बधान 28
28
बिधातो हुकम मनी भेटा बर्गत
1-2मोसा बोलअ इज़राईली लै इहअ, “इज़राईलीओ, ज़ुंण बिधाते बधान अर बिधी हुंह तम्हां का आझ़ खोज़ा, तम्हैं मनै तिन्नां सदा। तै बणाणैं बिधाता तम्हैं धरतीए सोभी लोगा का मशूर देश अर तेऊ दैणीं तम्हां लै हर गल्ला दी बर्गत।#बधा. 11:13-17
3“बिधाता दैणीं तम्हां लै थारै बपार अर खेचै बर्गत।
4“बिधाता दैणीं तम्हां लै एही बर्गत कि थारी हणीं खास्सी लुआद, खेचै हणीं खास्सी पज़ैआ अर थारै हणीं खास्सी डागै-चैणें हेल़्ही।
5“तम्हां लै हणीं एही बर्गत कि थारै फल़े च़ठै अर पिठै मुछ़णे कनाल़ी रहणीं सदा भरी।
6“तम्हैं ज़िधा लै बी डेओए अर ज़िहअ बी काम करे, तेथ दैणीं बिधाता तम्हां लै बर्गत।#28:6 घअरै अर बागै कामां दी
7“थारै दुशमण ज़ेभै तम्हां संघै जुधा लै एछे, तिंयां पाणै तम्हां हारी अर तिंयां ठुहर्नै तम्हां सेटा का सातै-बातै।
8“ज़ुंण ज़ैगा बिधाता तम्हां लै दैणीं, तेऊ करनै तम्हैं तैहा ज़ैगा हर कामां लै सफल अर तम्हां लै हणीं एही बर्गत कि थारी नाज़े कठैरी रहणीं सदा भरी।
9“ज़ै तम्हैं आपणैं बिधातो हर हुकम मने अर ज़िहअ सह बोले तम्हैं तिहअ ई करे, तै रहणैं तम्हैं सदा तेऊए पबित्र परज़ा, ज़िहअ बिधाता आप्पै आसा बोलअ द। 10तेखअ लागणअ धरती दी सोभी देशे लोगा का थोघ कि तम्हैं आसा बिधाते खास अर तिन्नां रहणीं थारी डअर।
11“ज़हा देशा तम्हां लै दैणें करार बिधाता थारै दादा-बाबा संघै आसा किई दी, तेऊ देशै दैणीं बिधाता तम्हां लै खास्सी बर्गत अर थारै हणैं खास्सै शोहरू-शोहरी, खास्सै डागै-चैणैं अर थारै खेचै हणीं खास्सी साल-फसल।
12“बिधाता घुआल़णै तम्हां लै सरगे तिंयां पाणींए भढार अर सरग रहणअ बगती-बगती हंदअ लागी अर तेऊ दैणीं थारै सोभी कामां लै बर्गत। तम्हैं हणैं इहै सेठ कि तम्हां दैणअ कई देशा लै ऋण पर तम्हां निं आप्पू लै कहा का ऋण काढणें ज़रुरत पल़णीं।
13“बिधाते ईंयां बधान अर बिधी ज़ुंण मंऐं आझ़ तम्हां का खोज़ै, ज़ै तम्हैं इना मने, तै बशैल़णै बिधाता तम्हैं होरी सोभी देशा का आजू बडी पदबी दी अर तेऊ निं तम्हैं पिछ़ू डाहणैं। तम्हैं निं तेऊ कमज़ोर अर गरीब डाहणैं, तेऊ बणाणैं तम्हैं बलबान अर सेठ।
14“पर तम्हैं डाहै सिधअ इहअ खैल कि बिधाते इना बधाना अर बिधी मनणा लै निं भूल-च़ूक करी ज़ेता हुंह तम्हां का आझ़ खोज़ा अर नां होरी देअआ पूज़दै लागी।
बिधातो हुकम नांईं मनी लागा फिटक
(लेबी बधान 26:14-46)
15“इज़राईलीओ, पर ज़ै तम्हैं बिधातो हुकम नांईं मने अर तेऊए सोभी बधान अर बिधी नांईं मने ज़ेता हुंह तम्हां का आझ़ खोज़ा, तै पल़णै तम्हां लै इहै फिटक:
16“थारै बपार अर खेचै निं किछ़ै बर्गत हणीं।
17“थारै फल़े च़ठै अर पिठै मुछ़णे कनाल़ी रहणीं सदा रित्ती।
18“थारी निं खास्सी लुआद हणीं, नां खेचै खास्सी पज़ैआ हणीं अर नां थारै हेल़्ही दी खास्सै डागै-चैणैं हणैं।
19“तम्हैं ज़िधा लै बी डेओए अर ज़िहअ बी काम करे, तेथ निं थारै कधि बर्गत हणीं।
20“तम्हैं ज़िधा लै बी डेओए अर ज़िहअ बी काम करे, तेथ निं तम्हैं सफल हणैं। बिधाता पाणअ तम्हां जैंदरी झाख अर तम्हां लै रहअणअ तेभै तैणीं फिटक पल़ी ज़ेभै तैणीं तम्हैं पठी खतम निं हई जाए। किल्हैकि तम्हैं हुऐ बिधाता का दूर हई कदुष्ट।
21-23“बिधाता पाणीं तेखअ तम्हां जैंदरी घोर दाह-बमारी#28:21-23 दाह-बमारी तलबार कि तम्हां निं उझ़ुई नां बेशी राम हणअ। तम्हां लै लागणीं शक्रैऊल़ी अर हारदअ-मारदअ ज़अर, शुआंण अर दाहे झोशा ज़ांऊं तैणीं तम्हैं तैहा ज़ैगा मूंऐं निं ज़ुंण बिधाता तम्हां लै दैणीं।
“बिधाता निं तेखअ सरग हणैं दैणअ, थारै मुंडा प्रैंदै हणअ सरग लोहै ज़िहअ लाल अर थारै खूरा हेठै धरती हणीं कांस्सै ज़ेही काठी। थारी सारी मैन्थ हणीं बृथा, पुर्बा बाखा तात्ती बागरी करै मछैणीं थारी साल-फसल बी अर तेथ लागणीं भुफी। 24बिधाता बरशाऊंणअ थारै देशै पाणींए बदल़ै रेत अर धूल़अ अर तम्हैं हणैं पठी खतम।
25“तम्हैं पाणै थारै दुशमणा हारी अर तम्हैं ठुहर्नै तिन्नां सेटा का सातै-बातै अर तम्हां लागणीं सोभी देशे लोगा का डअर। 26मरी करै हणैं थारी ल्हासा च़ोच़ल़दै काअ-कुक्कर अर भांती-भांतीए शकारी च़ेल्लू-पखीरू अर बणें शकारी ज़ीब लागै दै! तिन्नां निं कुंण पोर्ही छ़ेल़्हणै आल़अ हणअ!
27“बिधाता पाणीं तम्हां लै एही दाह बमारी ज़ुंण तेऊ मिसरी लोगा लै पाई ती। तम्हां निखल़णैं घेरी दुखणैं, घेरी दी खरोक्खणी, बाबासीर, फिमशी एही कि तेता का निं तम्हैं बिज़री सकदै! 28तम्हैं हणैं बेगरै अर थारी आछी का शुझणअ हणअ बंद। तम्हां लै पल़णअ घणअ दुख अर इहअ झाख कि 29तम्हैं हणैं धैल़ी दपहरै बी इहै कांणै मणछा ज़िहै बाता तोफदै लागै दै ज़हा का थोघ ई निं हंदअ कि राच आसा कि धैल़ी। तम्हैं निं कोही कामां लै सफल हणैं। बाकी ज़िन्दगी हणैं होर लोग तम्हां लुटदै अर च़िक्कदै मारदै, पर तम्हां निं तिन्नां का कुंण छ़ड़ैऊंणैं आल़अ भेटणअ।
30“तम्हां मांझ़ै ज़ै कहा मर्धे किधी बैहे गल्ला लागे, तेऊए बैहा करनै का आजी हेरनी सह शोहरी कहा होरी ज़ोरा-ज़ोरी भ्रष्ट करी। ज़ै तम्हां मांझ़ै आप्पू लै कुंण नऊंअ घअर बणांए, तेथ निं तेऊ बस्सणअ भेटणअ। ज़ै कुंण दाखो बाग लाए, तेऊ निं तेते फल़ खाणैं भेटणैं। 31थारै डागै-चैणैं पाणै थारी आछी नदरी कहा मारी पर तम्हां निं तिन्नें शिखा बी खाणीं भेटणीं। गाधै अर भेडा-बाकरीए हेल़्ही पाणीं थारै दुशमणा च़ोरी अर तम्हां बाखा निं तेता बापस आणना लै थारी मज़त कोही करनी।
32“थारै शोहरू शोहरी निंणै तम्हां नदरी ज़ोरा-ज़ोरी होरी देशे लोगा आपणैं गलाम करना लै घिशी अर तम्हैं हणैं भाल़ा-भाल़ी। तम्हैं थकणैं सारी अमरा तिन्नां भाल़ी-भाल़ी कि केभै एछणैं फिरी पर तम्हां निं भिई तिन्नों मुंह भाल़णअ भेटणअ।
33“तम्हां करनी आपणैं खेचै खास्सी मैन्थ पर थारी सारी फसल पाणीं कहा परदेसी लोगा खाई, तिन्नां आणनैं तम्हैं सारी अमरा हारी-मारी।
34“इना एही डरैऊंणी गल्ला आपणीं आछी भाल़ी हणैं तम्हैं बेगरै। 35बिधाता दैणीं तम्हां लै एही सज़ा कि तम्हैं हणैं मुंडा उंधै घुंढी तैणीं दुखणैं करै भरी अर तेखअ निं तम्हैं तेता का बिज़रदै।
36“तेखअ ज़हा तम्हैं आजू आपणअ राज़अ बणांए, बिधाता पाणै तम्हैं तेऊ संघी इहै देशे गलामी दी ज़ेते थारै दाद-बाब बी पाखलै थिऐ। तेथ लागणीं तम्हां काठा-पात्थरे बणाऐं दै देअआ-देबीए पूज़ा करनी। 37ज़हा-ज़हा देशै तम्हैं छिंघिए, तिंयां लोग बी हणैं रहैन कि तम्हां संघै हुअ इहअ। तिन्नां करनअ थारअ मखौल अर सुहांग।
38“तम्हां बऊंणअ आपणैं खेचै खास्सअ पर फसल निखल़णीं तेता का थोल़ी ई। किल्हैकि सह छ़ेक्कणी रैट्टै खाई। 39तम्हां खास्सी मैन्थ करी दाखे बागा अर तेते फाज़त बी करनी राम्बल़ै करै, पर तेता का निं तम्हां फल़ चोल़णैं भेटणैं, नां दाखो रस झुटणा लै भेटणअ। किल्हैकि तेथ जाणैं तेता का आजी किल़ै पल़ी। 40तम्हां लाणैं आपणैं सारै देशै जैतूने बूट पर तेतो तेल निं तम्हां आपणीं देही दी मल़णअ भेटणअ। किल्हैकि जैतून जाणैं काढणें ऋता का आजी धरनीं अल़ी।
41“थारै शोहरू-शोहरी ता हणैं पर तम्हैं हणैं तज़ी बी तिन्नां बाझ़ी। किल्हैकि तिंयां निंणै दुशमणा जुधा का कैद करी।
42“रैट्टै करनी थारी साल-फसल खाई खतम अर डाल़ै-बूटै निं तिन्नां पाच बी छ़ाडणअ।
43“तम्हां मांझ़ै रहणैं आल़अ परदेसी हणअ सेठ अर बलबान अर तम्हैं हणैं गरीब अर कमज़ोर। 44तम्हां पल़णीं एही गरज़ कि तम्हां लागणअ तिन्नां परदेसी का ऋण काढणअ। तिंयां हणैं टोली दी तम्हां का आजू बडी पदबी दी बेठै दै अर तम्हैं रहणैं तिन्नां का खास्सै पिछ़ू।
45“इज़राईलीओ, ज़ै तम्हैं इना बधाना अर बिधी नांईं मने, ज़ेतो बिधाता तम्हां लै हुकम करा, तै रहणैं ईंयां फिटक तम्हां लै लागी। ईंयां पल़णै तम्हां पिछ़ू अर एता करै गोठणै तम्हैं फेरा-फेर अर खिरी हणैं तम्हैं पठी खतम। 46ईंयां हणैं तेखअ सदा लै तम्हां अर थारी आजू आद-लुआदा लै नछ़ैण कि बिधाता दैनी तम्हां लै सज़ा।
47“ज़ै तम्हैं सोभी गल्ला दी सेठ हई बी खुश अर मगन हई बिधाते च़ाकरी नांईं करे, 48तै निं सह बिधाता थारै दुशमणा रोक्कदअ, अर तम्हैं हणैं तेखअ तिन्नें गलाम। तेखअ हणैं तम्हैं इहै गरीब अर नांगै कि तम्हां का निं राम्बल़ै करै खाणां लै बैल़ी खाई क्लारी हणीं। थारै दुशमणा डाहणअ थारै कैल़ै तेभै तैणीं लोहेओ जूँ पाई#28:48 लोहेओ जूँ पाई तम्हैं दाबणै ज़ोरा ज़ोरी, ज़ेभै तैणीं तम्हैं मूंऐं निं।
49“बिधाता आणनैं दूर देशे लोग तम्हां संघै जुधा लै, तिंयां एछणैं धरतीए दुजै पुंझ़ा का इहै ठुर्ही ज़िहअ मुक्षरलअ डैअ बाही एछा। तेऊ देशे लोगे निं तम्हां बोली भाषा ई समझ़ एछणी। 50तिन्नां देशे लोग हणैं इहै नर्दैई कि तिन्नां नां प्रोढै मणछो ल्हैज़ करनअ अर नां होछ़ै शोहरू लै झींण करनी। 51तिन्नें सैना करनै थारै डागै-चैणें हेल़्ही अर सारी साल-फसल एही खतम कि तम्हैं हणैं बरैबाद। तिन्नां लुटणैं थारअ नाज़, दाखो रस, जैतूनो तेल, गाऊई-बल्द, भेडा-बाकरी पठी इहै कि तम्हैं मरनै भुखै।
52“बिधाता ज़ेतरी ज़ैगा तम्हां लै हणीं दैनी दी, तिन्नां दुशमणा गोटणैं तम्हैं तिन्नां नगरी दी फेरा-फेर। नगरी फेरे बडै-बडै उछ़टै गहल़ ज़ेथ तम्हां इहअ भरोस्सअ हणअ कि तम्हैं आसा तेथ भितरी बच़ै दै, पर तिन्नां दुशमणा पाणीं तिंयां बी ढोल़ी। 53ज़ांऊं थारै दुशमणै तम्हैं नगरी फेरा-फेर भितरी गोटी हणैं डाहै दै, तम्हैं एछणैं तेखअ इहै भुखै मरी कि तम्हां खाणअ आपणैं तिन्नां शोहरू-शोहरीओ मास्स ज़ुंण तम्हां लै बिधाता आसा दैनै दै। 54-55तम्हां मांझ़ै ज़ुंण मणछ भोल़अ अर झणैल़ू बी होए, तेऊ बी खाणअ आपणैं ई शोहरू-माठैओ मास्स कल्ही अर सह रहणअ आपणीं लाल़ी, भाई या होरी शोहरू लै इहअ फ्रिशुई कि इनै निं लोल़ी एता मांझ़ै धख बी खाअ। किल्हैकि तेता सुआई निं तिन्नां का होर खाणां लै किछ़ हणअ। 56-57तम्हां मांझ़ै एही बेटल़ी ज़ुंणी एही सुखी ज़िन्दगी होए ज़िऊई दी कि सह डरा धरनीं हांढणै का बी। सह बगत हणअ इहअ बूरअ कि तैहा बेटल़ी पाणै सूई करै आपणैं दुधा झुटदै शोहरू च़ुप्प-च़ुप्पै खाई, तैहा निं तेता का आपणैं लाल़ै अर होरी शोहरू बी खाणैं दैणअ।”#2 राज़. 6:28,29; लाम. 4:10
हुकम नांई मनी एछा बनाश
58मोसा बोलअ इज़राईली लै इहअ, “बिधाते ज़ुंण हुकम बधाने कताबा दी आसा लिखै दै, ज़ै तम्हैं तिन्नां सोभी नांईं मने अर ज़ै तम्हैं आपणैं परमेशर बिधाते महान नाओं अदर नांईं करे, 59तेऊ दैणीं तम्हां लै नबिज़री बमारी अर घोर आफ़त पाई सज़ा। 60ज़ेही तेऊ मिसर देशे लोगा लै पाई ती अर ज़ेता का तम्हैं खास्सै डरै तै। 61तम्हैं डाहै ऐहा गल्ला आद, ज़ै बिधाता तम्हां खतम करनैओ मन्न बणाईं हेरे, सह सका एता का लाऊआ कज़ोहै बमारी अर आफ़त पाई, ज़ुंण बधाने कताबा दी नांईं बी होए लिखी दी।
62“एही ता हणैं तम्हैं तेतरै खास्सै ज़ेतरै सरगै तारै आसा, पर ज़ै तम्हैं आपणैं बिधाते हुकम नांईं मने, तै बच़णैं तम्हां मांझ़ै धख ई। 63ज़हा ज़ैगा डेऊई तम्हैं तेते मालक हणैं, बिधाता आसा खुश कि तम्हैं लोल़ी तिधी सफल हुऐ अर खास्सै हुऐ। पर ज़ै तम्हैं तेऊओ हुकम नांईं मने, तै निं सह तम्हां तैहा ज़ैगा का गोधी का खतम करना लै बी दुखी हणअ।
64“ज़ुंण तम्हैं तेखअ ज़िऊंदै बी रहे, तम्हैं छिंघणैं सारी धरती दी देशै-देशै अर तेथ हणैं तम्हैं काठा-पात्थरे देअआ-देबीए पूज़ा करदै, ज़ुंण तधू तैणीं थारै दादै-बाबै निं किअ। 65तम्हां निं तिन्नां देशै चैन भेटणअ अर तम्हैं रहणैं ज़ैगै-ज़ैगै हांढदै लागी। बिधाता पाणीं थारै दिलै डअर तम्हां नां आशा रहणीं नां हैअ, 66तम्हां रहणअ हर धैल़ै आपणैं मरनैओ फिकर, राची निं नींज अर धैल़ी निं भुख रहणीं अर नां आजू ज़िऊंणेंओ भरोस्सअ।
67“थारै मन्नैं ज़ुंण डअर हणीं पल़ी दी अर ज़ुंण तम्हां का डरैऊंणी गल्ला शुझणीं, तेता भाल़ी एछणी तम्हां एही घाटी-घाटी कि धैल़ी लागणीं तम्हां एही कि सान्ह लोल़ी ती छ़ेक्कै पल़ी! बैल़ी लागणीं तम्हां एही कि राच लोल़ी ती छ़ेक्कै भैई।
68“मंऐं बोलअ त तम्हां लै इहअ कि तम्हैं निं मिसर देशा लै फिरी डेऊई, पर तेभै छ़ाडणैं बिधाता तम्हैं किश्ती दी बशैल़ी बापस। तम्हां करनी तिधी आपणैं दुशमणा का आप्पू बेच़णें कोशिश बी कि तम्हैं तिन्नें गलाम बणी सके, पर थारअ गाहक निं कोहै हणअ।”
Currently Selected:
बधान 28: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
