ज्ञैन 10
10
1ज़ेही खुशबूदार तेला जैंदरी धख ज़िहै म्हैछै मरी करै चजैन्ह लागा, तेही करा धख ज़ेही ऐडी गल्ल अक्ल अर अदर खतम।
2अक्ली आल़अ मणछ डेओआ राम्बल़ी बाता अर ऐडअ डेओआ उंबल़ी बाखा। 3ऐडै निं बाता हांढदी बी किछ़ सोर-समझ़ हंदी अर इहअ करै जाआ तेऊए कबुध सोभी का शुझुई।
4थारअ मालक तम्हां लै नराज़ बी होए, तैबी बी निं काम छ़ाडी, सबर करी हआ बडै-बडै पाप बी माफ।
5एऊ संसारै शुझुई मुखा एक होर गल्ल ज़ेथ नसाफ निं आथी, सह हआ मालके भूल-च़ूक। 6तिंयां बशैल़ा ऐडै मणछा बडी पदबी दी अर ज़ुंण मणछ तैहा पदबी जोगी हई सका त, सह करा तिन्नां उंधै काम! 7मंऐं भाल़ै गलाम घोल़े शुंआरी हांढदै अर बज़ीरे शोहरू गलामा ज़िहै पैदल हांढदै बी।
8ज़ुंण होरी लै खात्ती खण्हां सह पल़ा तेथ आप्पू! ज़ुंण दुआल ढोल़ी पाआ तेऊ लागा दानुईं करै डाम्ह। 9बडी टोल्हा अर गेल्ली बदल़दी सका तम्हां आप्पू बी ज़खम पल़ी! 10ज़ै तम्हैं ठुंढअ खराल़अ नांईं साज़े, तै लागा काटणा लै होर बी खास्सै ज़ाहण, पर अक्ली आल़ै मणछा का हआ थोघ कि किज़ै लागा करनअ। 11दानुईं ढाकणें बिक्री करनै का आजी ज़ै सह खाई हेरे, तेखअ निं तैहा बिक्री करनैओ किछ़ै नफअ हंदअ। 12ज़ेभै अक्ली आल़अ मणछ गल्ला करा, तेता करै हआ तेऊओ अदर, पर ऐडअ मणछ हआ तिन्नें आपणीं गल्ला करै बरैबाद। 13ऐडै करा शुरू ई ऐडी गल्ला का खिरी करा पठी बेगरी गल्ला। 14ऐडअ मणछ रहा बोल्दअ ई लागी, तज़ी बी निं कोही समझ़ एछदी कि आजू किज़ै च़ाल्लअ हई अर नां कहा का इहअ थोघ हंदअ कि तेता बाद किज़ै हणअ।
15ऐडअ जाआ धखी का थकी अर तेऊ निं नगरी लै आपणैं घअरा डेऊणे बातो बी थोघ हंदअ।
16देशा लै पल़ा तेभै आफ़त ज़ेभै तेऊ देशै लान्हअ राज़अ बणा अर बज़ीर धैल़-राच खांदै-पिंदै रहा बेशी। 17देश हआ सह ई सफल, ज़हा देशो राज़अ आपणैं बज़ीर अर कार-करिंदै आपणैं बशै डाहा, तिंयां खाआ-पिआ ठीक बगती ताकि तिन्नों बल बढे नां कि नशै दी रहै पल़ी।
18ज़ैऊंकर मणछे लुल़ा छ़ाप्परे छ़ैट्ठी बी उंधै अर सारै घअरै लागा च़ोईए छ़ल़छ़ल।
19धाम खाई हआ खुशी, दाखो रस झुटी करै एछा नंद अर ढब्बै करै जाआ सोभै गल्ला भेटी।
20राज़ै लै निं मन्नैं बी बूरअ सोठी, अर सेठ मणछे बारै निं आपणीं पांडा भितरी बी निंदा करी। होछ़अ ज़िहअ च़ेल्लू-पखीरू बी सका थारी गल्ला शूणीं अर तिन्नां का सारी गल्ला खोज़ी कि तम्हैं तिन्नें बारै किज़ै बोलअ!
Currently Selected:
ज्ञैन 10: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
