, ज़ुंण इज़राईलो परमेशर आसा, तेऊ बोलअ मुखा इहअ, “जेरमयाह, तंऐं भाल़अ आपणीं आछी राज़धानी एरुशलेम अर यहूदा मुल्खे सोभी नगरीओ बनाश हंदअ। तिंयां नगरी आसा आझ़ तैणीं उज़र अर शुन्नीं पल़ी दी अर तेथ निं कोह मणछ आथी रहअ द। 3किल्हैकि तिन्नां नगरी बस्सै दै मणछै किअ पाप। तिन्नैं आणी मुल्है खास्सी रोश्श। तिंयां लागै होरी देअआ सेटा बल़ीदान करदै, धूप ज़ाल़दै अर तिन्नें च़ाकरी करदै ज़हा सेटा नां तिंयां अर नां तिन्नें दादै-बाबै माथअ टेक्कअ त!
4“हुंह रहअ तिन्नां सेटा कबल्लअ आपणैं दास अर गूरा छ़ाडदअ लागी अर तिन्नां का इहअ समाद दैंदअ लागी, ‘इना च़िल़्हखरै कामां, करदै निं लागा मुंह आसा एता का नफरत।’ 5पर तिन्नैं निं कोही मेरअ शूणअ अर नां मेरी गल्ला दी धैन दैनअ। तिन्नैं निं पापी बाता हांढणअ छ़ाडअ नां तिन्नैं होरी देअआ-देबीए सेटा धूप ज़ाल़ी पूज़ा-गाज़ा करनी छ़ाडी। 6तैही दैनअ मंऐं आपणअ रोश्श यहूदा मुल्खे सोभी नगरी अर राज़धानी एरुशलेम नगरीए सोभी बाता तरैल़ी, तिंयां आसा आझ़ तैणीं बी तेही ई उज़र अर शुन्नीं पल़ी दी।
7“ऐबै बोला हुंह स्वर्गे सारी सैनो मालक बिधाता, इज़राईलो परमेशर, ‘तम्हैं किल्है लाई आप्पू लै अह आफ़त पाई? तम्हैं लाअ यहूदा मुल्खै मर्ध, बेटल़ी, शोहरू, शोहरी अर दुधा झुटदै शोहरू संघी बनाश करी। ज़ाथी निं कोह च़ाल्लअ बच़ी! 8तम्हैं किल्है आसा थारै आपणैं हाथै बणाईं दी मुहुर्ती पूज़दै लागै दै अर एथ मिसर देशै किल्है आसा तम्हैं देअआ लोल़ै लागै दै ज़ेथ तम्हैं परदेसी ज़िहै रहंदै आसा आऐ दै? तम्हैं हणैं इहअ करै बरैबाद। संसारे सोभी देशा काढणअ थारअ नाअं फिटक दैणा लै! सोभी करनअ थारअ सुहांग। 9तम्हैं तेता बिस्सरुई गऐ कि थारै दाद-बाब, यहूदा मुल्खे राज़ै-राणीं, तम्हैं अर थारी बेटल़ी यहूदा मुल्खै नगरी-नगरी अर राज़धानी एरुशलेम ज़ैगै-ज़ैगै बाता किहै पाप किऐ? 10आझ़ बी निं तम्हैं तेते माल़ी च़ेतदै! नां तम्हैं मेरी कदर करदै अर नां मेरै तेऊ बधाने साबै ज़िन्दगी ज़िऊंदै ज़ुंण मंऐं तम्हां अर थारै दादा-बाबा लै आसा खोज़अ द।’
11“तैही बोला हुंह स्वर्गे सारी सैनो मालक बिधाता, इज़राईलो परमेशर, ‘तम्हां लै लाई मंऐं घोर आफ़त दैई पल़णै, मुंह करनअ यहूदा सारै देशै बनाश। 12यहूदा मुल्खै बच़ै दै लोगा मांझ़ै ज़ुंण मणछ इधी मिसर देशै एछी बस्सै, तिंयां मरनै सोभ मिसर देशै जुधे तलबारा अर नकाल़ा करै होछ़ै-बडै सोभ। तिन्नां भाल़ी लागणअ लोगा प्राच, तिन्नों नाअं काढणअ लोगा फिटक दैणा लै अर सोभी करनअ तिन्नों सुहांग। 13मुंह दैणीं मिसर देशै बस्सै दै यहूदी लै जुध, नकाल़ अर नबिज़री बमारी पाई सज़ा ज़िहअ मंऐं एरुशलेम दैनअ त हणैं। 14ज़ुंण यहूदा छ़ाडी मिसर देशा लै रहंदै डेऊऐ, तिन्नां मांझ़ै निं कोह छ़ुटणअ अर नां कुंण ज़िऊंदअ बच़णअ। धख ज़िहै मणछ ज़ुंण ठुर्हनै, तिन्नां का सुआई निं कोह यहूदा मुल्खै बापस एछणैं।’”
15तिधी तै इहै मणछ खल़्हुऐ दै ज़हा का थोघ थिअ कि तिन्नें बेटल़ी डेऊई होरी देअआ पूज़दी, होर बी थिई तिधी खास्सी बेटल़ी खल़्हुई दी, तिन्नां का लाऊआ तै तिधी दखण मिसर देशै पत्रोस मुल्खै बस्सै दै इज़राईली मांझ़ै खास्सै मणछ। तिन्नैं सोभी बोलअ मुल्है इहअ, “जेरमयाह, 16ज़ुंण गल्ला तूह हाम्हां का बिधाते नाओंऐं खोज़दअ आसा लागअ द, तेता निं हाम्हैं मंदै! 17हाम्हां करनअ तिहअ ज़िहअ हाम्हैं आप्पै आसा बोलअ द कि हाम्हां करनअ इहअ। ज़ुंण हाम्हैं स्वर्गे राणीं देबी लै मानत आसा मनी दी, हाम्हां करनअ सह हूम बल़ीदान, दाखे रसो अर्घअ बी दैणअ। हाम्हां करनी सोभ गल्ला तेही ई ज़ेही म्हारै दाद-बाब, म्हारै राज़ै-राणीं अर म्हारै प्रोढै यहूदा मुल्खै नगरी-नगरी अर राज़धानी एरुशलेम ज़ैगै-ज़ैगै बाता करा तै। तेऊ ज़मानै हआ त हाम्हां का खाणां-पिणां लै बतेर्हअ, हाम्हैं तै सेठ अर नां हाम्हां आफ़त पल़दी ती। 18ज़धकअ हाम्हैं स्वर्गे राणीं#ईशा. 7:18; 44:15-19 देबी लै बल़ीदान करनअ, अर्घअ दैणअ अर धूप ज़ाल़णअ छ़ाडअ, तधा ओर्ही आसा हाम्हैं रित्तै अर हाम्हां लै पल़अ नकाल़ अर जुधा दी आसा तलबारा करै मरदै लागै दै!”
19तेखअ लागी आजू तिंयां बेटल़ी बोल्दी, “हाम्हैं ज़ाल़अ स्वर्गे राणीं देबी लै धूप, रोट बी छ़ाडै अर अर्घअ बी दैनअ, अह किअ हाम्हैं आपणैं मर्धा पुछ़ी करै अर तिन्नां का आसा एतो थोघ।”
20तेखअ बोलअ मंऐं तिन्नां मर्ध अर बेटल़ी लै ज़ुंणी मुल्है इहअ ज़बाब दैनअ, 21“ज़ुंण तम्हैं, थारै दाद-बाब, थारै राज़ै-राणीं अर थारै प्रोढै यहूदा मुल्खै नगरी-नगरी अर राज़धानी एरुशलेम ज़ैगै-ज़ैगै बाता बल़ीदान किऐ अर धूप ज़ाल़ा तै, बिधाता का आसा इना सोभी गल्लो थोघ, तम्हैं कै सोठा कि सह बिस्सरुई गअ? 22आझ़ तैणीं बी आसा थारी ज़ैगा उज़र अर शुन्नीं पल़ी दी, तेथ निं कोह आथी रहअ द। तैहा ज़ैगा भाल़ी प्राछिआ, लोग काढा थारअ नाअं फिटक दैणा लै। किल्हैकि बिधाते निस्सै तै थारै कदुष्ट अर पापी काम ज़िर्हुई। 23आझ़ आसा अह आफ़त बी तम्हां लै तैही पल़ी दी, किल्हैकि तम्हैं किअ होरी देअआ लै बल़ीदान अर तम्हैं किअ अह पाप कि तम्हैं निं बिधातो बधान मनअ अर नां ज़िहअ तेऊ बोलअ तिहअ किअ।”
24मंऐं बोलअ तिधी तिन्नां सोभी मर्ध अर बेटल़ी लै, “ज़ेतरै लोग बी तम्हैं यहूदा का मिसर देशै आसा बस्सै दै, तम्हैं शूणां बिधातो समाद। 25स्वर्गे सारी सैनो मालक बिधाता इज़राईलो परमेशर बोला इहअ, ‘तम्हैं अर थारी बेटल़ी बोला इहअ, “हाम्हां करनअ तिहअ ज़िहअ हाम्हैं आप्पै आसा बोलअ द कि हाम्हां करनअ इहअ। ज़ुंण हाम्हैं स्वर्गे राणीं देबी लै मानत आसा मनी दी, हाम्हां करनअ सह हूम बल़ीदान, दाखे रसो अर्घअ बी दैणअ।” ठीक आसा बै, तम्हैं लागा तिहअ ई करदै ज़ेही तम्हैं मानत आसा डाही दी!
26“‘ऐबै शूणां तम्हैं मिसर देशै बस्सै दै यहूदी मेरी बी कि हुंह बिधाता किज़ै बोला। मंऐं बी काढै ऐबै आपणैं सोह कि तम्हां निं कोही बी ऐबै मेरै महान नाओंऐं कधि इहै सोह खाणैं भेटणैं, “हाम्हैं काढा आपणैं मालक बिधाते सोह।” 27मुंह रहणअ भाल़ै लागी कि तम्हैं निं सफल हुऐ ई लोल़ी, थारी लोल़ी हान्नी ई हुई। तम्हैं रहणैं मिसर देशै जुधे तलबारा अर नबिज़री बमारी करै मरदै लागी ज़ेभै तैणीं तम्हैं सोभ खतम निं होए। 28पर तम्हां मांझ़ै छ़ुटणैं सिधै धख ज़िहै मिसर देशा का यहूदा लै बापस। तिन्नां का लागणअ थोघ कसरी गल्ला हुई पूरी, थारी कि मेरी?
29“‘मुंह बिधाता दैणअ तम्हां लै ऐहा गल्लो पैहलै ई नशाणी कि मुंह दैणीं तम्हां लै ऐहा ई ज़ैगा सज़ा। ताकि तम्हां का थोघ लागे कि ज़ुंण मंऐं बोलअ तिंयां गल्ला निभणी तेही ई। 30#2 राज़. 25:1-7मुंह दैणअ मिसर देशो माहा राज़अ होप्रा तेऊए दुशमणे हाथै ज़ुण तेऊ मारनअ च़ाहा। ज़िहअ मंऐं यहूदा मुल्खो राज़अ सिदकिया तेऊए दुशमण बाबेल देशे राज़ै नबूकदनेसरे हाथै दैनअ त ज़ुंण तेऊ मारनअ च़ाहा त।’”
Currently Selected:
जेरमयाह 44: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
