जेरमयाह 13
13
बाछे गाची
1बिधाता बोलअ मुल्है इहअ, “डेऊ संघा आण आप्पू लै एक बाछे गाची मोलै लई। तूह डाहै तैहा आपणीं कुछी बान्हीं पर तैहा निं भिज़णै दैई।” 2मंऐं आणी एक गाची मोलै लई संघा डाही कुछी बान्हीं।
3तेखअ बोलअ बिधाता मुल्है भिई, 4“फरात दरैऊआ लै डेऊ, संघा डाह ऐहा गाची टोल्हा हेठै जोहल़ै च़ोरी।” 5हुंह डेऊअ फरात दरैऊआ लै संघा डाही मंऐं सह गाची फरात दरैऊए बाढै टोल्हा हेठै जोहल़ा दी च़ोरी।
6थोल़ै धैल़ै बाद बोलअ बिधाता मुल्है भिई इहअ, “फरात दरैऊए बाढै मंऐं ज़हा गाची च़ोरी डाहणां लै बोलअ थिअ, तेता आण तिधा का ओर्ही काढी।” 7हुंह डेऊअ फरात दरैऊए बाढै तैहा ज़ैगा फिरी ज़िधी मंऐं टोल्हा हेठै सह गाची च़ोरी ती डाही दी, मंऐं भाल़अ तिधी पुजी कि सह गाची आसा पठी चिजी-शल़ी गई दी अर सह निं किछ़ू कामें रही।
8तेखअ बोलअ बिधाता भिई मुल्है इहअ, 9“यहूदा मुल्खो अर एरुशलेम नगरीओ घमंड करनअ मुंह इहअ ई खतम। 10इनै यहूदा मुल्खे कदुष्ट मणछे किऐ मेरै बैण शूणैं नां शूणैं। ईंयां आसा सदा कदुष्ट अर हठू, ईंयां रहै होरी देअआ पूज़दै अर तिन्नें च़ाकरी करदै लागी। तिंयां हणैं ऐबै ऐहा गाची ज़िहै ज़ुंण किछ़ू कामें निं रही। 11ज़ेही मणछ कुछी पिड्डी गाची डाहा बान्हीं, तिहै डाहै तै मंऐं इज़राईल अर यहूदा पिड्डै बान्हीं। इहअ किअ त मंऐं एते तैणीं कि तिंयां मेरअ नाअं बढेरे अर मेरअ अदर करे, पर तिन्नैं निं ज़िहअ मंऐं बोलअ तिहअ शूणअ।”
12बिधाता बोलअ मुल्है इहअ, “जेरमयाह, सोभी इज़राईली का खोज़ कि दाखे रसा डाहणें सोभ भांडै डाहै दाखे रसा करै भरी। तिन्नां दैणअ ताल्है इहअ ज़बाब, ‘हाम्हां का कै थोघ निं आथी कि दाखे रसे सोभ भांडै लागा भरी डाहणैं?’
13“तेखअ बोलै तूह तिन्नां लै इहअ मुंह बिधाता दैणैं एऊ देशै बस्सै दै सोभ लोग दाखे रसा करै भरी। खासकर ज़ुंण राज़ै दाबेदे राज़गाद्दी दी आसा बेठै दै, तिन्नां लै दैणअ मुंह रज्ज़ी झुटणा लै। गूर, प्रोहत अर एरुशलेम नगरी बस्सै दै सोभ लोग बी दैणैं मुंह रज़ैऊई। 14तेखअ जल़ाकणैं मुंह तिंयां तिन्नां भांडै ज़िहै एकी-दुजै संघै, होछ़ै बडै संघी। तेखअ निं मुंह तिन्नां लै किछ़ झींण नां झ़ूरी रहैऊंणीं कि हुंह तिन्नां मारनै का छ़ाडे।”
घमंडा लै परमेशरे चतैनगी
15इज़राईलीओ, मेरी गल्ला दी दैआ धैन, घमंड निं करा, इहअ बोला बिधाता। 16आपणैं परमेशर बिधातो स्तोती करा, एता का आजी कि सह एऊ देशा न्हैरै करे, तेऊओ करा अदर। एता लआ उझै धारा न्हैरै दी ठोहल़ लागी करै बधल़णैं का आजी करी। तम्हैं आसा एही आशा रहै दै कि प्रैश्शअ जाणअ हई। पर तेऊ करनअ एथ नटिप्प न्हैरअ, तेऊ प्रैश्शै दी पाणीं तेऊ घणीं काल़ी छ़ैल्ली। 17ज़ै तम्हैं नांईं शुणें, थारै एऊ घमंडा पिछ़ू रहणअ मुंह च़ुप्प-च़ुप्पै लेरा लांदै लागी। मुंह लाणीं हिंह करै लेरा। मेरी आछी का लागणै आशूए छ़ो छ़ंद किल्हैकि बिधाते परज़े हेल़्ह निंणीं गलामी लै।
18बिधाता बोलअ मुखा इहअ, “राज़ै अर तेऊए ईजा लै बोल कि आपणीं राज़गाद्दी प्रैंदा का बेशा धरनीं, किल्हैकि तिन्नें मुंडै शोभा दैणैं आल़ै मुगट पल़ै तिन्नें मुंडा का धरनीं। 19यहूदा दखण रेगीस्ताने नगरी किई कैद, तेता का निं कोह छ़ुटी सकदअ। यहूदा मुल्खे सोभ लोग निंयैं गलामी लै ढाकी।
20“एरुशलेम! फेर दै भाल़णीं! तेरै दुशमण होथै उतर दिशा बाखा उंधै! सह हेल़्ह किधी आसा ज़ुंण ताखा धाचणा लै थिई सभाल़ी दी। तिंयां भेडा किधी आसा ज़ेता लै ताह खास्सअ घमंड आसा त? 21तंऐं किई आपणैं खास साथी बणाणां लै खास्सी मैन्थ। पर बिधाता दैणअ तिन्नां ताह प्रैंदै राज़ करनै। तेखअ किज़ै बोल़णअ ताह? दाह-दुखा ढाकणीं तूह पिड्डी। ताह लागणै सूंणें दाह लागी दी बेटल़ी ज़िहै शूल़। 22ज़ै तूह इहअ सोठे कि ताल्है ईंयां एही किल्है हुई-बिति? तेरै झिकल़ै किल्है धेल़ै अर ज़ोरा-ज़ोरी किल्है लुटी तेरी इज़त? सह हुअ इहअ करै कि तंऐं किअ खास्सअ पाप। 23कूश देशे काल़ै मणछ निं आपणीं काल़ी खाल बदल़ी शेती लाई सकदै! नां च़राघ आपणीं घेरी काल़ै चटाक धोई सकदअ। तिहअ आसा ताह संघै, तंऐं किअ सदा बूरअ ई अर तैही निं तूह बी भलअ करी ई सकदी। 24तेरै लोग छिंगणैं इहै ज़िहै रेगीस्ताना बाखा एछदी बागरी भुखलै छिंगा। 25तेरै हेस्सै एछणअ इहअ ई, मंऐं आसा ताल्है इहअ ई लाअ द करी। किल्हैकि तंऐं बिस्सरअ हुंह पठी अर तूह रही होरी देअआ-देबीए आसरै अह गल्ल डाही मंऐं बिधाता बोली।#जेर. 2:13 26तेरै घाघरेओ पाल्लअ च़कणअ मुंह उझै तेरै नाका तैणीं। तेखअ भाल़णीं तूह सोभी उंधै का नांगी। 27तिन्नां भाल़णअ कि तूह निं मुल्है शुची-पाक्की रही। तंऐं किई होरी देअआ संघै कंज़रैई। तंऐं किअ कंज़री बेटल़ी ज़िहअ काम ज़हा शाख-शरम ई निं हंदी। मंऐं भाल़अ आपणीं आछी कि तंऐं नाल़ै धारा किज़ै-किज़ै किअ। हुंह करा एता का नफरत। एरुशलेम ताल्है भाल़ केही आफ़त पल़णीं! तूह केभै तैणीं रहणीं छ़ोतली?”
Currently Selected:
जेरमयाह 13: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
