लुआह 35
35
बशैघो बधान
1मोसा किअ इज़राईलीए सोभी टोलीओ झाल़अ, संघा ज़िहअ बिधाता बोलअ त, सह खोज़अ तिन्नां का, “बिधाता बोला इहअ, 2‘होरी काम-काज़ करना लै आसा तम्हां लै हर हबतै छ़ह धैल़ै। पर सातुई धैल़ी डाहै मुंह बिधाता लै पबित्र बशैघे धैल़ी। ज़ुंण तैहा धैल़ी काम करे सह पाणअ मारी।#लुआ. 20:8-11; 23:12; 31:15; 34:21; लेब. 23:3; बधा. 5:12-14 3इधी तैणीं कि बशैघे धैल़ी निं आपणैं-आपणैं गेठै आग बी ज़ाल़ी।’”
पबित्र खिम्भा लै भैंट
(लुआह 25:1-9; 35:10-19)
4मोसा खोज़अ इज़राईलीए सोभी टोली का, “बिधाता बोला इहअ, 5‘ज़िहअ थारअ दिल बोले, तेऊ साबै आणै तम्हैं बिधाता लै किज़ै नां किज़ै भैंट। तम्हैं सका सुन्नअ, च़ंदी, कांस्सअ, 6निली, बैंज़णीं अर लाला रांगे ऊना करै बूणै दै बाछे झिकल़ै, शेली, 7लाला रांगा करै रांगी दी गाभूए खाला, बाकरे खाला, किक्करे काठ, 8सदीऐ लै जैतूनो तेल, अभिषेक करनैओ तेल अर धूपा लै खुशबूदार च़िज़ा, 9माहा प्रोहते च़ौकी अर सदरी लै सुलैमानी किम्मती पात्थर अर तेता लाणा लै गूंद आणी।
10“‘ज़ै तम्हां मांझ़ै किज़ै काम करनअ ज़ाणा, तिंयां एछे पबित्र खिम्भे तिन्नां च़िज़ा बणाऊंदै ज़ेता लै बिधाता हुकम आसा किअ द, 11पबित्र खिम्भ, तेते च़ादरा अर सारै कणिच़ू, फल़्है, शौर, थाम्ह अर खुर्शी। 12मणशू अर तेते लोहल़ी, प्राश्त करनैओ ढक्कण, पबित्र अर खास पबित्र ज़ैगा मांझ़ा लै पल्दअ। 13मेज़, तेते लोहल़ी, भोज़न अर तेता प्रैंदो सारअ समान। 14प्रैश्शै करना लै च़ोखै सुन्नेंओ सदीअ, तेता लै तेल अर तेतो समान, 15सुन्नैं करै महल़ी दी धूप बेदी अर तेता च़कणें लोहल़ी, धूप, अभिषेक करनैओ तेल, पबित्र खिम्भे प्रऊल़ी लै पल्दअ, 16हूम बल़ी करने बेदी अर तेते कांस्से ज़ाल़ीदार झ़ालर, तेते लोहल़ी अर बाकी समान, कल़ाह अर तेतो बठैल़णू, 17थाम्ह तेते खुर्शी अर तेते पल्दै, प्रऊल़ीए पल्दै, 18खुंढी, खिम्भ अर ताटीए बिणगा लै राश्शी। 19खिरी पबित्र खिम्भा दी प्रोहते कामां करना लै हारण अर तेऊए शोहरू लै बूणती पाऐ दै झिकल़ै।’”
बिधाता लै भैंट
20ज़ांऊं मोसा इना गल्ला खोज़ी मुक्कअ, तेखअ डेऊऐ इज़राईली टोलीए सोभै लोग आपणैं-आपणैं डेरै लै। 21तेखअ ज़ुंण खुशी-खुशी बिधाता लै भैंट दैणीं च़ाहा तै, तिंयां लागै बिधाता लै मेल़-ज़ोल़े खिम्भा बणाणां लै भैंट आणदै। तिन्नैं आणी तिंयां सोभै च़िज़ा ज़ुंण पबित्र खिम्भा दी पूज़ा अर प्रोहते झिकल़ै बणाणां लै लोल़ी ती। 22मर्ध, बेटल़ी आऐ खुशी-खुशी अर तिन्नैं किऐ कई रंगे सुन्नें गैहणैं, फुल्ली, बाल़ू, कांगणूं अर हार बिधाता लै भैंट। 23ज़हा-ज़हा का निलै, बैंज़णीं अर लाला रांगा करै रांगी दी ऊना करै बाछे लांघा, शल़ैप्पै, गाभ-बाकरे खाला थिई तिन्नें किई तिंयां भैंट। 24तेखअ ज़हा का च़ंदी, कांस्सअ अर किक्करे काठ थिऐ, तिन्नैं किऐ तिंयां बिधाता लै भैंट।
25ज़ुंण बेटल़ी ऊन ज़ाणा ती काती, तिन्नें आणी निली, बैंज़णीं अर लाल बाछे ऊन काती। 26तेखअ ज़ुंण सज़ाण बेटल़ी शेली ज़ाणा ती काती, तिन्नैं आणी शेली काती। 27इज़राईली सैणैं आणै माहा प्रोहते च़ौकी अर सदरी लै सुलैमानी किम्मती पात्थरे मणीं अर तेता लाणा लै गूंद, 28धूपा बणाणां लै खुशबूदार च़िज़ा, दीऐ ज़ाल़णा अर अभिषेक करना लै जैतूनो तेल। 29बिधाता मोसा का ज़हा-ज़हा च़िज़ा बणाणां लै बोलअ त, तेता लै आणी इज़राईलीए खास्सै मर्ध अर बेटल़ी तिंयां च़िज़ा खुशी-खुशी भैंट।
बसलेल अर ओलाब पबित्र खिम्भे कारीगीर
(लुआह 31:1-11)
30तेखअ बोलअ मोसा इज़राईली लै, “ऊरीओ शोहरू अर हूरो पोचअ बसलेल छ़ांटअ बिधाता यहूदा गोत्रा का पबित्र खिम्भा बणाणां लै कारीगीर। 31-33बिधाता दैनी तेऊ लै आपणीं आत्मां अर तेऊ लै दैनी एही समझ़ कि सह बणाअं इहअ सज़ाण कारीगीर कि सह सका सुन्नैं, च़ंदी, कांस्सअ, किम्मती पात्थर अर काठे सोभी च़िज़ा दी खेल़्तर पाई बणाईं। 34तेऊ संघै साथी छ़ांटअ दान गोत्रा का आहीसामको शोहरू ओलाब, इना दुही शखैल़णै होर बी। 35इना दुही लै दैनी बिधाता एही अक्ल कि ईंयां आसा हर रंगे कारीगीरी लै सज़ाण, ईंयां सका काठ, पात्थर अर धातू दी खेल़्तर पाई, निली अर बैंज़णीं अर लाला रांगे ऊन बूणी सका बाछे झिकल़ै बणाईं।”
Currently Selected:
लुआह 35: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
