एजकेल 46
46
तिह-थैरा लै बल़ीदान
1तेखअ बोलअ परमेशर बिधाता इहअ, “भितरली ताटी दी पुर्बा बाखे प्रऊल़ रहणीं हबतै छ़हा धैल़ी बंद। तैहा घुआल़ै सिधी बशैघे धैल़ी अर पुनूंईए धैल़ी। 2इज़राईल देशो राज़अ हऐ बाघली प्रऊल़ीए च़ऊंरै भितरी थाम्हा सेटा खल़अ। प्रोहत करै तेभै हूम बल़ीदान, मेल़-ज़ोल़ो बल़ीदान। तेखअ डेओऐ तैहा प्रऊल़ीए डेहल़ा सेटा माथअ टेक्की राज़अ बागा का ई बापस, पर तैहा प्रऊल़ी डाहै उडै तैणीं तेही ई घुआल़ी। 3इज़राईले परज़ा बी टेक्कै बशैघे धैल़ी अर पुनूंईए धैल़ी मुंह बिधाता सेटा माथअ। 4इज़राईल देशो राज़अ आणै बशैघे धैल़ी मुंह बिधाता लै हूम बल़ीदान करना लै छ़ह मिम्मूं अर एक गाभ ज़ेथ किछ़ै खोट निं होए। 5गाभू संघै दैऐ सह पांज़ पाथै नाज़ बल़ी अर तिन्नां मिम्मूं संघै दैऐ ज़ेतरी समरता होए तेतरअ नाज़। पांज़-पांज़ पाथै नाज़ा संघै दैऐ सह सात सेर दाखो रस। 6पुनूंईए धैल़ै करै राज़अ एक बाछ़ू, छ़ह मिम्मूं अर एक गाभ मुल्है बल़ीदान ज़ेथ किछ़ै खोट निं होए। 7बाछ़ू, गाभा संघै दैऐ, पांज़-पांज़ पाथै नाज़ अर मिम्मूं संघै बी दैऐ ज़ेतरी समरता होए तेतरअ नाज़। हर पांज़ पाथै नाज़ा संघै दैऐ सात-सात सेर दाखो रस। 8राज़अ डेओऐ प्रऊल़ी सेटा लै च़ऊंरै बाती अर तैहा ई बाता डेओऐ बापस।
9“ज़ेभै इज़राईल देशे परज़ा मुंह बिधाता सेटा मेरै तिह-थैरे धैल़ै मेरै भबना भितरी एछे, तिंयां निं तैहा प्रऊल़ी बाती बापस डेऊई ज़ेसी तिंयां भितरी ताटी लै आऐ तै। ज़ुंण उतरा बाखा प्रऊल़ी बाती भितरा लै एछे, सह निं तेस्सी बाती बागा लै निखल़ी अर ज़ुंण दखणा बाखे प्रऊल़ी बाती भितरा लै एछे सह निं तेस्सी बाती बागा लै निखल़ी। तिंयां लागै कोहरी सिधा आजू हांढदै संघा निखल़ै सम्हनै दुजी प्रऊल़ी बाती बागा लै। 10ज़ेभै लोग एछे, राज़अ बी एछै तेभै ई अर ज़ेभै लोग डेओए, राज़अ बी डेओऐ तिन्नां ई संघै। 11ज़ेभै तिह-थैरे धैल़ै हूम बल़ीदान करे, तेता संघै नाज़ो हूम करनैओ आसा अह बधान: हर बाछ़ू अर गाभा संघै करै पांज़ पाथै नाज़ो हूम। मिम्मूं संघै करै ज़ेतरी समरता होए तेतरअ नाज़ हूम। हर पांज़ पाथै नाज़ा संघै दैऐ सात सेर दाखो रस ज़रूर।
12“ज़ेभै इज़राईल देशो राज़अ मुल्है तिह-थैरा का लाऊआ मुंह बिधाता लै मानत डाही हूम बल़ी या मेल़-ज़ोल़ो बल़ीदान दैणअ च़ाहे, तेभै घुआल़ै तेऊ लै पुर्बा बाखे प्रऊल़। ज़ेही सह बशैघे धैल़ी हूम बल़ी अर मेल़-ज़ोल़ो बल़ीदान करा, तेऊ ई साबै करै मुल्है मानत डाहै दै हूम बल़ीदान अर मेल़-ज़ोल़ो बल़ीदान। तेखअ निखल़ै सह प्रऊल़ी का बागै अर तेऊ डेऊणैं बाद करै प्रऊल़ तेभी बंद।”
हर धैल़ै लै भैंट
13परमेशर बिधाता बोलअ इहअ, “इज़राईल देशे राज़ेए ज़िम्मैंबारी हणीं अह बी कि सह हर धैल़ै दोत्ती हूम बल़ीदान करना लै हर धैल़ी लै एकी साले गाभूओ इंतज़ाम करे ज़ेथ किछ़ै खोट निं होए। 14तेता संघै दैऐ हर धैल़ै एक पाथअ कणको पिठअ अर तेता मुछ़णा लै ढाई सेर तेल। अह हणीं मुंह बिधाता लै नाज़ बल़ी। हर धैल़ै हूम बल़ीओ आसा सदा लै अह ई बधान। 15एऊ साबै दैऐ, हर धैल़ै गाभू, नाज़ अर तेल। ताकि तेता हर धैल़ै मुल्है हूम करे।”
राज़अ अर तेऊए ज़ैगा
16परमेशर बिधाता बोलअ इहअ, “ज़ै इज़राईल देशो राज़अ आपणीं ज़िम्मीं-ज़ैगा मांझ़ै धख हेस्सअ आपणैं कहा शोहरू लै दैए, सह ज़ैगा हणीं तेखअ तेऊ ई शोहरूए जदी ज़ैगा अर तेथ हणअ सिधअ तेऊओ ई हक। 17पर ज़ै राज़अ आपणीं ज़ैगा-ज़िम्मीं मांझ़ै आपणैं दासे शोहरू लै दैए, सह ज़ैगा रहणीं तेऊए पज़ाहुई साले बर्शगांठै तैणीं अर तेखअ हणीं सह ज़ैगा भिई राज़ेए अर तैहा ज़ैगे मालक सका सिधै राज़ेए शोहरू हई।#लेब. 25:10 18इज़राईल देशो राज़अ निं परज़ा मांझ़ै कोहिए जदी ज़ैगा छ़ड़ैऊई नां तिन्नें ज़ैगा थोघै बाझ़ी कबज़अ करी। आपणैं शोहरू लै दैऐ सह आपणीं ज़ैगा मांझ़ा का हेस्सअ ताकि तिंयां परज़ा मांझ़ै कोही बी ज़ैगा पिछ़ू नां हंते।”
भबने रसोई
19तेखअ निंयं हुंह तेऊ मणछै दखणा बाखा प्रऊल़ी भितरली ताटी तिन्नां खुडी सेटा लै ज़ेतो मोहरअ उतरा बाखा आसा त। ईंयां खुडी थिई पबित्र ज़ुंण प्रोहता लै थिई बणाईं दी। तिधा का रहैऊई तेऊ मुखा दूर ज़ेही पछ़मा बाखा एक ज़ैगा 20संघा बोलअ तेऊ मणछै मुल्है इहअ, “अह ज़ैगा हणीं रसोई लै ज़िधी प्रोहता दोश बल़ी, पाप बल़ीदान किऐ दै पशूए शिखा सटेऊंणी। नाज़ बल़ीओ भोज़न बी चाणनअ तिन्नां इधी ताकि तिन्नां मुल्है भैंट किई दी पबित्र च़िज़ा बाघली ताटी लै निंणे ज़रुरत नां पल़े ज़िधी आम लोग हआ।”
21-22तेखअ निंयं तेऊ मणछै हुंह बाघली ताटी लै। तेऊ रहैऊऐ मुखा तेते च़ार कूणीं। बाघली ताटीए च़ऊ कूणीं थिऐ होछ़ै-होछ़ै च़ार ताटल़ू। तिंयां तै च़ाल़्ही-च़ाल़्ही हाथ लाम्मै अर तिह-तिह हाथ बिरलै। 23तेता फेर ती पात्थरे भिंडी च़िणीं दी अर भिंडीए नील़ै तै फेर गेठै बणाऐं दै। 24तेऊ मणछै बोलअ मुल्है इहअ, “ईंयां ताटल़ू आसा रसोई लै ज़ेथ भबनै च़ाकरी करनै आल़ै तिन्नां पशूए शिखा सटेऊंणी ज़ुंण आम परज़ा बल़ीदान करनै।”#एज. 44:10-14
Currently Selected:
एजकेल 46: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
