जेरमयाह 43
43
जेरमयाह निंयं मिसर देशा लै
1मंऐं मुक्की तिंयां सोभ गल्ला लोगा का खोज़ी ज़ेता खोज़दअ हुंह तिन्नें परमेशर बिधाता तिन्नां सेटा लै छ़ाडअ त। 2तेखअ बोलअ होशाये शोहरू अजर्याह, कोराहे शोहरू जोहनानै अर होरी सोभी घमंडी मणछे मुल्है इहअ, “जेरमयाह, तूह आसा झ़ुठअ! तूह निं म्हारै परमेशर बिधाता हाम्हां सेटा लै आथी छ़ाडअ द। तेऊ निं ताखा इहअ आथी बोलअ द, ‘तम्हैं निं मिसर देशा लै डेऊंदै लागी, तिधी निं तम्हैं बस्सी।’ 3तूह आसा नेरीए शोहरू बारूकै हाम्हां लै शगरेऊई डाहअ द, सह च़ाहा इहअ कि हाम्हैं बाबेल देशे बशै पल़े, तिंयां हाम्हां मारी पाऐ, कि हाम्हां कैद करी बाबेल देशा लै निंए।”
4नां कोराहे शोहरू जोहनानै, नां सैने दलपति अर प्रधाना मांझ़ै कुंणी बिधाते गल्ला मनी अर नां होरी लोगै। तिंयां निं यहूदा मुल्खै रहै। 5#2 राज़. 25:26तेखअ किअ कोराहे शोहरू जोहनान अर सैने दलपति अर प्रधानै इहअ कि ज़ुंण ओर्ही-पोर्ही छिंघुऐ दै मणछ यहूदा मुल्खा लै फिरी तै आऐ दै, तिंयां निंयैं तिन्नैं आप्पू संघै। 6मर्ध, बेटल़ी, शोहरू-माठै, राज़ेए देई अर ज़ुंण मुंह बिधाते गूर जेरमयाह अर नेरीए शोहरू बारूका संघी ज़ेतरै मणछ नबूज़रदानै आहीकामे शोहरू शापाने पोचै गदाली का सभाल़ै तै, हाम्हैं निंयैं तिन्नैं सोभ आप्पू संघै। 7इहअ करै निं तिन्नैं बिधाते गल्ला मनी संघा डेऊऐ सोभी संघा निंईं मिसर देशा लै तपनेस नगरी तैणीं।
8तपनेस बोलअ बिधाता मुल्है इहअ, “जेरमयाह, 9सोभी यहूदी नदरी च़क धरना का बडै-बडै पात्थर, संघा डेऊ तपनेस नगरी मिसर देशे माहा राज़ेए मैहलै आजू, संघा डाह तिधी इना पात्थरा च़कूणै पात्थरा करै च़िणी दी च़ौकी हेठै माट्टै जैंदरी दाबी। 10तेखअ बोल तिन्नां यहूदी मणछा लै, ‘स्वर्गे सारी सैनो मालक बिधाता इज़राईलो परमेशर बोला इहअ कि मुंह छ़ाडणअ आपणअ दास नबूकदनेसर बाबेल देशा का, तेऊ बणाणीं आपणीं राज़गाद्दी इना पात्थरा प्रैंदै ज़ुंण इधी दाबी डाहै अर आपणअ छ़तर फुआरनअ तेऊ इधी एथ प्रैंदै। 11नबूकदनेसरा छ़ेल़णअ मिसर देशा संघै जुध। तेऊ आणनीं तिन्नां मणछा लै मौत ज़ुंण मंऐं मरना लै आसा टांकै दै। तेऊ निंणै तिंयां मणछ कैद करी ज़ुंण मंऐं गलामी लै आसा टांकै दै। तिंयां मणछ पाणै तेऊ तलबारा करै काटी ज़ुंण मंऐं मारना लै आसा टांकै दै।#प्रका. 13:10 12मिसर देशे देअए देहुरै चैल़णीं तेऊ आग, कोई पाणै तेऊ ढोल़ी, कोई देअए मुहुर्ती निंणै तेऊ आप्पू संघै बाबेल देशा लै। ज़िहअ फुआल आपणैं-आपणैं झिकल़ै च़फल़ी अर बान्हीं करै च़का, तिहअ ई चफल़णअ बाबेल देशे राज़ै नबूकदनेसरा सारअ मिसर देश संघा डेऊणअ ज़िती करै बाबेल देशा लै फिरी। 13तेऊ पाणै मिसर देशे सुरज़ा पूज़णे पात्थरे ओडै फाल़ी अर तिन्नें देअआ-देबीए देहुरै चैल़णीं तेऊ आग।’”
Currently Selected:
जेरमयाह 43: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
