लुआह 20
20
बिधाते दस हुकम
(बधान 5:1-21)
1बिधाता बोलअ इज़राईली लै इहअ, 2“हुंह आसा थारअ परमेशर सह बिधाता ज़ुंणी तम्हैं मिसर देशे गलामी का आणै छ़ड़ैऊई।
3“मुंह छ़ाडी निं कहा होरी आपणअ परमेशर मनी।
4“सरगै, पृथूई या धरतीए पाणीं दी निं तम्हैं कोहिए शक्ला ज़ेही मुहुर्ती या मैहरै बणाईं। 5नां तिन्नां मुहुर्ती अर मैहरे पूज़ा करी अर नां तिन्नां सेटा माथअ टेक्की। थारअ परमेशर आसा हुंह बिधाता अर हुंह च़ाहा इहअ कि तम्हैं लोल़ी सिधै मेरै हुऐ। ज़ुंण मुल्है नफरत करा, तिन्नां लै दैआ हुंह सज़ा। तिन्नें लागा शोहरू, पोचै, पल़पोचै अर च़ौथी पोस्ती तैणीं आपणैं दादा-बाबे सज़ा भुगतणी।#लुआ. 34:17; लेब. 19:4; 26:1; बधा. 4:15-18; 27:15
6“पर ज़ुंण मुल्है झ़ूरा अर मेरअ बधान मना, तेऊ लै रहा मेरी झींण अर झ़ूरी हज़ारो पोस्ती तैणीं।#लुआ. 34:6,7; गण. 14:18; बधा. 7:9,10
7“मेरै नाओंआं निं तम्हैं कज़ेही#20:7 कज़ेही मतलब, ज़ुठअ बोली बिधाते कसम खाणीं, बाहिदअ करी हुधणअ, हर गल्ला लै बिधातो नाअं इहअ लणअ कि सह आसा थारै बशै, लई, हुंह आसा थारअ परमेशर बिधाता, ज़ुंण मेरअ नाअं कज़ेही लआ, तेऊ लै दैआ हुंह सज़ा।#लेब. 19:12
8“ऐहा गल्ला डाहै तम्हैं आद कि बशैघे धैल़ी आसा मुंह बिधाता लै पबित्र।#लुआ. 16:23-30; 31:12-14
9“तम्हां लै आसा होरी कामां करना लै हर हबते छ़ह धैल़ै, 10पर हर हबते सातुई धैल़ी आसा मुंह थारै परमेशर बिधाता लै बशैघ। ऐहा धैल़ी निं तम्हैं कोह किछ़ै काम करी, नां तम्हैं, नां थारै शोहरू-माठै, नां थारै गलाम, नां थारै डागै धअण अर नां कुंण पाखलअ परदेसी ज़ुंण थारी नगरी रहा।#लुआ. 23:12; 31:15; 34:21; 35:2; लेब. 23:3
11“छ़हा धैल़ी बणाऐं मंऐं बिधाता सारअ सरग, पृथूई, समुंदर अर तेते सोभै गल्ला अर सातुई धैल़ी किअ मंऐं बशैघ। तैही दैनी मंऐं बशैघे धैल़ी लै बर्गत अर अह धैल़ी आसा मंऐं आप्पू लै पबित्र डाही दी।#मूल. 2:1-3; लुआ. 31:17
12“आपणैं ईजा-बाबो करै अदर, तेता करै हणीं थारी तैहा ज़ैगा खास्सी अमर ज़ुंण ज़ैगा मुंह बिधाता तम्हां लै दैणीं।#बधा. 27:16; मोत्त. 15:4; 19:19; मार्क. 7:10; 10:19; लूक. 18:20; इफि. 6:2,3
13“हत्या निं करी।
14“आपणीं बेटल़ी छ़ाडी होरी संघै सुत्ती कंज़रैई निं करी। #मूल. 9:6; लेब. 20:10; 24:17; मोत्त. 5:21,27; 19:18; मार्क. 10:19; लूक. 18:20; रोम. 13:9; याक. 2:11
15“च़ोरी निं करी।#लेब. 19:11
16“होरीए बारै निं झ़ुठी शाजत दैई।#लुआ. 23:1
17“होरीए च़िज़ो मांण निं करी कि सह लोल़ी तम्हां भेटी। नां कसरै घअरो, नां कसरी बेटल़ी-मर्धो, नां कसरै गलाम, नां कसरै बल्द, गाधै अर नां कसरी किज़ू होरी च़िज़ो मांण करी।”#रोम. 7:7; 13:9
सोभ लोग लागै डरै काम्बदै
(बधान 5:23-33)
18ज़ांऊं लोगा का गुल़ूबिज़ल़ूए ढिम्हां, बिज़ल़ीए च़पराल़ी, धूँ अर धारा प्रैंदै करनाल़ी बाज़णें छ़ेल़ शुण्हुंई, तिन्नां छ़ुटी डरै काम्मणीं अर तिंयां ठुर्है धारे गोधा का दूर ज़िहै। 19तिंयां लागै मोसा लै इहअ बोल्दै, “हाम्हां संघै कर तूह गल्ला, तेरी गल्ला हेरनी हाम्हां शूणीं, हाम्हां लागी एही डअर ज़ै परमेशर हाम्हां संघै गल्ला करे, हाम्हैं सका मरी!”#इब्रा. 12:18,19
20मोसा बोलअ तिन्नां लै इहअ, “तम्हैं निं डरदै लागा। परमेशर आसा सिधअ तम्हां परखदअ लागअ द, ताकि थारै मन्नैं तेऊए डअर रहे अर तम्हैं पाप नां करे।”
21ज़िधा का परमेशर गल्ला करदअ थिअ लागअ द, मोसा डेऊअ तेऊ घणैं बादल़ा नेल़ पर लोग रहै दूर ई खल़्हुई।
बेदी अर मैहरै
22बिधाता बोलअ मोसा लै, “इज़राईली मणछा लै बोल इहअ, ‘तम्हैं भाल़अ आपणीं आछी कि मंऐं किई तम्हां संघै सरगा का गल्ला, 23ऐबै निं तम्हैं मुंह बिधाता छ़ाडी होर सुन्नैं-च़ंदीए मैहरै बणाईं पूज़ा करदै लागी। 24मुल्है बणाऐं तम्हैं माट्टै करै एक बेदी, तेथ प्रैंदै करै आपणीं हेल़्ही का हूम बल़ी अर मेल़-ज़ोल़े चैणैं बल़ीदान।#20:24 मेल़-ज़ोल़ो बल़ीदान हआ त सुल्है करना लै, इहअ कि तेता निं पठी हूम करदै तै। तेते शिखा बांडा तै प्रोहता अर तिन्नां लै ज़ुंणी सह बल़ीदान भैंट किअ, अह बल़ीदान हअ त सुल्है करना लै अर एते बारै आसा लेबी बधाने कताबा दी चिऊथै धैऊआ लिखअ द ज़हा ज़ैगा बी हुंह तम्हां लै मेरी स्तोती करना लै छ़ांटूं, तिधी एछी दैणीं मुंह तम्हां लै बर्गत।
25“‘ज़ै तम्हैं बेदी पात्थरा करै बणांए, तेथ निं छ़िणीं करै काटी पात्थर लाई किल्हैकि ज़िधी तंऐं तेथ छ़िणीं लाई तेता करै हणीं बेदी छ़ोतली।#बधा. 27:5-7; ज़ैह. 8:31
26“‘एही बेदी निं बणाईं ज़ेथ प्रैंदै डेऊणा लै शिहल़ लागे लाणीं, किल्हैकि शिहल़ी बाती उझै उखल़दा सका तेरी देहीओ आंग हेठा का नांगअ शुझुई।’”
Currently Selected:
लुआह 20: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
