एज्रा 10
10
यहूदी किअ होरी ज़ातीए शोहरी संघै बैह करनअ बंद
1एज्रा शास्त्री थिअ बिधाते भबना आजू ज़ान्हूंए ज़ोरै बेशी प्राथणां करदअ लागअ द, आछी का थिऐ तेऊ आशू लागै दै छ़ुटदै, तेऊ फेर झाल़्हुऐ तिधी खास्सै इज़राईली, बेटल़ी अर शोहरू-माठै संघा लागै सोभ हिक्की-सल़िक्की लेरा लांदै। 2एलाम टोली का थिअ जेहीएलो शोहरू शकनया, तेऊ बोलअ एज्रा लै, “परदेसी बेटल़ी संघै बैहूई किहअ हाम्हैं बिधाता लै विश्वास घात, पर तज़ी बी आसा इज़राईली का बच़णा लै मोक्कअ। 3ऐबै करनी हाम्हां आपणैं मालक बिधाता संघै करार कि हाम्हां छ़ाडणीं ईंयां बेटल़ी अर इने शोहरू-माठै पोर्ही। हाम्हां करनअ तिहअ ई ज़िहअ तूह अर बिधाते हुकमो अदर करनै आल़ै मणछ सलाह दैए। ऐबै करनअ हाम्हां तिहअ ई ज़िहअ बिधातो बधान बोला। 4एज्रा, ऐबै एऊ कामां करने ज़िम्मैंबारी आसा ऐबै तेरी, हाम्हैं आसा ताह पिछ़ू, ऐबै कर तूह हिम्मत।”
5एज्रा उझ़ुअ खल़अ संघा बझ़ैल़ै प्रोहते सैणैं, लेबी अर होरी इज़राईली का सोह खाणैं कि तिंयां तिहअ ई करे ज़ेही शकनया सलाह दैनी। 6तेखअ डेऊअ एज्रा बिधाते भबना का उझ़ुई एलियाशिबे शोहरू जहोहनाने पांडा संघा रहअ बैल़ी तिधी। जहोहनानै ती गलामी का फिरी आऐ दै लोगे खास्सी माल़ी हुई दी कि तिन्नैं किअ बिधाता संघै विश्वास घात। तेऊ निं तिधी किछ़ै खाअ नां झुटअ।
7तेखअ दैनअ एरुशलेम अर यहूदा सारै देशै समाद कि ज़ुंण बी गलामी का फिरी आसा आऐ दै, तिंयां लोल़ी सोभै राज़धानी एरुशलेम आऐ। 8अह आसा प्रोहता मांझ़ै सैणैंओ हुकम। ज़ै कुंण चिई धैल़ै भितरी नांईं पुजे, तिन्नें करनीं हेरे सारी ज़ैदात बरैबाद अर टोली मांझ़ा का बी करनै तिंयां दूर। 9चिई धैल़ै बाद हुऐ यहूदा अर बिन्यामीन सारै देशा का बिहा मकशीरै लोग एरुशलेम नगरी बिधाते भबने च़फै कठा, उझै का थिअ सरग लागअ द, ठांढै-शेल़ै ती लोगा काम्मणीं लागी दी पर तज़ी बी रहै लोग बागै बेशी।
10तेखअ हुअ एज्रा प्रोहत तिन्नां आजू खल़अ संघा लागअ बोल्दअ, “तम्हैं किअ परदेसी पराई ज़ातीए बेटल़ी संघै बैहूई विश्वास घात! एता करै लागअ इज़राईला लै खास्सअ दोश। 11ऐबै मना आपणैं दादा-बाबे परमेशर बिधाता सेटा आपणअ पाप संघा करा तिहअ ज़िहअ सह च़ाहा। तिन्नां परदेसी बेटल़ी दैआ पोर्ही छ़ाडी!”
12तिधी सोभी मणछै बोलअ ज़ोरै इहअ, “ज़िहअ तूह बोले, हाम्हां करनअ तिहअ ई।” 13पर एता संघै बोलअ तिन्नैं इहअ बी, “हाम्हैं आसा खास्सै, उझै का आसा सरग लागअ द! हाम्हैं निं इधी बागै खल़्हुई रही सकदै। अह काम इहअ बी निं आथी ज़ुंण एकी-दूई धैल़ै खतम होए! किल्हैकि इहअ पाप आसा हाम्हां मांझ़ै खास्सै ज़ण्हैं किअ द। 14एता का आसा इहअ कि हाम्हां मांझ़ै म्हारै कार-करिंदै रहे इधी एरुशलेम नगरी संघा सभाल़े एऊ कामें ज़िम्मैंबारी। हाम्हैं सोभी ज़ुंणीं अह पाप किअ, हाम्हैं एछमैं ज़ेभा लै तम्हैं शादे तेभै सैणैं अर पांच़ा सेटा भिई। ज़ै हाम्हैं एऊ साबै ऐहा गल्ला सोथरे, तै जाणअ परमेशरो कोप हाम्हां का दूर हई।”
15होरी निं कोही ऐहा गल्ला लै किछ़ बोलअ पर असाहेले शोहरू जोनातान अर तिकबो शोहरू जहजीया हुऐ ऐहा गल्ले खलाफ खल़ै अर तिन्नों साथ दैनअ दूई लेबी मशूलाम अर शबताई।
16पर गलामी का बापस फिरै दै सोभी किअ तिहअ ई ज़ेही गल्ला हुई, एज्रा छ़ांटै तिन्नां मणछा प्रैंदै तिन्नें टोलीए साबै सैणैं संघा डाहै तिन्नें नाअं लिखी। तेखअ लागै तिंयां दसा माघा पोर्ही ऐहा गल्ले रह-तह करदै। 17आजू साज़ै च़ैत्रा तैणीं मुक्कै तिंयां तिन्नां मणछे पुछ़-ज़ाच़ करी ज़ुंणीं परदेसी बेटल़ी ती बैही दी।
मणछ ज़ुंणीं परदेसी बेटल़ी ती बैही दी
18ईंयां एतरै लोग थिऐ ज़ुंणीं परदेसा का होरी ज़ाती का बेटल़ी ती बैही दी:
प्रोहते टोली दी ज़ुंण होरी ज़ाती संघै बैहुऐ, तिंयां थिऐ जेशूआ अर तेऊए टबरा मांझ़ै टोली का जोसादके शोहरू: मासेया, एलीआजर, जारीब अर गदाली। 19तिंयां हुऐ आपणीं पराई ज़ाती का बैही दी बेटल़ी छ़ाडी दैणा लै तैर, इनै सोभी आणै आपणैं एऊ दोशा लै हेल़्ही का एक-एक गाभू दोश बल़ी लै।
20इमेर टोली का हनानी अर जबदीया।
21हारीम टोली का मासेया, एलिशा, शमयाह, जेहीएल अर उज़ियाह।
22पशहूर टोली का एलोनाई, मासेया, इशमाईल, नतनेल, जोजबाद अर एलासा।
23लेबी मांझ़ै निखल़ै जोजबाद, शिमी, केलाया ज़हा लै कलीता बी बोला, पथाह, यहूदा अर एलीआजर।
24गाज़ै-बाज़ै आल़ै मांझ़ै निखल़अ एलियाशिब।
बिधाते भबने पहरी मांझ़ै निखल़अ शलूम, तेलेम अर ऊरी।
25होरी इज़राईली मांझ़ै निखल़ै पारोश टोली का रामी, इशिया, मलकिजा, मिजामिम, एलीआजर, मलकिजा अर बेनियाह ज़ुंणीं पराई ज़ातीए बेटल़ी ती बैही दी।
26एलाम टोली का थिऐ मतानियाह, जकर्या, जेहीएल, अबदी, जरमोत अर एलिशा।
27ज़ाटू टोली का थिऐ एलोनाई, एलियाशिब, मतानियाह, जरमोत, जाबाद अर अजीजा।
28बेबाई टोली का थिऐ जहोहनान, हनन्याह, जबाई अर अतलाई।
29बैनी टोली का थिऐ मशूलाम, मलूक, अदाया, जशूब, शीएल अर जरमोत।
30पहात-मोआब टोली का थिऐ अदना, चेलाल, बेनियाह, मासेया, मतानियाह, बसलेल, बिनूई अर मनिश्शे।
31-32हारीम टोली का थिऐ एलीआजर, इशिया, मलकिजा, शमयाह, शमौन, बिन्यामीन, मलूक अर शेमारीया।
33हशूम टोली का थिऐ मतनाई, मत्तात, जाबाद, एलीपेलेत, जेरमाई, मनिश्शे अर शिमी।
34-37बैनी टोली का थिऐ मादाई, अमराम, उएल, बेनियाह, बेदिया, चेलूही, बेनियाह, मरमोत, एलियाशिब, मतानियाह, मतनाई अर जाशू।
38-42बैनी टोली का थिऐ बिनूई, शिमी शेलेमयाह, नातान, अदाया, मकनदेबाई, शाशाई, शराई, अजरेल, शेलेमयाह, शेमारीया, शलूम, अमर्या अर युसुफ।
43नेबो टोली का थिऐ जेइल, मत्तितियाह, जाबाद, ज़बीना, जादाई, जोएल अर बेनियाह।
44इना सोभी तै परदेसी पराई ज़ातीए बेटल़ी बैही दी। तेखअ दैनी तिन्नैं तिंयां तिन्नें शोहरू-माठै संघी छ़ाडी।
Currently Selected:
एज्रा 10: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
