जेरमयाह 12
12
जेरमयाह लागअ बिधाता का पुछ़दअ
तेखअ पुछ़अ मंऐं बिधाता का इहअ,
1“बिधाता, ज़ेभै बी हुंह पांच़ी ताह सेटा आणा,
तूह करा सदा शुचअ नसाफ।
तज़ी बी लाई मंऐं ऐहा गल्ले बारै ताखा इहै सुआल करी कि
तै ईंयां कदुष्ट मणछ किल्है हआ सफल?
तै किल्है हआ ईंयां विश्वास घाती मणछ राज्ज़ी-मौज़ी?
2तंऐं आसा तिंयां कदुष्ट मणछ रोहै दै अर तिन्नें ज़लैल़ै बी राझ़ा,
तिंयां बझ़ा अर तेथ फल़ बी लागा।
आपणीं गल्ला करै तिंयां तेरअ अदर बी करा,
पर तज़ी बी आसा तिंयां दिला का ताखा दूर!
3पर बिधाता, ताखा आसा मेरअ थोघ,
ताखा शुझिआ कि हुंह किज़ै करा अर ताल्है किहअ झ़ूरा।
इना कदुष्ट मणछा निंऊं घिशी दूर ज़ेही हेल़्ही मांझ़ा का भेडा काटणा लै निंयां पोर्ही घिशी।
तिन्नां डाह काटणें धैल़ी तैणीं दूर ज़ुदै।#भज. 17:3
4अह ज़ैगा केभै तैणीं रहणीं रुखी अर
केभै तैणीं रहअणअ सोभी खेचो घाह मछैंईं?
इना लोगे कदुष्ट कामां पिछ़ू च़ाल्लै च़ेल्लू-पखीरू
अर पशू पठ मरी खतम हई!
ईंयां लोग बोला इहअ, ‘परमेशर निं भाल़दअ कि हाम्हैं किज़ै करा।’”
परमेशरै दैनअ ज़बाब,
5बिधाता दैनअ इहअ ज़बाब,
“जेरमयाह, ज़ै तूह इना लोगा संघै ठुर्हदी थकी गअ,
तै ताह घोल़ै संघै किहअ करै ठुहर्नअ?
ज़हा देशा दी ताह भरोस्सअ आसा, ज़ै तूह तेथ ई आसा डरदअ लागअ द,
तै ताह जरदण नदी ओरी-पोरी बणैं किहअ करै रहणअ?
6होर ता होर, ताल्है किअ तेरै आपणैं नातै-रिश्तैदार अर
तेरै आपणैं टबरै बी विश्वास घात,
तिंयां आसा तेरै पिछ़ै पल़ै दै कि ताल्है चुटी पल़े।
तिन्नों विश्वास निं करी, च़ाऐ तिंयां ज़ेही बी मिठी-मिठी गल्ला किल्है निं करे।”
बिधाता च़ेती आपणीं परज़ा पिछ़ू माल़ी
7बिधाता बोलअ इहअ,
“मंऐं हेरअ इज़राईल छ़ाडी,
मंऐं किई आपणीं छ़ांटी दी परज़ा दूर।
ज़हा लोगा लै हुंह झ़ूरा, तिन्नां दैनअ मंऐं तिन्नें दुशमणे बशै पल़णै।
8मेरी छ़ांटी दी परज़ा लागी मुल्है ई बणें सिहा ज़ेही क्रुंगदी!
तैही हुई मुंह तिन्नां लै नफरत।
9मेरी परज़ा आसा इहै च़ेल्लू ज़ेही
ज़हा लै काअ-गरली फेर-फिरदी पल़ी चुटी!
बणें ज़ीब एछा सोभ! सोभ झाल़्हिआ, संघा खाआ तिन्नें ल्हासा पठी।
10परदेसा का आऐ कई राज़ै, तिन्नैं किअ मेरअ दाखो बाग बरैबाद,
तिन्नैं मांडअ मेरअ खेच ज़िहअ नां किहअ,
मेरी बधिया ज़ैगा बणाईं तिन्नैं रेगीस्ताना ज़ेही।
11सह ज़ैगा पाई तिन्नैं उज़र, सह ज़ैगा हुई शुक्की-रुखी।
सारै देशे ज़ैगा पाई तिन्नैं उज़र, तेथ बाखा निं कोह धैन बी दैंदअ।
12एता बरैबाद करदै एछणैं होर बी खास्सै।
तिन्नां उखल़णअ रेगीस्ताने उझै निखल़ी धारा।
मुंह डाहणैं तिंयां आपणीं तलबारा ज़िहै मेरी परज़ा बरैबाद करदै लाई,
तिन्नां पाणै तिंयां सारै देशै हर ज़ैगा मारी,
कोही निं राज्ज़ी-राम्बल़ै ज़िऊंणअ भेटणअ।
13मेरी परज़ा बऊंणीं कणक, तिन्नां लागणै तेता का कांडै-रिंडै झाल़णैं,
तिन्नां करनी खास्सी मैन्थ पर तेता का निं तिन्नां किछ़ भेटणअ।
मुंह आसा तिन्नां लै खास्सी रोश्शै आई दी अर
तिन्नां पल़णअ साल-फसला झाल़दी बारी शर्मिंदै हणअ।”
बिधाता दैणीं इज़राईले दुशमणा लै सज़ा
14बिधाता बोला इहअ, “इज़राईले संघी देशा लै लाअ मंऐं किज़ै बोली ज़ुंणीं सह ज़ैगा बरैबाद किई ज़ुंण मंऐं आपणीं परज़ा लै आसा दैनी दी। तिंयां कदुष्ट मणछ शोटणै मुंह तिन्नें देशा का पेच़ी करै दूर, तिन्नां जैंदरा का आणनीं मुंह यहूदा मुल्खे आपणीं परज़ा बच़ाऊई। 15तिन्नां पेच़णैं का बाद करनीं मुंह तिन्नां लै भिई झींण, मुंह आणनैं सोभ देश तिन्नें आपणीं ज़ैगा लै बापस कि तिंयां तेते मालक होए।#बधा. 30:3 16ज़ै तिंयां देश बी मेरी परज़ा का शिखल़े अर मेरै नाओंऐं मानत मने, अर ज़बान दैंदी इहै सोह खाए, ‘ज़िहअ बिधाता ज़िऊंदअ आसा।’ अह गल्ल लोल़ी तिन्नैं तेही ई किई ज़िहै तिन्नैं मेरी परज़ा का बाल देअए सोह खाणैं शखैल़ै तै। तै दैणअ मुंह तिन्नां बी आपणीं परज़ा मांझ़ै बस्सणै। 17ज़ै इना मांझ़ै एक बी देश नांईं मने, तै पाणै मुंह तिंयां गोधी का पेच़ी अर पठी बरैबाद करी। अह गल्ल डाही मंऐं बिधाता बोली।”
Currently Selected:
जेरमयाह 12: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
