बधान 29
29
मोआब देशै करार
1मोसा मुक्कअ तिन्नां गल्ला इज़राईली का खोज़ी कि तिन्नां तैहा करारा पूरी करना लै किज़ै-किज़ै करनअ ज़ुंण करार बिधाता तिन्नां संघै मोआब किई ती अर एता का लाऊआ ज़ुंण करार बिधाता तिन्नां संघै होरेब धारा#29:1 होरेब धारा सीनाई धारा किई ती।
इज़राईली रहै करार पूरी करना लै शुचै-पाक्कै
2-3मोसा किअ सोभी इज़राईलीओ झाल़अ संघा बोलअ तिन्नां लै इहअ, “ज़धू तम्हैं मिसर देशै थिऐ, तधू भाल़अ तम्हैं आपणीं आछी कि बिधाता किहै-किहै महान च़मत्कार करी पाई मिसर देशे माहा राज़ै, तेऊए कार-करिंदै अर सोभी मिसर देशे लोगा लै आफ़त। 4-6बिधाता बोलअ त तम्हां लै इहअ बी, ‘च़ाल़्ही साला तैणीं नढैऊऐ मंऐं बिधाता तम्हैं उज़र रेगीस्तानै, तेथ नां थारै झिकल़ै पराणैं हुऐ अर नां थारै खूरे पोलल़ै धेल़्हुऐ! थारी भुखा लै बरशाऊअ मंऐं सरगा का खाण। मंऐं किई ईंयां गल्ला कि तम्हैं ऐहा गल्ला समझ़े कि हुंह आसा थारअ परमेशर।’
“पर ईंयां गल्ला ज़ुंण तम्हैं आझ़ तैणीं आपणीं आछी भाल़ी अर आपणैं कानै शूणीं, एता लै दैणीं ऐबै बिधाता तम्हां लै समझ़-बुध कि तम्हां असली दी ईंयां गल्ला समझ़ एछे कि एतो कै मतलब आसा।
7“ज़धू तम्हैं ऐहा ज़ैगा पुजी डेरै पाऐ, तधू छ़ेल़अ हेशबोन नगरीए राज़ै सिहोन अर बाशाने राज़ै ओगै तम्हां संघै जुध। पर तम्हैं ज़ितअ तिन्नां का जुध बी अर तिन्नें ज़ैगा बी गिम्मी#गण. 21:21-30-35 8अर सह ज़ैगा दैनी रूबेन, गाद गोत्रा लै। मनिश्शे गोत्रा दी आधै लोगा लै बी दैनअ तेऊ ई मुल्खै हेस्सअ।#गण. 32:33
करारा दी रहै पाक्कै टेक्की
9“इज़राईलीओ, बिधाता आसा तम्हां संघै करार किई दी, तम्हैं करै एते तिन्नां गल्ला पूरी ज़ुंण तम्हां लागा करनी, ताकि तम्हैं सोभी गल्ला दी सफल होए। 10-12आझ़ आसा तम्हैं सोभै गोत्र बिधाता सम्हनै खल़्हुऐ दै, एऊ झाल़ै दी आसा तम्हां इज़राईलीए सैणैं, पांच़, कार-करिंदै, बेटल़ी-माठै, होछ़ै-प्रोढै अर तिंयां परदेसी बी ज़ुंण हाम्हां लै पाणीं अर झ़ुका दैआ आणी। ऐहा पबित्र ज़ैगा आसा आझ़ म्हारअ अह झाल़अ एता लै हुअ द हाम्हां सोभी करनी सोह खाई सह करार पाक्की ज़ुंण म्हारै परमेशर बिधाता हाम्हां संघै किई, हाम्हां करनी तेथ आपणीं साझ़ पूरी।
13-15“ऐहा करारा दी आसा इहअ कि बिधाता आसा सोह खाऐ दै कि तम्हैं हणैं तेऊए आपणीं परज़ा अर सह हणअ थारअ परमेशर। तेऊ ती थारै दाद-बाब आबराम, इसहाक अर याकबा लै बी एही ई ज़बान दैनी दी अर आझ़ दैनी तेऊ सह ज़बान तम्हां लै। अह निं सिधी तम्हां ई लै आथी, अह आसा आजू थारी आद-लुआदा लै बी।
16-17“ज़धू हाम्हैं मिसर देशै रहा तै, तम्हैं आसा तिधी आपणीं आछी भाल़अ द कि मिसरी लोग काठा, पात्थरे, सुन्नैं-च़ंदीए बणाईं दी केही-केही मुहुर्तीए पूज़ा करा। मिसर देशा का इधी तैणीं बाता एछदी होरी देशे लोग बी भाल़ै तम्हैं कि तिंयां केही च़िल़्हखरी मुहुर्ती पूज़दै हआ लागै दै। 18पर तम्हैं डाहै आपणअ खैल हेरे, तम्हां मांझ़ै लोल़ी थारी सोभी टोली दी सोभै मर्ध-बेटल़ी, लान्हैं-प्रोढै बिधाता लै शुचै-पाक्कै रहै। इहअ निं हआ कि तम्हां मांझ़ै होरी देशे देअआ पूज़दै लागे, सह हणअ तम्हां जैंदरी नागदौणे ज़लैल़ै ज़िहअ ज़ेथ झ़रीलै फल़ लागा।#इब्रा. 12:15
“ज़ै तम्हां जैंदरी कुंण एक ज़ण्हअ बी इहअ मुहुर्ती पूज़ा करनै आल़अ होए, सह हणअ डाल़ा-बूटे इहै ज़लैल़ै ज़िहअ ज़ेता करै कल़ुऐ अर झ़रीलै फल़ लागा। 19सह इहअ मणछ च़ाऐ इज़राईली किल्है निं होए ज़हा का सोभी गल्लो थोघ आसा कि बिधाता आसा। पर ज़ै सह बिधाता संघै हठ करे, तै निं तेऊ बर्गत भेटणीं। सह मणछ सका इहअ सोठी कि आपणीं हठ पूरी करी निं तेऊ किछ़ै फरक च़ाल्लअ पल़ी, पर तेऊ पाणीं होरी इज़राईली लै बी आप्पू संघै सज़ा। 20इहै मणछा निं बिधाता माफ करदअ। तेऊ लै पल़णअ बिधातो कोप ज़ल़दी आगी ज़िहअ अर ज़ुंण आफ़ता अर फिटक बधाने कताबा दी आसा लिखै दै, तिंयां गल्ला रहणीं तेऊ लै हई, ज़ेभै तैणीं सह पठी खतम निं हुअ। 21बिधाता करनअ सह मणछ इज़राईले होरी गोत्रा का ज़ुदअ#29:21 गोत्रा का ज़ुदअ सह हणअ होरी लै बी सबक, ताकि सह तैहा करारे तिन्नां सोभी फिटका तेऊ लै पाए ज़ुंण बधाने कताबा दी आसा लिखी डाहै दै।
22“बिधाता पाणीं थारै देशै बमारी अर घोर आफ़ता। थारी आगली पोस्ती दी थारी आद-लुआदा अर दूर देशे लोगा बी भाल़णअ इहअ कि थारी ज़ैगा-ज़िम्मीं हुई उज़र। 23तेथ भर्हुअ गंधक अर लूंण! तेथ नां डाल़ बूट लागदै, नां किज़ै बऊई सकदै। इधी तैणीं कि तेथ निं घाह बी पज़दअ। सह ज़ैगा हुई एही नर्ज़ीब ज़िहै बिधाता सदोम, अमोरा, अदमा अर सबोईम नगरीए ज़िम्मीं-ज़ैगा संघी किऐ तै सोभै खतम।#मूल. 19:24,25
24“होरी देशे लोगा बी बोल़णअ इहअ, ‘बिधाता एऊ देशा लै इहअ किल्है किअ होए? इना लै बिधातो इहअ खास्सअ कोप किल्है पल़अ?’
25“तेतो दैणअ लोगा इहअ ज़बाब, ‘इहअ हणैं पिछ़ू आसा एही गल्ल कि मिसर देशा काढी बिधाता ज़ुंण करार इने दादा-बाबा संघै किई ती, तेतो बधान निं इनै तिहअ ई पूरअ किअ। 26ईंयां लागै बिधाता छ़ाडी होरी देअआ पूज़दै, ज़ेते इने दाद-बाब बी पाखलै थिऐ अर बिधाता ती इना तिहअ करना लै नांह किई दी। 27तैही पल़अ बिधातो कोप इना लै अर ज़ेतरै बी बधाने कताबा दी फिटक आसा लिखै दै, तिंयां पल़ै सोभ इना लै। 28बिधाता आअ रोश्शै इना लै इहअ कोप कि तेऊ काढै ईंयां इने ज़ैगा का गोधी का पोर्ही संघा शोटै होरी देशै ज़िधी तिंयां आझ़काला आसा रहंदै लागै दै।’
29“म्हारै परमेशर बिधाता निं आझ़ अर आजू हणैं आल़ी गुप्त गल्ला खोज़ी आथी, पर तेऊ आसा हाम्हां लै हुकम किअ द कि हाम्हैं तेऊओ बधान मने ज़ुंण तेऊ हाम्हां अर आजू म्हारी आद-लुआदा लै आसा दैनअ द।”
Currently Selected:
बधान 29: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
