एजकेल 13
13
शल़ैघी गूरे दशा
1बिधाता बोलअ मुल्है भिई इहअ, 2“मणछा, तूह खोज़ इज़राईली गूरे बारै! ईंयां खोज़ा आपणीं मनघल़ंत गल्ला लोगा लै, ‘बिधातो समाद शूणां।’”
3परमेशर बिधाता बोलअ इहअ, “कमुर्ख गूरा लै पल़णीं आफ़त! मंऐं निं तिन्नें धैनै किछ़ खोज़अ! तिंयां खोज़ा लोगा का आपणीं मनघल़ंत गल्ला। 4इज़राईली लोगो! थारै गूर हुऐ पात्थरे जणगल़ा जैंदरी रहणैं आल़ै शैल़ी-शैल़ठै ज़िहै। 5तिंयां निं नगरीए दुआली दी पल़ी दी द्रटा बाखा धैन ई दैंदै अर नां तिंयां ढूल़ी दी दुआला उझै भिई च़िणदै आथी, ज़िहअ करै बिधाते धैल़ी इज़राईली जुधा लै बच़ी रहे। 6ज़ुंण तिंयां धैनै भाल़ा, तिंयां गल्ला निं शुची आथी। तिन्नों जोतष लाणअ आसा झ़ुठअ! तिंयां बोला इहअ, ‘हाम्हैं खोज़ा बिधातो समाद!’ पर मंऐं निं तिन्नां का किछ़ समाद आथी खोज़अ द, नां मंऐं तिंयां छ़ाडै। तज़ी बी ज़ाणा तिंयां इहअ कि ज़ुंण तिन्नैं बोलअ तिंयां गल्ला निभणी तेही ई! 7हुंह बोला तिन्नां लै, ‘ज़ुंण तम्हैं धैनै भाल़ा, तिंयां गल्ला निं शुची आथी। तम्हैं निं जोतष लाणअ आसा झ़ुठअ! तम्हैं बोला इहअ, “हाम्हैं खोज़ा बिधातो समाद!” पर मंऐं निं तम्हां संघै गल्ला ई किई आथी।’”
8सोभिओ मालक बिधाता बोला तिन्नां लै इहअ, “थारी गल्ला आसा झ़ुठी, थारै धैन बी आसा झ़ुठै। हुंह निं तम्हां बाखा आथी। अह गल्ल डाही मंऐं बिधाता बोली। 9मुंह दैणीं तम्हां झ़ुठै धैन खोज़णैं अर झ़ुठअ जोतष लाणैं आल़ै गूरा लै सज़ा। तम्हैं निं मेरी परज़े सैणें सभा दी हणैं, थारअ नाअं निं इज़राईली जैंदरी हणअ। तम्हैं निं कधि आपणैं देशे ज़ैगा लै बापस फिरनैं। तेखअ लागणअ तम्हां का थोघ कि हुंह आसा सोभिओ मालक बिधाता।
10“तम्हैं नकली गूरै ठगी मेरी परज़ा! तम्हैं बोला तिन्नां का इहअ, ‘ज़ाथी हणअ सारै दी मेल़-ज़ोल़!’ पर असली दी निं मेरी परज़ा लै किधी मेल़-ज़ोल़ आथी! मेरी परज़ा आसा इहै मणछा ज़ेही हुई दी ज़ुंण शदल़ू करै काच़ी दुआल च़िणां अर बागा का डाहा तेता शेतै माट्टै करै लेस्सी ताकि सह बधिया शुझिए।#जेर. 6:14; 8:11 11मणछा, इना गूरा लै बोल इहअ कि शेतै माट्टै करै लेस्सी दी दुआल ढुल़णीं धरना लै। मुंह बरशाऊंणअ सरगा का तेता लै लोदल़-छ़ोदल़ पाणीं, बडै-बडै शरू अर बडी ढिश-बागरी। 12दुआल ढुल़णीं धरना लै, अर सोभी पुछ़णअ, ‘शेतै माट्टै करै बागा का दुआल लेस्सणी हुई थारी बृथा!’”
13परमेशर बिधाता बोलअ इहअ, “मुंह छ़ाडणीं रोश्शै बडी ढिश बागी, सरगा का बरशाऊंणअ लोदल़-छ़ोदल़ पाणीं अर बडै-बडै शरू कि अह दुआल पठी ढुल़े। 14ज़ुंण दुआल तम्हैं शेतै माट्टै लाई लेस्सी-टुशी डाही, सह ढोल़णीं मुंह गोधी का धरनीं। ज़ांऊं सह दुआल ढुल़णीं, तेथ हेठै दाभूई मरनै तम्हैं बी। तेखअ लागणअ सोभी का थोघ कि हुंह आसा बिधाता।
15“मुंह काढणअ आपणअ रोश्श दुआली अर एता शेतै माट्टै करै लेस्सणै आल़ै गूरा प्रैंदै। तेखअ खोज़ूं हुंह तम्हां का, ‘नां एथ दुआल रही अर नां तेता शेतै माट्टै करै लेस्सणै आल़ै ज़िऊंदै रहै।’ 16इज़राईले तिंयां गूर खोज़ा झ़ुठै धैनै-सुपनै! तिंयां दैआ लोगा लै एही ज़बान कि आजू हणअ एरुशलेम नगरी दी मेल़-ज़ोल़! पर हुंह मालक बिधाता बोला इहअ कि तेथ निं मेल़-ज़ोल़ आथी।”
इज़राईला दी बेटल़ी गूर
17बिधाता बोलअ भिई इहअ, “मणछा, तूह भाल़ आपणैं लोगा जैंदरी इना बेटल़ी, ज़ुंण जोतष लांदी फिरा। तिन्नां लै लअ मेरअ समाद खोज़ी। 18तिन्नां का खोज़ कि हुंह मालक बिधाता बोला तिन्नां लै,
“‘तम्हां बेटल़ी लै आसा आफ़त! ज़ुंण तम्हैं बाहा लै जंतर अर मुंडै बान्हणां लै जंतरा आल़ै घुंढू बणाआं। तम्हैं डाहा तेता लोगे नल़ै अर माथै बान्हीं। ताकि तिंयां होरीए ज़िन्दगी काबू करे। इहअ करै डाहा तम्हैं आपणैं फाईदै लै मेरी परज़ा आपणैं ज़ज़ाल़ा दी चैल़ी। पर तम्हैं बी शाचणी तेही ई ज़ज़ाल़ा दी। 19तम्हैं किअ हुंह एक अंदल़ू ज़ौ अर धख ज़ेही रोटीए तैणीं मेरी परज़ा सम्हनै नकदरअ। तम्हैं मारा मेरी परज़ा मांझ़ै तिन्नां ज़ुंण मरनै जोगी नांईं आथी तै, असली दी ज़ुंण मारना ई लै आसा तै, तिन्नां डाहा तम्हैं ज़िऊंदै। इहअ करै खोज़ा तम्हैं मेरी परज़ा का झ़ुठअ अर तिंयां करा थारी गल्ला दी विश्वास।’”
20तैही बोला मेरअ मालक बिधाता इहअ, “हुंह करा थारै तिन्नां जंतरा लै नफरत ज़ेता करै तम्हैं ज़िन्दगी अर मौता बशै करदी फिरा। तिंयां छ़ड़ैऊंणैं मुंह थारै हाथा का पोर्ही संघा करनै मुंह तिंयां मणछ आज़ाद ज़ुंण तम्हैं आपणैं बशै आसा किऐ दै। 21मुंह पाणै थारै घुंढू धेल़ी अर मुंह छ़ड़ैऊंणी आपणीं परज़ा थारै बशा का सदा लै ओर्ही। तेखअ लागणअ तम्हां का थोघ कि हुंह आसा बिधाता।
22“थारी इना झ़ुठी गल्ला किऐ धर्मीं मणछ बी दुखी, ज़हा हुंह दुखी निं करनअ च़ाहंदअ। तम्हैं दैआ कदुष्ट मणछा लै एही हिम्मत कि सह निं बूरै करनै का पिछ़ू हटदअ कि सह आपणीं ज़िन्दगी बच़ाऊए! 23ऐबै नां तम्हां झ़ुठै धैन हणैं अर नां तम्हां जोतष लाणअ। मंऐं लाई आपणीं परज़ा थारै बशा का बच़ाऊई, ताकि तम्हां का थोघ लागे कि हुंह आसा बिधाता।”
Currently Selected:
एजकेल 13: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
