लुआह 3
3
परमेशरै छ़ाडअ मोसा मिसर देशे राज़ै सेटा समादा पजैल़अ
1मोसा रहअ आपणैं शौहरै च़ितरुए भेडा-बाकरी फुआल लागी ज़ुंण तिधी मिद्यान प्रोहत थिअ। मोसा निंईं भेडा-बाकरीए हेल़्ह परमेशरे होरेब धारा सेटा ज़ुंण उज़र रेगीस्तानै पछ़मा बाखा थिई।
2तिधी हुअ ज़ल़दै कांडे झ़ाकल़ा दी बिधातो एक स्वर्ग दूत प्रगट। मोसा भाल़अ दूरा का ज़िहअ उझै कि झ़ाकल़ै आग ता आसा लागी दी पर दझ़दअ निं सह आथी।#मार्क. 12:26; लूक. 20:37
3तेखअ किअ मोसा इहअ बच़ार, “एता नेल़ डेऊई भाल़ूं एऊ च़मत्कारा कि अह झ़ाकल़ दझ़दअ किल्है निं आथी।”#शधा. 7:30,31
4ज़ांऊं बिधाता भाल़अ कि मोसा फिरअ तेता भाल़अ पिछ़ू, तेखअ बोलअ परमेशरै झ़ाकल़े आगी मांझ़ा का, “हे मोसा, मोसा, ए मोसा,” मोसा बोलअ, “हुकम मेरै मालक।”
5परमेशरै बोलअ मोसा लै, “इधी निं नेल़ एछै, आपणैं खूरे पोलल़ै खोल्ह पोर्ही, ज़िधी तूह खल़्हुअ द आसा सह ज़ैगा आसा पबित्र।#शधा. 7:33 6हुंह आसा सह परमेशर ज़हा तेरै दाद-बाब आबराम, इसहाक अर याकब मना तै।”
मोसा डरअ परमेशरा बाखा भाल़णैं का अर तेऊ ढोपअ आपणअ मुंह। #मोत्त. 22:32; मार्क. 12:26; लूक. 20:37
7तेखअ बोलअ बिधाता मोसा लै, “मंऐं भाल़ै कि मेरै आपणैं लोग मिसर देशै गलामी दी किहै दाह-दुख ज़िरदै आसा लागै दै। ज़ेऊ साबै तिन्नां संघै बर्ताअ आसा हंदअ लागअ द, तेता लै आसा तिंयां मुखा लैल़-पकार पाई मज़त मांगदै आसा लागै दै, मुखा आसा तिन्नें दाह-दुखो थोघ, 8तैही होथअ हुंह उंधै कि तिन्नां मिसरी लोगा का छ़ड़ैऊई आणू।
“मुंह काढणैं आपणैं लोग मिसर देशा का तेऊ रज़दै-पज़दै देशा लै ज़िधी रज़दी-पज़दी ज़िम्मीं #3:8 रज़दी-पज़दी ज़िम्मीं ज़िधी दुधा-घिऊए गाडा बगाज़ैगा आसा, मतलब तैहा ज़ैगा ज़िधी, कनानी, हित्ती, अमोरी, परिजी, हिब्बी अर जबेशी आसा बस्सै दै।
9“मेरै लोग आसा मुखा मज़ती लै लैल़ा लांदै लागै दै अर मंऐं हेरअ भाल़ी कि मिसरी लोग इज़राईली किहै हारदै-मारदै आसा लागै दै। 10ऐबै लाअ मंऐं तूह मिसर देशे माहा राज़ै सेटा लै छ़ाडी कि तूह मेरी इज़राईली परज़ा मिसर देशा का छ़ड़ैऊई आणे।”#शधा. 7:34
11इहअ शूणीं बोलअ मोसा परमेशरा लै, “हुंह कुंण आसा ज़ुंण मिसर देशे माहा राज़ै सेटा डेओए अर तेरै इज़राईली मणछा मिसर देशा का काढी सके?”
12तेखअ बोलअ परमेशरै मोसा लै इहअ, “ऐहा गल्लो डाह तूह निहंचअ हुंह रहणअ ताह संघै आप्पू। ताह छ़ाडणैं आल़अ आसा हुंह एतो थोघ लागणअ ताखा तेभै, ज़ेभै ताह मेरै लोग मिसर देशे गलामी का छ़ड़ैऊई आणनैं, तेखअ करनी तिन्नां एऊ ई देशै एछी मेरी च़ाकरी।”#शधा. 7:7
13मोसा पुछ़अ परमेशरा का, “हुंह बोलूं इज़राईली सेटा डेऊई इहअ कि थारै दादा-बाबे परमेशरै छ़ाडअ हुंह तम्हां सेटा लै, पर ज़ै तिंयां इहअ पुछ़े कि तेऊ परमेशरो नाअं किज़ै आसा? तेभै हुंह किज़ै खोज़ूं?”#लुआ. 6:2,3
14-15परमेशरै बोलअ मोसा लै, “हुंह आसा सदा रहणैं आल़अ, तूह बोलै इज़राईली लै, हुंह छ़ाडअ तेऊ बिधाता तम्हां सेटा लै ज़सरअ नाअं ‘हुंह आप्पै’ आसा अर ज़हा थारै दाद-बाब आबराम, इसहाक अर याकब मना तै। #प्रका. 1:4,8; 4:8; 11:17
“मेरअ अह नाअं आसा सदा लै अर अह आसा सह नाअं ज़ुंण सोभी लोगा एभा पोर्ही बोल़णअ ज़रूरी आसा।#मोत्त. 22:32; मार्क. 12:26
16“तिन्नां सेटा डेऊई कर तूह इज़राईलीए सोभै सैणैं कठा, संघा बोलै तिन्नां लै इहअ कि थारै दाद-बाब आबराम, इसहाक अर याकबे बिधाता बोलअ मुल्है दर्शण दैई कि तम्हां संघै ज़ुंण घोर बूरअ बर्ताअ मिसर देशै आसा हंदअ लागअ द सह हेरअ मंऐं भाल़ी।
17“मंऐं सोठअ तम्हां लै ऐबै इहअ कि तम्हैं निंणै मुंह मिसर देशे दुख तकलिफी का दूर काढी तेऊ देशा लै ज़िधी कनानी, हित्ती, अमोरी, परिजी, हिब्बी अर जबेशी आसा बस्सै दै। तिधा लै ज़िधी खास्सी रज़दी-पज़दी ज़िम्मीं-ज़ैगा आसा।
18“तेखअ हेरनी इज़राईली सैणैं तेरी गल्ला मनी। इज़राईली सैणैं आप्पू संघा निंईं करै मिसर देशे माहा राज़ै सेटा डेऊई बोलै तेऊ का इहअ, ‘बिधाता ज़ुंण इब्रानी लोगो परमेशर आसा हाम्हां हुऐ तेऊए दर्शण, म्हारी आसा ताखा एही अरज़ कि हाम्हां दै तेऊ परमेशरा लै बल़ीदान करना तेऊ शुन्नैं रेगीस्ताना लै डेऊणैं ज़िधी पुजणा लै पैदल चअन धैल़ै लागा।’
19“मुखा आसा थोघ कि मिसर देशे राज़ै निं तम्हां डेऊणैं दैणअ, ज़ांऊं तैणीं हुंह आपणैं हाथै ज़ोरा ज़ोरी निं काढूं।#लुआ. 5:2 20मुंह करनै मिसरी लोगा मांझ़ै आपणीं ज़बर शगती करै सोभी रंगे च़मत्कार अर सह देश पाणअ मुंह मर्दअ, तेखअ दैणअ तेऊ तम्हां तिधा का डेऊणैं।
21“मिसर देशे लोगा लै सज़ा दैणैं का बाद डरनै तिंयां तम्हां का अर ज़िहअ तम्हैं मांगे तिन्नां दैणअ तम्हां इज़राईली लै तिहअ। तम्हैं आसा मेरै आपणैं लोग, ज़ेभै तम्हैं मिसर देशा का निखल़े मुंह दैणअ तम्हां तिधा का कई च़िज़ा आप्पू संघै निंणै।#लुआ. 12:35,36
22“इधी तैणीं कि हर इज़राईली बेटल़ी डेऊणीं आप्पू नेल़ रहणैं आल़ी मिसरी बेटल़ी सेटा लै या कोही बी मिसरी बेटल़ी सेटा लै ज़ुंण तिन्नें घअरै रहा। तिन्नां मांगणै तिन्नां का सुन्नैं-च़ंदीए हार-शंगार अर बधिया का बधिया झिकल़ै। मिसरी लोगा हेरनै तम्हां लै दैई अर तम्हैं बन्हैऊंऐं तिन्नां आपणैं शोहरू-माठै का। तम्हां निंणीं ईंयां सोभै च़िज़ा आप्पू संघै ज़ेभै तम्हैं मिसर देशा छ़ाडी निखल़ै।”
Currently Selected:
लुआह 3: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
