ईशायाह 33
33
बिधाता सेटा खरीए पलका अरज़
1म्हारै अश्शूरी दुशमणा लै भाल़ केही आफ़त पल़णीं! तिन्नैं लुटै होर पठी, तिन्नैं किअ विश्वास घात, पर तिंयां निं अज़ी कोही लुटै अर नां तिन्नां लै कुंणी विश्वास घात किअ! पर तिन्नें लुटणैं अर विश्वास घात करने धैल़ै जाणै मुक्की अर तेखअ हणअ तिन्नां संघै विश्वास घात, संघा हणैं तिंयां आप्पू ई पठी बरैबाद।
2बिधाता, हाम्हां लै कर झींण। हाम्हैं आसा तेरै आसरै। हाम्हां लै कर धैल़ ज़ोर-ज़ाहण दैई अर ज़ेभै हाम्हां लै आफ़त पल़े, तेभै बच़ाऊऐ हाम्हां तूह ई। 3तेरी एकी झांशा करै ठुर्हा देशा-देशे दुशमण सातै-बातै, ज़ांऊं तूह हाम्हां बाखा खल़्हिया, दुशमण छिंघिआ तेरी डरै ओर्ही-पोर्ही। 4अश्शूरीओ, ज़िहअ रैट्टैओ छ़ुंढ एछी खेचे साल-फसल खाई खतम करा, तिहै पल़णै लोग थारी धन-माया लै चुटी ज़ुंण तम्हैं होरी का जुधा दी आसा लुटअ द।
5बिधाता भाल़ किहअ महान आसा! सह रहा स्वर्गै। तेऊ दैणअ एरुशलेम नगरी लै सत्त अर नसाफ। 6बिधाता हणअ तिन्नें सारी ज़िन्दगी लै पाक्की आथरी ज़िहअ। तेऊ डाहणीं आपणीं परज़ा सदा बच़ाऊई अर तेऊ दैणीं तिन्नां लै अक्ल अर ज्ञैन। बिधाते डअर हणीं तिन्नां लै खज़ानै ज़ेही।
7भाल़ा, यहूदा मुल्खे शूरबीर आसा बागै हाक्का लांदै लागै दै। ज़ुंण दूत मेल़-ज़ोल़ करदै छ़ाडै तै, तिंयां आसा ज़ोरै-ज़ोरै लेरा लांदै लागे दै। 8राज़ेए खुल्ही सल़का आसा शुन्नीं पल़ी दी, तेस्सी बाती निं कोहै मणछ एछदअ-नाहंदअ। अश्शूरी संघै म्हारी ज़ुंण मेल़ ज़ोल़े करार थिई, सह किई तिन्नैं खतम! ज़ुंण तिन्नैं शाजता सम्हनै ज़बान दैनी ती तिंयां हुधूऐ तेता लै पठी! तिन्नैं निं कोहिए इज़त डाही। 9यहूदा मुल्खे ज़िम्मीं ज़ैगा आसा शुक्की-रुखी अर बंज़र हुई दी। लाबानोन धारे बण-बूट शुक्कै पठी शारोन खागे रज़दी-पज़दी ज़ैगा-ज़िम्मीं हुई रेगीस्ताना ज़ेही बंज़र। बाशान अर कर्मेल बणें डाल़ा-बूटा का आसा पाच धरनीं अल़दै लागै दै।
बिधाते दुशमणा लै चतैनगी
10पर बिधाता बोला इहअ, “ऐबै करनअ मुंह काम, ऐबै रहैऊंणीं मुंह आपणीं शगती। 11अश्शूरीओ, थारै काम अर सोठी दी गल्ला हणीं शुक्कै घाहे ज़ोल़्ठै ज़ेही बृथा। मेरअ शाह आसा आगी ज़िहअ, तेता करै हणैं तम्हैं दझ़ी खतम। 12थारअ#33:12 थारअ यहूदा हंतणैं आल़ै हणअ दझ़ी करै छ़ार, तम्हैं हणैं काटै दै कांडै-रिंडै ज़िहै ज़ेथ आग चैल़ा। 13तम्हैं नेल़ा-दूरे सोभ देश शूणां कि मंऐं किज़ै किअ, संघा समझ़ा कि मुखा किहअ बल आसा।”
14सियोन नगरीए पापी मणछा छ़ुटअ डरै दर्छ़णअ। तिन्नां आसा डरै काम्मणीं लागी दी। तिंयां बोला इहअ, “बिधातो नसाफ आसा आगी ज़िहअ, सह करा दहई करै सदा लै खतम। एही आगी का हाम्हां मांझ़ै कुंण च़ाल्लअ ज़िऊंदअ बच़ी? ज़ाथी निं कोह बच़णअ!”#इब्रा. 12:29 15पर सह जाणअ बच़ी ज़ुंण धर्मीं होए अर शुची गल्ला बोला, ज़ुंण रैनै-गरीबा लुटदअ निं आथी अर ज़ुंण रेशपत निं खांदअ, ज़ुंण हत्या करनै आल़ै अर ज़ुल्म करनै आल़ै का दूर रहा। 16तिंयां रहणैं राज्ज़ी-राम्बल़ै, तिंयां हणैं उछ़टी धारा गहल़ै बस्सै दै मणछा ज़िहै। तिन्नां निं रोटी-पाणींए किछ़ै निऊल़ हणीं।
आजू हणअ सुख
17यहूदा मुल्खे लोगो, तम्हां भाल़णअ आपणीं आछी एक राज़अ अर तेऊए शान-शोभा। तम्हां भाल़णअ तेऊओ राज़ फेरा-फेर दूर-दूर देशा तैणीं।#मोत्त. 17:2; जोह. 1:14 18तेभै बोल़णअ तम्हां इहअ, “तिंयां अश्शूरी कार-करिंदै केस्सी पेठै ज़ुंण हाम्हां डरैऊआ-धमकाऊआ तै? ज़ुंण हाम्हां का ज़बरी खास्सअ कारअ गराहा तै?”#1 करि. 1:20 19तेखअ निं तम्हां का आपणैं देशै तिंयां शरेरै परदेसी शुझणैं ज़ुंण एही बोली-भाषा दी गल्ला करा तै ज़ुंण तम्हां समझ़ ई निं एछदी। 20सियोन बाखा भाल़ा! ज़हा नगरी हाम्हैं सालकै तिह-थैर मनाऊंआं। एरुशलेम नगरी बाखा भाल़ा! ऐहा नगरी बस्सी रहणैं राज्ज़ी-राम्बल़ै बच़ी! अह हणअ इहै डेरै ज़िहअ ज़ुंण सदा रहणअ, नां एते खुंढै पेच़णैं अर नां एते राश्शी चुटणीं। 21बिधाता रहैऊंणअ हाम्हां का आपणअ महान प्रतप्प। हाम्हैं बस्सणै बिरली नदी अर गाडे बाढै ज़ेथ दुशमणे ज़हाज़ एछी निं सकदै। 22-23किल्हैकि म्हारअ नसाफ करनै आल़अ आसा बिधाता, हाम्हां प्रैंदै राज़ करनै आल़अ राज़अ आसा सह ई अर तेऊ डाहणैं हाम्हैं बच़ाऊई। तिन्नां सोभी ज़हाज़े राश्शी हुई ढिल्ली, ज़हाज़ निस्सअ आजू हांढी, हाम्हां छ़ड़ैऊंणी दुशमणा का तिन्नें धन-माया पठी संघा बांडणी आप्पू मांझ़ै। सह हणीं एतरी खास्सी कि लाट्टै मणछा बी भेटणअ तेता मांझ़ै हेस्सअ। 24बिधाता करनै म्हारै पाप माफ अर तेखअ निं म्हारै देशै#33:24 देशै लोग ज़ुंण सियोन नगरी आसा बस्सै दै कोही एही खरी खोज़णीं कि तेऊ लागी दाह।
Currently Selected:
ईशायाह 33: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
