मूल़ 28
28
याकब छ़ाडअ माऊल़े घअरा लै
1तेखअ शादअ इसहाकै बी याकब संघा बोलअ बर्गत दैई तेऊ लै इहअ, “इना कनान देशे शोहरी संघै निं बैह करी हेरे।
2“पद्दनरामा लै डेऊ आपणैं नान्नूं बतूएले घअरा लै अर आपणैं माम लाबाने शोहरी मांझ़ै करै एकी संघै बैह।
3“सह बिधाता ज़हा का सारअ बल आसा तेऊ का आसा मेरी एही अरज़ कि तेऊ लोल़ी ताल्है एही बर्गत दैनी कि तेरी लोल़ी खास्सी आद-लुआद हुई अर तूह लोल़ी देशा-देशो मूल़ हुअ।
4“बिधाता लोल़ी ताल्है बी तेरै दादू आबरामा ज़ेही बर्गत दैनी कि ज़ेऊ देशै तूह परदेसी ज़िहअ आसा रहंदअ लागअ द, तूह लोल़ी एऊ देशा गिम्मी मालक हुअ।”#मूल. 17:4-8
5इना गल्ला बोली छ़ाडअ इसहाकै याकब पद्दनराम तेऊए मामा अरामी बतूएले शोहरू लाबाने घअरा लै ज़ुंण रिबको भाई थिअ।
एसाबै किअ इशमाईले शोहरी संघै बैह
6ज़ांऊं एसाबा का इहअ थोघ लागअ कि इसहाकै किअ याकबा लै कनान देशे शोहरी संघै बैह करना लै नांईं अर सह छ़ाडअ बर्गत दैई पद्दनराम माऊल़े घअरा लै कि मामे शोहरी संघै बैह करे।
7आपणैं ईजा-बाबे गल्ला मनी डेऊअ याकब पद्दनराम आपणैं माऊल़े घअरा लै। 8एसाबै सोठअ इहअ, “मेरअ बाब इसहाक निं कनान देशे शोहरी च़ाहंदअ।” 9एसाब डेऊअ आपणैं आबरामे शोहरू इशमाईले घअरा लै संघा किअ तेऊए शोहरी नबयोते बैहणी महलता संघै एक होर बैह।
याकबा हुअ सुपनअ
10याकब डेऊअ बेर्शेबा नगरी का हारान देशा बाखा।
11बाता हांढदी पल़ी तेऊ एकी ज़ैगा सान्ह संघा किअ तेऊ तिधी रहणैंओ बच़ार, एकी बडै पात्थरा दी नील़ लाई सुत्तअ सह तिधी।
12तेखअ हुअ तेऊ तिधी इहअ सुपनअ कि एक शिहल़ आसा धरती दी खल़ी अर तेते च़ुंडी आसा सरगै तैणीं पुजी दी, बिधाते स्वर्ग दूत आसा तेथ उंधै होथदै अर उझै उखल़दै लागै दै।#जोह. 1:51
13शिहल़ीए च़ुंडी आसा बिधाता एकी बाखा खल़्हुअ द संघा आसा इहअ बोल्दअ लागअ द, “हुंह आसा सह परमेशर बिधाता ज़सरी च़ाकरी तेरअ दादू आबराम अर तेरअ बाब इसहाक करा तै, ज़हा ज़ैगा तूह सुत्तअ द आसा, सह ज़ैगा दैणीं मुंह ताल्है अर आजू तेरै खिंबा लै।#मूल. 13:14,15
14“तेरी आद-लुआद हणीं धरतीए धूल़ै कणीं ज़ेही खास्सी अर तिंयां छिंघणैं च़ऊ दिशा दी अर तिन्नां करै भेटणीं संसारे सोभी ज़ातीए लोगा बर्गत।#मूल. 12:3; 22:18 15ज़िधा लै बी तूह डेओए, तिधी करनी तेरी फाज़त मुंह आप्पै, बादा का आणनअ मुंह तूह भिई ऐहा ज़ैगा लै बापस फरेऊई। ज़ुंण मंऐं बोलअ, ज़ेभै तैणीं सह पूरअ निं होए तेभै तैणीं रहणअ हुंह ताह संघा-संघा।”#ईशा. 41:10
16संघा डेऊई तेभी याकबे नींज, सह उझ़ुअ खल़अ संघा लागअ आप्पू लै इहअ बोल्दअ, “बिधाता#28:16 बिधाता मूल़ भाषा दी याहवेह आसा ऐहा ज़ैगा, मुखा नांईं त भाल़ थोघै आथी।”
17तेऊ फिरी डअर संघा लागअ इहअ बोल्दअ, “ऐहा ज़ैगा ता डरनअ लागा! अह ज़ैगा आसा पाक्कै दी बिधाते, अर स्वर्गे प्रऊल़ आसा हणीं इधी।”
18दोत्ती उझ़ुअ याकब संघा ज़ेऊ पात्थरे नील़ै सह सुत्तअ द थिअ, सह किअ तेऊ थाम्हा ज़िहअ खल़अ संघा तरैल़अ तेते मुंडै जैतूनो तेल।
19तेखअ डाहअ याकबै तैहा नगरी नाअं बेतेल#28:19 बेतेल बिधातो घअर, पैहलै थिअ तैहा ज़ैगा नाअं लूज।
20तेखअ मनी याकबै एही मानत, “ज़ै मालक ऐहा बाता मुंह संघा रही मेरी फाज़त करे अर पेटा लै रोटी अर घेरी लै झिकल़ै दैए, घअरा लै फरेओए 21तेखअ ज़ै हुंह राज्ज़ी-राम्बल़अ आपणैं घअरै बापस पुजे तै हणअ तूह मेरअ सदा लै बिधाता।
22“तेखअ ज़ुंण मंऐं अह पात्थर खल़अ किअ, अह हणअ परमेशर बिधातो घअर, ज़ुंण बी तूह मुल्है दैए तेतो दसुअ निसब करनअ मुंह ताल्है ज़रूर दैई।”
Currently Selected:
मूल़ 28: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
