लुआह 4
4
बिधाता दैनअ मोसा लै बल
1तेखअ बोलअ मोसा बिधाता का, “ज़ै तिंयां सोभै मेरै एऊ समादा नांईं मने, अर ऐहा गल्लो विश्वास ई निं करे कि तंऐं दैनै मुल्है दर्शण, तेखअ?”
2बिधाता बोलअ मोसा लै, “तेरै हाथै किज़ै आसा।” मोसा बोलअ, “अह आ भाल़ शोठअ।” 3बिधाता बोलअ, “एऊ शोठै शोट धरनीं।”
ज़ांऊं मोसा सह शोठअ धरनीं शोटअ, सह शोठअ बणी दानअ अर मोसा ठुर्हअ तिधा का पोर्ही।
4तेखअ बोलअ बिधाता मोसा लै, “आपणअ हाथ कर आजू संघा ढाक ऐहा दानुईंए लिंघणीं।” मोसा किअ तिहअ ई अर सह दानअ बणी भिई हांढणेओ शोठअ।
5बिधाता बोलअ मोसा लै, “इहअ करै एता लै कि इज़राईली मणछ ऐहा गल्लो विश्वास करे कि ताह हुऐ मेरै दर्शण ज़हा परमेशरा तिन्नें दाद-बाब आबराम, इसहाक अर याकब मना तै।”
6तेखअ बोलअ बिधाता मोसा लै इहअ, “आपणअ हाथ पाआ हिक्का दी भोर्ही।”
मोसा पाअ आपणअ हाथ भोर्ही, संघा ज़ांऊं तेऊ सह बागै काढअ, तेऊओ हाथ हुअ शिंची करै हिंऊंआं ज़िहअ इहअ शेतअ ज़ेही कहा कोहल़ निखल़ा।
7तेखअ बोलअ परमेशरै मोसा लै, “आपणअ हाथ पाआ भिई भोर्ही।”
ज़िहअ बिधाता बोलअ मोसा किअ तिहअ ई, ज़ांऊं तेऊ आपणअ हाथ भोर्ही का बागै काढअ, तेऊओ हाथ हुअ नरोगअ ज़ेही तेऊए होर देही थिई।
8तेखअ बोलअ बिधाता तेऊ लै इहअ, “ज़ै तिंयां पैहलअ नछ़ैण नांईं मने अर तेरी गल्लो विश्वास नांईं करे, दुजै च़मत्कारा भाल़ी हेरनअ तिन्नां विश्वास करी। 9ज़ुंण दूई च़मत्कार करी तंऐं नछ़ैण प्रगट किऐ, ज़ै तिंयां तेता भाल़ी बी विश्वास नांईं करे, तै करै तूह इहअ कि नील नदी का निंयैं धख ज़िहअ पाणीं, संघा पाऐ तेऊ शुक्की ज़ैगा दी, सह पाणीं बणनअ शुक्की ज़ैगा तरेल़दी लोहू।”#लुआ. 7:19
10मोसा बोलअ बिधाता लै इहअ, “मेरै मालक, हुंह निं राम्बल़ै करै गल्ला बी ज़ाणदअ करी, नां हुंह तिहअ गल्ली ताह संघै गल्ला करनै का आजी आथी त अर नां हुंह ऐबै आथी। हुंह आसा गल्ला करना लै हंकलअ अर मुंह निं समझ़ एछदी कि हुंह किज़ै बोलूं।”
11बिधाता बोलअ मोसा लै इहअ, “मणछा बोल़णैं आल़ै या काल्लै या टौणैं कुंण बणाआं? तिन्नां भाल़णा लै आछी या कांणै कुंण बणाआं? ताखा इहअ थोघ निं आथी कि इना गल्ला करनै आल़अ आसा हुंह आप्पै।
12“ऐबै डेऊ, ज़ेभै तूह गल्ला करे तेभै हणअ हुंह आप्पै ताह संघै ताह किज़ै बोल़णअ तिंयां बोल दैंऊं हुंह ताल्है।”
13पर मोसा लागअ तज़ी बी बिधाता लै बोल्दअ, “बिधाता, मेरै मालक, हुंह करा ताल्है ज़ीबाण, तूह छ़ाड एऊ कामां लै कहा होरी मणछा।”
14तेखअ बोलअ बिधाता रोश्शै मोसा लै इहअ, “तेरअ भाई हारण लेबी निं आथी? मुखा आसा थोघ सह ज़ाणा राम्बल़ै करै गल्ला करी, सह आसा ताह सेटा मिलणा लै बाता एछदअ लागअ द, ताह भिई भाल़ी हणअ सह खुश।
15-16“हारणा करनी ताह बाखा लोगा संघै गल्ला अर ज़ेही मंऐं ताखा गल्ला खोज़ी तेही खोज़ै तूह तेऊ का कि किज़ै बोल़णअ। ज़ेभै तम्हैं गल्ला करे हुंह हणअ तम्हां दुही संघै अर हुंह खोज़ूं तम्हां दुही का कि किज़ै करनअ। 17आपणीं ऐहा हांढणे शोठी च़क अर च़मत्कार अर नछ़ैण रहैऊंणै तंऐं एता करै।”
मोसा आअ मिसर देशा लै फिरी
18तेखअ डेऊअ मोसा आपणैं शौहरै च़ितरु सेटा फिरी संघा बोलअ तेऊ लै, “मुंह दै मिसर देशा लै डेऊणैं, ताकि हुंह भाल़ूं हैनूं मेरै भाई-बंध राज्ज़ी-राम्बल़ै बी आसा कि नांईं।”
च़ितरु बोलअ, “ठीक आ, राम्बल़ै करै डेओऐ।”
19बिधाता बोलअ मोसा का मिद्यान देशै, “मिसर देशा लै डेऊ फिरी, ज़ुंण ताह मारनअ च़ाहा तै तिंयां गऐ ऐबै मरी।”
20मोसा बी बशैल़ै आपणीं बेटल़ी-माठै गाधै प्रैंदै, संघा ज़हा शोठी बिधाता संघा डाहणां लै बोलअ त, तैहा शोठी हाथै पाई लागअ मिसर देशा बाखा हांढदअ।
21बिधाता बोलअ मोसा का इहअ, “ज़ेभै तूह मिसर देशै पुजे तेभै डाहै तूह धैन, ज़ुंण च़मत्कार मंऐं ताखा रहैऊऐ तिन्नां रहैऊऐ तूह मिसर देशे माहा राज़ै का। पर मुंह करनअ तेऊओ मन्न होर बी काठअ अर तेऊ निं मेरी परज़ा डेऊणैं दैणअ।
22“तेखअ बोलै तूह तेऊ लै कि हुंह बिधाता बोला इहअ, ‘इज़राईली मणछ आसा मेरै ज़ेठै शोहरू ज़िहै। 23मंऐं किअ त ताल्है इहअ हुकम कि इना छ़ाड पोर्ही, ताकि ईंयां मेरी च़ाकरी करी सके। पर तंऐं निं मेरअ हुकम मनअ! ऐबै लाऐ मंऐं तेरै सोभ ज़ेठै शोहरू मारी।’”#लुआ. 12:29
सपोरे शोहरूओ खतैर करनअ
24एकी धैल़ै हुअ इहअ कि मोसा त बाता किधी सराईं दी बैल़ी रहअ द, बिधाता आअ तिधी तेऊ सेटा संघा हेरअ त सह मारी लाई।
25मोसे लाल़ी सपोरा किअ आपणैं शोहरूओ तिछै पात्थरा करै गुप्त आंगे खाल काटी खतैर, संघा शोटी सह खाल इहअ बोली खूरा प्रैंदा लै, “एऊ लोहू करै हणीं तेरी फाज़त।”
26तेखअ निं सह बिधाता मारी। खतैर करनै बाद बोलअ सपोरा, “खतैर करनै बाद निं ताह ऐबै किछ़ै हंदअ।”
हारण डेऊअ मोसा सेटा बाता तैणीं
27बिधाता छ़ाडअ हारण मोसा सेटा लै बाता तैणीं शुन्नैं रेगीस्ताना लै। हारण अर मोसा हुऐ सीनाई धारा#4:27 सीनाई धारा इब्रानी बोली दी आसा लिखअ द “परमेशरे धारा” कठा संघा दैनी दुही एकी-दुजै लै च़ुंज़ी-माख्खी अर मल़्हैची।
28मोसा खोज़ी हारणा का तिंयां सारी गल्ला ज़ुंण बिधाता तिन्नां लै बोलअ त करना लै, तेखअ ज़ुंण बिधाता च़मत्कार अर नछ़ैण रहैऊंणैओ बल तिन्नां लै दैनअ त, तेते बारै बी खोज़अ।
29खिरी पुजै मोसा अर हारण दुहै ज़ण्हैं मिसर देशै आपणैं इज़राईलीए सैणैं सेटा, 30हारणै खोज़ी तिंयां सारी गल्ला तिन्नां का ज़ेता बोल्दअ बिधाता मोसा थिअ छ़ाडअ द। संघा रहैऊऐ तिन्नां का च़मत्कार अर नछ़ैण बी।
31इज़राईली मणछै किअ तिन्नां दुहीए गल्लो विश्वास संघा टेक्कअ तिन्नैं बिधाता सेटा उटी बाखा माथअ कि ऐबै हेरै बिधाता म्हारै दाह-दुख भाल़ी अर तेऊ हेरनी ऐबै म्हारी मज़त करी।#लुआ. 3:15,18
Currently Selected:
लुआह 4: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
