एजकेल 47
47
ज़िन्दगी दैणैं आल़ी पाणींए गाड
1तेखअ आणअ तेऊ मणछै हुंह भबने दुआरा सेटा लै बापस। तिधी शुझुअ मुखा इहअ कि दुआरे डेहल़ा हेठा का आसा पाणींए गाड लागी दी, सह गाड आसा पुर्बा बाखा बगदी लागी दी ज़ेथ बाखा भबनो मोहरअ आसा त। सह गाड ती बेदीए दखण दिशा बाती बगदी लागी दी।#जक. 14:8; जोह. 7:38; प्रका. 22:1 2तेखअ आणअ तेऊ मणछै हुंह उतरा बाखे प्रऊल़ी बाती बागै, नढैऊंदी निंयं हुंह तेऊ पुर्बा बाखे प्रऊल़ी सेटा लै। तिधी शुझुअ मुखा कि भबना दखणा बाखा बी आसा पाणींए गाड लागी दी। 3तेखअ च़कअ तेऊ मणछै तेता नापणा लै हाथै सूत संघा डेऊअ सह पुर्बा बाखा लै। तेखअ नापी तेऊ सह गाड भबना पोर्ही एक हज़ार हाथ दूर तैणीं अर हुंह बी नढैऊअ तेऊ पाणीं बाती अर सह गाडो पाणीं पुजअ सिधअ मेरै गोडै तैणीं। 4तेखअ नापअ तेऊ तिधा आजू एक हज़ार हाथ होर, संघा नढैऊअ हुंह तेऊ तिधा आजू पाणीं जैंदरी अर गाडो पाणीं पुजअ मेरै ज़ान्हूं तैणीं। तिधा आजू नापी तेऊ सह गाड एक हज़ार हाथ होर अर तेतो पाणीं पुजअ मेरी गाची तैणीं। 5तिधा आजू बी नापी तेऊ सह गाड हज़ार हाथ, संघा बोलअ मुल्है तैहा गाड्डै पाणीं जैंदरी हांढणा लै अर तेथ निं खिरी हुंह हांढी सकअ किल्हैकि सह गई ती एक बडी नदी बणी अर तेतो पाणीं गअ त खास्सअ डुघअ हई, तेथ सका तै सिधै तरी करै पार निखल़ी। तैहा नदी निं ज़ांघा हांढी पार करी सकदै तै। 6तेखअ बोलअ तेऊ मणछै मुल्है इहअ, “मणछा, तंऐं ईंयां सोभै गल्ला राम्बल़ै करै भाल़ी बी?”
तेखअ आणअ हुंह तेऊ नदीए बाढा-बाढा बाती बापस। 7ज़ांऊं हुंह बापस फिरअ, मुखा शुझुअ इहअ कि नदीए दोहरी बाखा बाढै आसा खास्सै बूट लागै दै।#एज. 47:12 8तेऊ मणछै बोलअ मुल्है इहअ, “ऐहा नदीओ पाणीं बगा पुर्बा बाखा लै। अह डेओआ जरदण नदीए खागा बाखा, तेखअ पुजा अराबा खारै समुंदरै, तिधी पुजी करा अह नदी तेऊ समुंदरो लूंणअ पाणीं मिठअ। 9ज़ेसी-ज़ेसी बाती अह नदी बगा, तेस्सी-तेस्सी भेटणीं भांती-भांतीए ज़ीबा ज़िन्दगी। खारै समुंदरै बी हणीं खास्सी म्हाछ़ली किल्हैकि तेतो पाणीं हणअ ऐहा नदी करै निम्बल़अ अर मिठअ। इहअ करै ज़ेसी बी अह नदी बगे, तेस्सी भेटणीं सोभी ज़ीबा ज़िन्दगी। 10समुंदरे बाढै हणैं मणछ म्हाछ़ली ढाकदै खल़्हुऐ दै। तिन्नैं हणैं म्हाछ़ली ढाकणा लै एनगाद पोर्ही एगलीम तैणीं समुंदरै ज़ज़ाल़ पाऐ दै। तिन्नां भेटणीं तेथ मांझ़ समुंदरा ज़ेही भांती-भांती अर हरेकी ज़ातीए म्हाछ़ली। 11पर खारै समुंदरा नेल़ ज़ुंण सअर अर कोफरी आसा, तेतो पाणीं रहणअ खारअ ई, तेता का हणअ लोगा लूंण काढणा लै। 12नदीए बाढै दोहरी बाखा हणैं भांती-भांतीए फल़ दैणैं आल़ै डाल़-बूट। तिन्नें पाच निं कधि शुक्कणैं अर फल़ बी हणैं तेथ कबल्लै लागै दै। किल्हैकि तिन्नां डाल़ा बूटा बझ़णा लै पाणीं एछा मेरै पबित्र भबना का। तिन्नां बूटे फल़ हणैं लोगा लै बैल़ी-क्लारी खाणां लै अर तिन्नां डाल़ा-बूटे पाच हणैं दुआई अर मल्हम।”#प्रका. 22:2
देशे सिअं
13परमेशर बिधाता बोलअ इहअ, “देशे ज़ैगा ज़ुंण ताह इज़राईल देशे बारा गोत्रा लै बांडी दैणीं, तेता दैऐ सोभी लै एक-एक हेस्सअ पर युसुफे आद-लुआदा लै दैऐ दूई हेस्सै। 14सोभी गोत्रा लै दैऐ तूह देशे ज़ैगा मांझ़ै बराबर-बराबर हेस्सअ बांडी। ज़ेते मंऐं थारै दादा-बाबा लै ज़बान आसा दैनी दी कि मुंह दैणीं तिन्नां लै ज़ैगा ज़िधी तिंयां सदा लै बस्से। ऐबै हणीं सह ज़ैगा थारी अर आजू थारी आद-लुआदा लै।
15“देशे उतरा बाखे सिअं हणीं मांझ़-समुंदरा पोर्ही हेतलोन नगरी तैणीं अर तिधा आजू पुर्बा बाखा हमात अर सदाद तैणीं। 16सदाद आजू हणीं बरोत अर सिबरीम नगरी तैणीं ज़ुंण दमिश्क अर हमात सिऊंआं मांझ़ै आसा। तिधा आजू डेऊणीं देशे सिअं हसेर-हाटीकोन तैणीं ज़ुंण नगरी होरान सिऊंआं दी आसा। 17इहअ करै हणीं उतरा बाखे सिअं मांझ़ समुंदरा पोर्ही पुर्बा बाखा हसेरनान तैणीं ज़ेते दखणा बाखा दमिश्क नगरीए सिअं अर उतरा बाखा हमात नगरीए सिअं आसा।
18“पुर्बा बाखे सिअं हणीं जरदण नदी। अह हणीं होरान अर दमिश्क नगरी मांझ़ै हसेरनान नगरी गलाद अर इज़राईले ज़ैगा बाती खारै समुंदरै तामार नगरी तैणीं।
19“दखणा बाखे सिअं हणीं तामार पोर्ही मरीबा कादेश नेल़ गाडा बाती मिसर देशे सिऊंआं दी भराल़की गाडा बाती मांझ़ समुंदरा तैणीं।
20“पछ़मा बाखे सिअं हणीं मांझ़ समुंदर। अह डेऊणीं उतरा बाखा हमात ज़ोता पछ़मा बाखा तैणीं।
21“इहअ करै दैऐ तूह सारै देशे ऐहा ज़ैगा इज़राईले बारा गोत्रा दी बांडी। 22ऐहा ज़ैगा बांडै तम्हैं आप्पू मांझ़ै अर तिन्नां परदेसी संघै ज़ुंण तम्हां जैंदरी आसा बस्सै दै अर तम्हां ई जैंदरी तिन्नें शोहरू-माठै आसा हुऐ दै। तिन्नां बी मनै तम्हैं ज़िहै कि तिंयां आसा तम्हां ई ज़िहै इज़राईली। तिन्नां लै दैऐ तम्हैं धख-धख ज़ैगा इज़राईली टोली मांझ़ा का। 23ज़ुंण परदेसी ज़हा गोत्रा अर टोली जैंदरी होए बस्सअ द, तेऊ लै दैऐ तिन्नां ई जैंदरी ज़ैगा। अह गल्ल डाही मंऐं परमेशर बिधाता बोली।”
Currently Selected:
एजकेल 47: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
