लुआह 34
34
दस हुकम लिखी दी दूई नऊंईं शिला
(बधान 10:1-5)
1एकी धैल़ै बोलअ बिधाता मोसा लै भिई इहअ, “ज़ेही मंऐं ताल्है पात्थरे शिला बणाईं दैनी ती, तेही काट दूई होर शिला, हुंह लिखूं तेथ तेऊ बधाना भिई ज़िहअ मंऐं तिन्नां शिला दी लिखअ त ज़ुंण तंऐं फाल़ी पाई। 2तूह रह दोत्ता लै तैर्हुई, संघा लोल़ी तूह उझै सीनाई धारा प्रैंदै मुंह सेटा लै आअ। 3पर ताह पिछ़ू निं हेरे उझै धारा प्रैंदा लै होर कोहै लोल़ी आअ, हेल़्ही का बी निं लोल़ी कसरै डागै चैणें बी ऐहा धारा गोधै च़रदै आऐ।”
4तेखअ बणाईं मोसा बडै शाफल़ा काटी तेही ई दूई शिला ज़ेही तिंयां पैहली शिला थिई। तेखअ डेऊअ दोत्ती-दोत्थी तिन्नां शिला संघा पाई उझै सीनाई धारा प्रैंदा लै, ज़िहअ तेऊ लै बिधाता हुकम किअ त।
5बिधाता आअ धारा प्रैंदै बादल़ा जैंदरी उंधै संघा खल़्हुअ तिधी मोसा सेटा तेखअ खोज़अ परमेशरै आपणअ पबित्र नाअं “बिधाता।” 6तेखअ लागअ बिधाता मोसा आजू बाती हांढदअ संघा बोलअ इहअ, “हुंह आसा परमेशर बिधाता, हुंह आसा झणैल़ू अर हुंह निं आपणैं लोगा लै छ़ेक्कै रोश्श करदअ। हुंह करा झ़ूरी अर सत्त आसा हुंह ई।#लुआ. 20:5,6; गण. 14:18; बधा. 5:9,10; 7:9,10
7“ज़ुंण मंऐं बोली हेरअ सह आसा अटल़, पर ज़ुंण पाप करा, तिन्नां निं हुंह सज़ा दैणैं बाझ़ी छ़ाडदअ। ज़ेभै कुंण मणछ पाप करा तेऊ कशूरे सज़ा दैआ हुंह तिन्नें शोहरू, पोचै अर तिन्नें पल़पोचै लै बी।”
8मोसा टेक्कअ उटअ पल़ी बिधाता सेटा माथअ। 9संघा किई एही अरज़, “हे बिधाता, मेरै मालक, ज़ै तूह मुल्है खुश आसा, तै आसा ताखा मेरी एही अरज़ कि तूह रहै हाम्हां संघै। अह गल्ल ता आसा कि ईंयां लोग आसा हठू अर पापी, पर म्हारै पाप कर माफ अर हाम्हैं लोल़ी सदा तेरै आपणैं लोग रहै बणी।”
अटल़ करार अर तेते मांग
(लुआह 23:14-19; बधान 7:1-5; 16:1-17)
10बिधाता बोलअ मोसा लै, “मेरी आसा ताल्है अह करार कि तेरै सोभी लोगा सम्हनै करनै मुंह इहै च़मत्कार ज़ुंण पृथूई दी आझ़ तैणीं कधि निं हुऐ। ज़िधी तूह रहा, तेता ओरी-पोरीए देशे लोगा बी जाणअ थोघ लागी कि ईंयां महान काम किऐ मंऐं बिधाता। 11अमोरी, कनानी, हित्ती, परिजी, हिब्बी अर जबेशी लोग काढणैं मुंह दरल़ाऊई, पर तम्हां हुअ तिहअ करनअ ज़िहअ मंऐं आझ़ तम्हां लै हुकम किअ। 12ज़ेऊ देशा लै तम्हैं आसा च़ाल्लै दै, तिन्नां मणछा संघै निं किज़ै करार करदै लागी। ज़ै तम्हैं करे सह हणीं तम्हां लै फाही। 13एता का करै इहअ कि तिन्नें बेदी, पात्थरे ओडै ज़ेता तिंयां पूज़ा अर अशेरा देबीए लाम्मै डौंडा पाऐ ढोल़ी।#बधा. 16:21 14तम्हैं निं कहा होरी देअ-देबी सेटा माथअ टेक्की, किल्हैकि हुंह बिधाता निं मेरी ज़ैगा कहा होरी मंदअ। 15तिन्नां मणछा संघै निं किछ़ै करार करी, इहअ निं हआ कि तूह लागे तिन्नें देअ-देबीए पूज़ा करदअ अर तिन्नें बल़ीदान किऐ दै पशूए शकना खांदअ। 16तेखअ निं किधी इहअ हआ कि थारै शोहरू करे तिन्नें शोहरी संघै बैह अर तिंयां शोहरी पाए तिन्नां आप्पू पिछ़ू आपणैं देअ-देबी पूज़दै। 17तम्हैं निं देअ-देबते मैहरै बणाऊंदै लागी।#लुआ. 24:4; लेब. 19:4; बधा. 5:8; 27:15 18च़ैत्रे भिन्नैं निं तम्हैं आखरी रोटीओ थैर मनाऊंणअ बिस्सरुई। ज़िहअ मंऐं तेतो बधान आसा खोज़अ द, तेही ई खाऐ साता धैल़ै तैणीं बाझ़ी सज़ेल़े रोटी, किल्हैकि एऊ भिन्नैं आसा तम्हैं नऊंऐं संबते धैल़ी मिसर देशे गलामी का निखल़ै दै।#लुआ. 12:14-20; लेब. 23:6-8; गण. 28:16-25 19तम्हां मांझ़े ज़ेठै मर्ध आसा मेरै अर थारै बाछ़ू, मिम्मूं अर छ़ेल्हू मांझ़ै पैहलै सोए हुऐ दै डागै-चैणैं बी आसा मेरै।#लुआ. 3:2
20“तम्हैं सका पैहलै सोए हुऐ दै गाधै बच़ाऊंणे बदल़ै मिम्मूं बल़ीदान करी, ज़ै नांईं, तै सका तम्हैं तेऊ गाधै बल़ीदान करी। पर आपणैं सोभी ज़ेठै शोहरू लऐ बदल़अ दैई ज़रूर बच़ाऊई। ज़ेभै तम्हैं मुंह सेटा लै एछे, तेभै लऐ मुल्है भैंट ज़रूर आणी।#लुआ. 13:13 21छ़हा धैल़ी करै काम पर सातुई धैल़ी करै बशैघ, च़ाऐ तिंयां खेचा लऊंणे अर बऊंणे धैल़ै किल्है निं होए।#लुआ. 20:9,10; 23:12; 31:15; 35:2; लेब. 23:3; बधा. 5:13,14 22ज़ेभै तम्हैं खेचै दाची लाई लऊंणीं शुरू करे, तेभै मनाऊंऐं सलहरीओ थैर, खिरी ज़ांऊं तम्हैं फल़ कठा मुक्के करी, तेभै मनाऊंऐं छ़ानींओ थैर।#लेब. 23:15-21; 23:39-43; गण. 28:26-31 23साला दी लोल़ी थारै मर्ध चिई बारी मुंह सेटा माथै टेक्कदै आऐ, किल्हैकि हुंह आसा इज़राईलीओ परमेशर बिधाता। 24मुंह बिधाता काढणैं थारी ज़ैगा का पराई ज़ातीए लोग दूर अर थारै देशे सिअं करनी मुंह खास्सी बडी। एता करै हणअ इहअ कि ज़ेभै तम्हैं साला दी चिई बारी इना थैरा दी मुंह सेटा माथअ टेक्कदै एछे, तेभै निं कोहै थारै देशा गिम्मदअ एछणअ। 25ज़ेभै तम्हैं बेदी दी बल़ीदान करे तेभै निं तेता संघै सज़ेल़ै संघै बणाईं दी रोटी भैंट करी। नां ऊवार्णे थैरे रोटी दुजै धैल़ै लै डाही।#लुआ. 12:10
26“हुंह आसा बिधाता थारअ परमेशर, आपणीं पज़ैआ मांझ़ै आणै तम्हैं तेतो पैहलअ भाग मेरी पबित्र ज़ैगा लै।
“छ़ेल्हूए शिखा निं बाकरीए दुधा जैंदरी सटेऊई।”#बधा. 26:2; 14:21
27बिधाता बोलअ मोसा लै कि इना गल्ला डाह तूह लिखी, एऊ लिखै दै बधाना संघै हणीं इज़राईली मणछा लै मेरी करार।
28मोसा रहअ धारा प्रैंदै च़ाल़्ही धैल़ी अर च़ाल़्ही राची बिधाता संघै। इना एतरै धैल़ै निं तेऊ किछ़ खाअ पिअ आथी। तेऊ लिखी बधाना मांझ़ै परमेशरे करारे खास दस हुकम तिन्नां पात्थरे शिला दी।
मोसा होथअ धारा का उंधै
29मोसा च़की तिंयां दूई पात्थरे शिला आप्पू संघै ज़ेथ तिंयां दस हुकम थिऐ लिखै दै, संघा होथअ सीनाई धारा का उंधै। बिधाता संघै गल्ला करी थिअ तेऊए मुंहां का धुप्पअ लागअ द। पर तेऊ का निं थोघै आथी त कि तेऊए मुंहां का आसा धुप्पअ लागअ द।#2 करि. 3:7-16
30ज़ांऊं हारणै अर होरी इज़राईली बी मोसा बाखा भाल़अ, तिन्नैं भाल़अ कि तेऊए मुंहां का आसा धुप्पअ लागअ द अर तिन्नां लागी तेऊ सेटा डेऊंणा लै डअर। 31तेखअ शादै मोसा हारण अर इज़राईली टोलीए सैणैं आप्पू सेटा लै संघा लागअ तिन्नां का गल्ला खोज़दअ। 32तेखअ झाल़्हुऐ होर इज़राईली मणछ बी मोसा फेर, तेखअ खोज़अ मोसा सह सारअ बधान तिन्नां सोभी का ज़ुंण बिधाता धारा प्रैंदै मोसा का दैनअ त।
33मोसे मुंहां का थिअ अज़ी बी धुप्पअ लागअ द, ज़ेभै तैणीं मोसा तिन्नां संघै गल्ला करी निं मुक्कअ, तेभै तैणीं डाहअ मोसा आपणैं मुंडा उंधै च़ादरू पाई। 34ज़ेभै मोसा पबित्र खिम्भा भितरी बिधाता सेटा गल्ला करदअ डेओआ त, तेभै काढा त कबल्लअ सह तेऊ च़ादरू मुंडा का पोर्ही, तेखअ खोज़ा त सह बागै एछी इज़राईली मणछा का सारी गल्ला कि बिधाता किज़ै बोलअ। 35इज़राईली का शुझिआ त इहअ कि मोसे मुंहां का आसा धुप्पअ लागअ द। तेखअ ज़ेभै तैणीं मोसा बिधाता सेटा खिम्भा भितरी गल्ला करदअ निं डेओआ त, तेभै तैणीं डाहा त तेखअ सह तेऊ च़ादरू मुंडा उंधै पाई।
Currently Selected:
लुआह 34: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
