बधान 23
23
इहै मणछ ज़ुंण बिधाते पबित्र ज़ैगा एछी निं सकदै
1तेखअ बोलअ मोसा इज़राईली लै इहअ, “ज़हा मणछो गुप्त आंग काटी होए पाअ द, या तेता हेठै आंडी बरैबाद होए हुई दी सह निं बिधाते परज़ा संघै साझ़ू हई सकदअ।
2“झ़ाटै ढैऊई हुअ द मणछ अर तेऊए आद-लुआद बी निं दसा पोस्ती तैणीं बिधाते आपणीं परज़े लोग हणैं।
3“अमोनी, मोआबी ज़ातीए मणछ अर तिन्नें आद-लुआद बी निं दसा पोस्ती तैणीं बिधाते आपणीं परज़े लोग हणैं।#नहे. 13:1,2 4तिन्नां लै लागी रोक इहअ करै कि ज़धू तम्हैं इज़राईली मिसर देशा का आऐ तै, तिंयां हुधूऐ तै तधू तम्हां लै रोटी-पाणीं दैणा लै बी। तिन्नैं आणअ त तम्हां लै फिटक दैणा लै मेसोपोटामिया मुल्ख पतोर नगरी का बोरो शोहरू बलाम गूर शादी।#गण. 22:1-6 5पर शूकर हुअ इहअ कि बिधाता झ़ूरा तम्हां इज़राईली लै खास्सअ अर तेऊ बझ़ैल़ी बलाम गूरा का फिटक दैणें बदल़ै बर्गत दैणैं।#गण. 23:7—24:9 6ज़ेभै तैणीं तम्हैं ज़िऊंदै रहे, तम्हैं निं इना मोआबी अर अमोरी संघै मेल़-ज़ोल़ डाही किछ़ू गल्ले मज़त करी।
7“पर एदोमी आसा थारै रिश्तैदार तिन्नां संघै निं तम्हैं ज़ीद डाही अर नां तम्हैं मिसर देशे लोगा लै नफरत करी किल्हैकि तम्हैं तै तिन्नें देशै परदेसी बस्सै दै। 8तिन्नें पल़पोचै सका बिधाते आपणीं खास परज़ा संघै साझ़ू हई।
सैने डेरै लोल़ी च़ांगै च़ोखै
9“ज़ेभै तम्हैं जुधा लै डेओए, तिधी लोल़ी सह ज़ैगा बी हर गल्ला दी च़ांगी-च़ोखी रही ज़िधी सारी सैना डेरै होए पाऐ दै। 10ज़िहअ, ज़ै तम्हां मांझ़ै कुंण सपाही इहअ होए ज़हा राची सुपनै भाल़ी गुप्त आंगा का शेतू बागै निखल़े, सह हआ तिहअ करै छ़ोतलअ अर सह डेओऐ डेरे तैहा सारी ज़ैगा का सारी धैल़ी बागै संघा रहै उडै तैणीं तिधी, 11तेखअ लऐ सह न्हैऊई-धोऊई संघा डेओऐ सह धैल़अ उडी करै डेरै लै फिरी।
12“दोत्ती दिशा डेऊंणा लै डाहै सैना रहणें ज़ैगा का दूर ज़ेही छ़ांटी संघा करै तिधी डेऊई। 13थारै अस्त्र-शस्त्रा जैंदरी लोल़ी एक होछ़ी च़िखल़ी बी हुई। सह हणीं एता लै कि ज़ेभै तम्हैं दिशा डेओए, तेभै खण्हैं तेता लै खाढ अर दीशा करनै का बाद डाहै तेता दाबी। 14किल्हैकि तम्हैं लोल़ी आपणैं खिम्भ अर तेता फेरे ज़ैगा छ़ोतली अर च़िल़्हखरी च़िज़ा का च़ांगी-च़ोखी करी पबित्र डाही। किल्हैकि बिधाता रहा हर घल़ी तम्हां संघै कि सह थारी दुशमणा का ज़ितणा लै मज़त करे। इहअ निं हआ कि सह थारै डेरै दी छ़ोतली च़िज़ा भाल़ी पिछ़ू हटे।
ज़ै तम्हां सेटा कुंण गलाम शरण लए
15“ज़ै कुंण गलाम होरी देशा का ठुर्ही तम्हां सेटा एछे अर तम्हां का शरण मांगे, तिन्नां निं तम्हैं तिन्नें मालके हाथै बापस दैई। 16पर तम्हैं पुछ़ै तेऊ का इहअ कि सह थारी कहा नगरी च़ाहा रहणअ, तेखअ निं तेऊ संघै किछ़ै बूरअ करी।
कंज़रैई
17“इज़राईलीओ, तम्हां मांझ़ै निं कोहै बेटल़ी देही बेच़ी कमाई करनै आल़ी लोल़ी हुई, नां इज़राईली मांझ़ै कुंण मर्ध इहअ कंज़रअ काम करनै आल़अ लोल़ी हुअ।#23:17 तेऊ ज़मानैं थिई देबदासी बणाणेंओ रबाज़, तिंयां मना तै इहअ कि तिहअ करी हणैं तिन्नें साल-फसल बधिया अर खास्सी ज़ैदात अर तैही दैआ तै तिंयां आपणीं शोहरी देबदासी हणां लै#लेब. 19:29 18बिधाता करा इहै कामां करनै आल़ै मर्ध अर बेटल़ी का नफरत ज़ुंण एही कंज़रैई करा। तिन्नां का निं बिधाता भैंट बी मंदअ, च़ाऐ सह तिन्नैं मानत किल्है निं होए मनी दी।
ऋण अर बैज़
19“ज़ै केभै तम्हैं आपणैं भाई-बंधा लै ढब्बै, नाज़ या किज़ै होर च़ीज़ ऋण दैए, तिन्नां का निं बैज़ मांगी।#लुआ. 22:25; लेब. 25:36,37; बधा. 15:7-11 20परदेसी मणछा का सका तूह बैज़ ढाकी, पर आपणैं इज़राईली भाई-बंधा का निं बैज़ मांगी, तै दैणी बिधाता तम्हां लै एही बर्गत कि तम्हैं हणैं तेऊ देशै सोभी कामां लै सफल ज़ेऊ देशे तम्हैं ऐबै मालक हणैं।
बिधाता लै मानत
21“इज़राईलीओ, ज़ेभै तम्हैं आपणैं बिधाता लै बांधअ डाही मानत मने, तेता करै ज़ेतरअ हई सका तेतरी छ़ेक्कै पूरी। बिधाता हआ तेरै तेऊ बांधै न्हैल़अ लागअ द, ज़ै तम्हैं तेता पूरी नांईं करे तेता लै लागणअ तम्हां दोश।#गण. 30:1-16; मोत्त. 5:33 22पर ज़ै तम्हैं मानत नांईं मने, तेतो निं तम्हां लै किछ़ै पाप-दोश लागदअ। 23ज़ेही बी तम्हैं बिधाता लै मानत मने तेता करै ज़रूर पूरी। किल्हैकि सह आसा तम्हैं आप्पै आपणैं दिला का मनी दी अर तैहा करै पूरी बी तेही ई।
24“ज़ै तम्हैं कहा होरीए दाखे बागा दी डेओए, तम्हैं सका तेता का रज्ज़ी फल़ खाई, पर आप्पू संघा निं तेता का एक दाणअ बी निंईं। 25इहअ ई ज़ै तम्हैं कहा होरीए नाज़े खेचै होए, तम्हैं सका नाज़ा का सील चोल़ी मरोक्की करै खाई, पर होरीए खेचा का निं तम्हैं नाज़ लऊई करै आप्पू संघै निंईं।”
Currently Selected:
बधान 23: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
