एज्रा 9
9
यहूदा मुल्खे पापा लै किई एज्रा बिधाता सेटा अरज़
1ज़ांऊं ईंयां गल्ला हई मुक्की, इज़राईली मांझ़ै आऐ कई सैणैं मुंह सेटा लै, तिन्नैं खोज़अ मुखा इहअ कि इज़राईली परज़ा, प्रोहत अर लेबी मांझ़ै कई मणछ ज़ुंण शुचै निं आथी, तिंयां आसा तिन्नां फेर बस्सै दै होरी देशे साबै ज़िऊंदै लागै दै! तिंयां आसा अमोनी, मोआबी, मिसरी, कनानी, हित्ती, परिजी, जबेशी अर अमोरी ज़िहै च़िल़्हखरै कामां करदै लागै दै! 2यहूदी बैही इने शोहरी आपणैं शोहरू लै अर आपणीं ज़ाई बैही इना लै! ऐबै रल़ी बिधाते पबित्र परज़ा इना परदेसी संघै। अह पाप किअ सोभी का आजी म्हारै सैणैं अर कार-करिंदै!
3ज़ांऊं मंऐं ईंयां गल्ला शूणीं, मंऐं धेल़ै तेऊ दुखै आपणीं घेरीए झिकल़ै संघा बच़ोटै आपणैं मुंडे अर दाल़्हीए शराल़ अर तेखअ हुअ हुंह थोल़ी घल़ी नड़क्क। 4हुंह रहअ तेभा पोर्ही उडै बिधाता लै बल़ीदान हणें बेला तैणीं तिधी तिहअ ई नड़क्क बेठी। उडै झाल़्हुऐ तेखअ मुंह फेर म्हारै गलामी का फिरी आऐ दै कई मणछ ज़ुंण बिधाता संघै इहअ विश्वास घात करनै का डरा तै। किल्हैकि इज़राईले परमेशरै थिई हाम्हां लै चतैनगी दैनी दी कि परदेसी मणछा का रहै दूर। 5ज़ांऊं उडै बल़ीदान करनैओ बगत हुअ, हुंह उझ़ुअ तैहा ज़ैगा का खल़अ ज़िधी हुंह आपणैं च़ोल़ै धेल़ी शोग करदअ थिअ लागअ द, हुंह फिरअ आपणैं ज़ान्हूंए ज़ोरै बेशी उटी बाखा संघा लागअ बाह फुआरी आपणैं परमेशर बिधाता सेटा अरज़ करदअ।
6मंऐं बोलअ इहअ, “हे परमेशर, आझ़ हुअ हुंह शर्मिंदअ, हुंह निं ताखा मुंह रहैऊंणै जोगी रहअ! म्हारै पापो दरैअ भर्हुअ म्हारै मुंडा प्रैंदी इहअ कि सह पुजअ उझै सरगै तैणीं! 7म्हारै दाद-बाब बी रहै पाप करदै लागी अर आझ़ बी आसा हाम्हैं पाप करदै लागै दै। एऊ पाप करनै पिछ़ू ई हारै हाम्हैं, म्हारै राज़ै अर प्रोहत होरी देशे राज़ै! तैही काटै-फणाटै हाम्हैं म्हारै दुशमणै तलबारा करै, तैही किऐ हाम्हैं लुटी घशिट्टी गलामी दी निंईं शर्मिंदै। हाम्हैं थिऐ पठी कदुष्ट अर आझ़ बी आसा हाम्हैं तिहै ई। 8पर हे परमेशर बिधाता, ऐबै गअ त तूह थोल़ै धैल़ै ओर्ही हाम्हां लै झींण करदअ लागी, तेरअ जश हुअ हाम्हां लै इहअ कि हाम्हां मांझ़ै आऐ कई गलामी का फिरी कि हाम्हैं राज्ज़ी-राम्बल़ै तेरी पबित्र ज़ैगा बस्से। तंऐं दैनी हाम्हां लै गलामी का काढी नऊंईं ज़िन्दगी। 9हाम्हैं तै गलाम, पर तंऐं बिधाता निं हाम्हैं तेथ बी कल्ही शोटी डाहै। तूह झ़ूरा हाम्हां लै खास्सअ, तेरी हुणाकार हुई हाम्हां लै एही कि फारस देशे माहा राज़ै बी किई म्हारी मज़त। तंऐं दैनी हाम्हां लै नऊंईं ज़िन्दगी! तंऐं दैनअ हाम्हां तेरै भबना भिई बणाणैं अर यहूदा अर एरुशलेम नगरी राज्ज़ी-राम्बल़ै बस्सणै।
10“पर ए म्हारै परमेशर, इना एतरी गल्ला हणैं बाद हाम्हैं किज़ै सका बोली? हाम्हैं सका सिधअ एचल़ी बोली कि हाम्हैं निं तेरै हुकम भिई मनै ज़ुंण तंऐं 11तेरै दास अर गूरा बाती हाम्हां लै दैनै। तिन्नैं बोलअ त इहअ कि ज़हा ज़ैगे मालक तंऐं हाम्हैं आसा लाऐ दै बणाईं, सह ज़ैगा आसा कदुष्ट अर पापी लोगा करै भर्हुई दी ज़ुंण च़िल़्हखरै काम करनअ कधि निं छ़ाडदै! 12तेरै तिन्नैं गूरै हेरअ त हाम्हां लै बोली कि तिन्नें शोहरी निं आपणैं शोहरू लै बैही अर नां आपणीं ज़ाई तिन्नां लै दैई अर नां तिन्नां संघै संगत डाही। ज़ै तम्हैं पोस्ती दर पोस्ती आद-लुआदा तैणीं बी राज्ज़ी-मौज़ी सदा ऐहा ज़ैगे मालक सदा लै बणनअ च़ाहा, तै निं तिन्नां परदेसी एऊ देशै शांती दी रहणैं दैई। 13एता बाद ज़ेही-ज़ेही बी हाम्हां संघै हुई-बिति, तंऐं दैनी म्हारै पाप अर गलती लै सज़ा, हाम्हां का आसा थोघ कि तूह आसा म्हारअ परमेशर अर तंऐं निं हाम्हां लै तेतरी सज़ा दैनी पै ज़ेतरी हाम्हां लै भेटी लोल़ी ती। तंऐं डाहै तज़ी बी हाम्हां मांझ़ै खास्सै राज्ज़ी-राम्बल़ै बच़ाऊई। 14तै किहअ करै सका हाम्हैं तेरअ हुकम टाल़ी करै इना कदुष्ट अर च़िल़्हखरै लोगा संघै रल़ी? ज़ै हाम्हैं तिन्नां ई संघै रल़े-मिल़े, ताह एछणी एता लै खास्सी रोश्शै अर ताह करनै हाम्हैं पठी खतम अर तेखअ निं हाम्हां मांझ़ै कोहै ज़िऊंदअ रहणअ। 15इज़राईले परमेशर बिधाता, धर्मीं आसा तूह ई एक्कै, तंऐं डाहै हाम्हैं ज़िऊंदै बच़ाऊई। हाम्हैं मना ताह सेटा ऐहा गल्ला कि हाम्हैं आसा दोशी, हाम्हैं निं ताह आजू खल़ै हणैं जोगी आथी।”
Currently Selected:
एज्रा 9: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
