आमोस 5
5
प्राश्त करा
1इज़राईलीओ, मेरअ लामण शूणां ज़ुंण मंऐं थारै शोगा पिछ़ू लाअ बोली:
2“इज़राईल देश आसा कुंआरी शोहरी ज़िहअ,
ज़ुंण धरनीं बधल़ूई, अर ऐबै निं सह कधि खल़ी उझ़णीं।
सह डाही तेसे आपणीं ज़ैगा शोटी अर तैहा खल़ै झ़ैऊंणै आल़अ निं कोह आथी।”
3मालक बिधाता बोला इहअ,
“इज़राईले लुआदा मांझ़ै ज़हा नगरी का जुधा लै हज़ार सपाही निखल़े,
तिंयां बच़णैं जुधा बाद सिधै शौ ई!
ज़हा नगरी का शौ सपाही जुधा लै डेओए, तिन्नां मांझ़ै एछणैं जुधा का सिधै दस बच़ी।”
4मालक बिधाता बोला इज़राईली लै,
“मुंह सेटा लै एछा, तै रहणैं तम्हैं ज़िऊंदै।
5बेतेल बणाईं दी बेदीए पूज़ा करदै निं डेओआ,
नां गिलगाल डेओआ अर नां बेर्शेबा मुल्खा बाखा डेओआ।
अर नां गिलगाल मुल्खै पूज़ा करदै डेओआ।
गिलगाल मुल्खे लोग डेऊणैं गलामी दी अर बेतेल नगरी हणीं शुन्नीं।”
6बिधाता बाखा फिरा, तै रहणैं तम्हैं ज़िऊंदै। ज़ै तम्हैं इहअ नांईं करे, तेऊ पल़णअ तम्हां युसुफे आद-लुआदा सज़ा दैंदअ आगी ज़िहअ चुटी। तैहा आगी करै हणअ बेतेल नगरी अर तेथ बस्सै दै सोभी लोगो बनाश। तैहा आगी निं कोह शेऊई सकदअ। 7तम्हैं ज़ुंण नसाफ बदल़ा अर लोगा ठगी तिन्नों हक मारा, तम्हां लै हणीं आफ़त!
8बिधाता आसा मृग नक्षत्र, कृतिका तारे छ़ुंढ बणाऐं दै।
नटिप्प न्हैरै दी करा सह प्रैश्शअ अर
धैल़ी-दपहरै करा सह घणीं राच।
समुंदरे पाणींओ बणाआं सह भाफ संघा
बरशाऊआ धरती दी सरग।
तेऊ नाअं आसा बिधाता।#आयू. 9:9; 38:31
9सह पाआ बडै-बडै गहल़ा-कोटा ढोल़ी अर
तिन्नों करा सह पठी बनाश।
10शुचअ नसाफ करनै आल़ै मणछा लै करा तम्हैं नफरत, अर शुचअ बोल़णैं आल़ै मणछा संघै डाहा तम्हैं ज़ीद। 11तम्हैं दरल़ा गरीब मणछा, तम्हैं लुटा तिन्नां का खास्सअ नाज़। तम्हैं आसा रेशपत खाई काटुऐ पात्थरे भबन बणाऐं दै, पर तम्हां निं तेथ बस्सणअ भेटणअ! तम्हैं आसा दाखे शोभलै बाग लाऐ दै, पर तम्हां निं तेतो रस झुटणअ भेटणअ। 12मुखा आसा थोघ कि तम्हैं किऐ खास्सै अर घोर पाप। तम्हैं दैआ धर्मीं मणछा लै दुख, तिन्नां का खाआ तम्हैं रेशपत। दालता दी निं तम्हैं गरीब मणछो नसाफ ई हणैं दैंदै! 13अक्ली आल़अ मणछ रहा तैहा घल़ी च़ुप्पी किल्हैकि अह आसा बूरअ बगत!
14भलअ करा अर बूरै करनै का ठुर्हा दूर, ताकि तम्हैं ज़िऊंदै रहे! तै रहणअ स्वर्गे सारी सैनो मालक बिधाता असली दी तम्हां संघै, ज़िहअ तम्हैं बोला कि सह आसा तम्हां संघै। 15बूरअ करनै का करा नफरत, भलअ करना लै झ़ूरा। लोगो नसाफ करा धर्म अर मानदारी करै। तै झ़ाणीं स्वर्गे सारी सैनो मालक बिधाता तिन्नां लोगा लै झींण करे ज़ुंण युसुफे आद-लुआदा मांझ़ै अज़ी बच़ै दै आसा।
16स्वर्गे सारी सैनो मालक बिधाता बोला इहअ,
“हर बाता अर च़फै दी हणैं ज़ोरै-ज़ोरै ढाहा लांदै लागै दै,
तिन्नां डाहणैं कृषाण बी मज़दूरी दैई आप्पू संघै लेरा लांदै लाई,
तिन्नां आणनैं शोगा लै लामण बोल्दै घैरी।
17दाखे सोभी बागा दी हणैं सोभ लेरा लांदै लागै दै,
किल्हैकि मुंह दैणीं तिन्नां बाती फेरी संघा करनअ तिन्नां बनाश।
अह गल्ल डाही मंऐं बिधाता बोली।”
आजू ज़ुंण नसाफ हणअ
18तम्हां लै आसा आफ़त! ज़ुंण तम्हैं बिधाते धैल़ी न्हैल़ै आसा लागै दै!
तैहा धैल़ी थारअ किज़ै भलअ हणअ?
तैहा धैल़ी हणअ तम्हां लै नटिप्प न्हैरअ नां कि प्रैश्शअ!
19तैहा धैल़ी हणैं तम्हैं इहै मणछा ज़िहै
ज़ुंण सिहा सेटा का ठुर्हा अर आजू भेटा तेऊ भाल्लू!
कि इहै मणछा ज़िहै ज़ुंण आपणैं घअरै पुजी भित्ती दी हाथ लाआ
अर तेथ दैआ तेऊ लै सर्प चटाक!
20बिधाते धैल़ी हणअ न्हैरअ, तेथ निं प्रैश्शअ हणअ,
सह हणअ इहअ नटिप्प न्हैरअ कि तेथ निं ज़ाथी किछ़ प्रैश्शअ हणअ।
21बिधाता बोला इहअ,
“थारै तिह-थैरा का आसा मुंह नफरत, थारै झाल़ै करै रुंझ़ुअ हुंह!
22थारै हूम अर नाज़ बल़ी करै निं हुंह खुश हंदअ।
थारै मेल़-ज़ोल़ा लै पशूए बल़ीदाने च़र्बी निं हुंह मंदअ आथी।#ईशा. 1:11-14
23मुल्है गिहा लाणीं करा बंद, मुंह निं थारै कतारै बाज़णें धुन शुणनी।
24पर हुंह च़ाहा कि नसाफ लोल़ी गाडा ज़िहअ बगअ,
धर्म लोल़ी बडै दरैऊआ ज़िहअ बगअ ज़ुंण कधि निं शुक्कदअ।
25 #
शधा. 7:42,43 इज़राईलीओ, थारै दाद-बाब नढैऊऐ मंऐं च़ाल़्ही साला उज़र रेगीस्तानै,
तिन्नां तेतरी साला निं मंऐं तिन्नां का पशू बल़ी अर नाज़ बल़ी मांगी!
26पर तम्हैं किई सक्कूत देअए च़ाकरी ज़ुंण थारअ राज़अ देअ आसा,
अर तम्हैं किई थारै तारै किबान देअए मुहुर्तीए पूज़ा।
तम्हां लागणीं ईंयां मुहुर्ती तेभै आप्पू संघै बुल़्हणी
27ज़ेभै मुंह तम्हैं दमिश्क नगरी पार गलामी दी छ़ाडणैं।
अह गल्ल डाही मंऐं बिधाता बोली ज़ुंण स्वर्गे सारी सैनो मालक आसा।”
Currently Selected:
आमोस 5: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
