बधान 24
24
बैईदाऊअ
1“ज़ै तम्हां मांझ़ै कुंण मर्ध आपणीं बेटल़ी का किज़ू गल्ला पिछ़ू खास्सअ नराज़ होए कि सह निं तैहा संघै रहणअ ई च़ाहंदअ, सह दैऐ बैईदाऊअ लिखी करै तैहा बेटल़ी छ़ाडी।#मोत्त. 5:31; 19:7; मार्क. 10:4 2सह छ़ाडी दी बेटल़ी ज़ै कहा होरी संघै बैह करे, 3पर सह दुजअ मर्ध बी तैहा का खुश नांईं होए अर सह बी तैहा बैईदाऊअ दैई छ़ाडी दैए या सह दुजअ मर्ध मरी जाए, 4दुजै मर्धा संघै रही बस्सी करै निं सह बेटल़ी तेखअ तेऊ मर्धा संघै भिई बैह करी सकदी ज़ुंण तेसो पैहलअ लाल़अ थिअ। इना इहै च़िल़्हखरै कामां करै लागणीं तैहा ज़ैगा छ़ोत ज़ुंण बिधाता तम्हां लै दैणीं, एता का आसा बिधाता नफरत।
एभै हुअ द बैह
5“ज़ै कहा शोहरू अर शोहरीए बैहा हई अज़ी साल बी निं हुई होए, तेऊ निं तम्हैं जुधा लै छ़ाडी अर नां किज़ू कामों तेऊ लै बोझ़ पाई। तेऊ दैणअ एकी साला तैणीं तेऊए लाल़ी संघै राज्ज़ी-मौज़ी घअरै रहणैं।
बांधअ
6“ज़ेभै तम्हैं कहा लै ऋण दैए, तम्हैं सका तेऊ का किज़ै बांधअ ढाकी ताकि सह बादा का ऋण भरे। पर तम्हैं निं तिन्नें घअरो नाज़ा पिशणैंओ थरेट या तेते तल़ी बांधै डाही, तेता करै सका तिन्नां लै आफ़त पल़ी, तेथ नाज़ पिशी लागा तिन्नां आपणैं टबरा का रोटी खैऊंणी।
हरण
7“ज़ै तम्हां मांझ़ै कुंण आपणैं भाई-बंधो हरण करी ज़ोरा-ज़ोरी गलाम हणां लै बेच़णअ च़ाहे, तेऊ इहै च़ोरा पाऐ मारी ताकि तम्हां इज़राईली मांझ़ा का एही बूराई दूर होए।#लुआ. 21:16
कोहल़
8“मंऐं आसा सोभी प्रोहता का खोज़ी डाहअ द कि तेभै किज़ै करनअ ज़ै तम्हां मांझ़ै कहा कोहल़ होए, तम्हैं डाहै एतो धैन हेरे, ज़िहअ करना लै प्रोहत तम्हां लै बोले, तम्हैं करै तिहअ ई।#लेब. 13:1—14:54 9ऐहा गल्ला बी निं तम्हैं बिस्सरुई कि मिसर देशा का एछदी बारी बिधाता मिर्यामा लै किज़ै किअ त।#गण. 12:10
ऋणा पिछ़ू बांधअ
10“ज़ेभै तम्हां मांझ़ै कुंण आपणैं भाई-बंधा लै ऋण दैए, सह सका तिन्नां का बांधअ मांगी ताकि तिंयां तेऊ का काढै दै ऋणा बापस भरे। पर तैहा बांधे च़िज़ा निंदअ निं तेऊए घअरा भितरी डेऊई।#लुआ. 22:26,27 11तम्हैं न्हैल़ै घअरा बागै रही अर तिंयां आणै तैहा च़िज़ा घअरा का बागा लै ज़ेता बांधै डाहणां लै तिन्नैं ज़बान आसा दैनी दी।
12“पर ज़ै सह मणछ पठी दाल़जी होए कि तेऊ का आसा सुत्तणा लै एक्कै दोहल़ू अर सह ई डाहअ तेऊ बांधै पाई। तेऊ बांधै आप्पू का डाही निं तूह निंजा सुत्ती आथी। 13पर तेता लऐ तूह धैल़अ उडणैं का आजी तेऊ लै बापस दैई! ताकि सह बैल़ी नैत्तै-तात्तै सुत्ते अर ताल्है बिधाता सेटा बर्गत दैणा लै अरज़ करे। बिधाता हआ इना इहै धर्मीं कामां भाल़अ लागअ द।
गरीबे मज़दूरी
14“ज़ै तम्हैं कहा गरीब मणछा आप्पू सेटा कामैं लाए, तिन्नें मज़दूरी निं खाई आथी, च़ाऐ सह थारअ आपणअ भाई-बंध इज़राईली होए या कुंण परदेसी होए।#लेब. 19:13 15पर तम्हैं डाहणअ हर बगत इहअ खैल कि ईंयां आसा गरीब ज़ुंण मज़दूरी खटी हर धैल़ै आपणैं लान्हैं-सुन्हैं धाचा। तैही लऐ तिन्नें मज़दूरी धैल़अ उडणैं का आजी तिन्नें हाथै दैई। इहअ निं हआ कि तिंयां बिधाता सेटा लेर-पकार पाए अर तेतो दोश ताल्है लागे।
मौते सज़ा
16“ज़ै कसरै शोहरू ज़ुल्म किअ होए, तेता पिछ़ू निं तेऊए ईजा-बाबा लै मौते सज़ा दैई अर नां कसरै ईजा-बाबे ज़ुल्मा पिछ़ू शोहरू लै मौते सज़ा दैई। ज़ुंण दोशी आसा, सज़ा बी लोल़ी तेऊ ई भेटी।#2 राज़. 14:6; 2 इति. 25:4; एज. 18:20
छ़ुटै-मुक्कै निं तंग करी
17“कहा छ़ुटै-मुक्कै अर परदेसी मणछा निं हारदै-मारदै लागी। नां तम्हैं कहा बिधबा बेटल़ी का ऋणे बदल़ै तेसे झिकल़ै बांधै ढाकी।#लुआ. 23:9; लेब. 19:33,34; बधा. 27:19 18तम्हैं डाहणीं आप्पू सदा अह गल्ल आद कि तम्हैं थिऐ मिसर देशै गलाम अर सह थिअ थारअ परमेशर बिधाता ज़ुंणी तम्हैं तिधा का छ़ड़ैऊई आणै। तैही दैआ हुंह तम्हां लै इहअ करनैओ हुकम।
आपणैं खेचै डाहणीं धख पज़ैआ गरीबा लै एही
19“ज़ेभै तम्हैं आपणैं खेचा का नाज़ लऊए, तेभै ज़ै तम्हैं एक कुंभल़अ नाज़ खेचै बिस्सरी पाए तेता आणदै निं खेचा लै फिरी डेऊई। तिन्नां दैऐ गरीब, परदेसी, बिधबा अर छ़ुटै-मुक्कै दै लान्हैं लै रहणैं। इहअ करै दैणीं बिधाता तम्हां लै थारै सोभी कामां दी बर्गत।#लेब. 19:9,10; 23:22
20“ज़ेभै तम्हैं जैतूने बूटा का फसल झाल़े, तेता का निं पठी आप्पू लै झाल़ी, तेथ बी दैऐ बिधबा, परदेसी, गरीबा अर छ़ुटै-मुक्कै दै लान्हैं लै धख एही रहणैं। 21ज़ेभै तम्हैं दाखे फसल चोल़े, तेतो चोल़ै पैहलअ भ्रह अर बाकी दैऐ गरीब, परदेसी, बिधबा अर छ़ुटै-मुक्कै दै लान्हैं लै रहणैं। 22तम्हैं डाहणीं सदा अह गल्ल आद कि ज़धू तम्हैं मिसर देशै गलाम थिऐ, तधू आसा तम्हैं बी एही ई गरीबी काटी दी अर तैही दैआ हुंह तम्हां लै इहअ करनैओ हुकम।”
Currently Selected:
बधान 24: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
