2 शमूएल 21
21
शाऊले लुआद पाई मारी
1दाबेद त राज़अ अर तिन्नां धैल़ै पल़अ चिई साला तैणीं सारै इज़राईल देशै घोर नकाल़ अर नाज़-पाणीं निं किछ़ै रहअ। दाबेद डेऊअ एते बारै बिधाता पुछ़दअ, बिधाता बोलअ तेऊ लै इहअ, “शाऊल अर तेऊए खिंबा लै आसा हत्या करनैओ दोश लागअ द, किल्हैकि तेऊ बझ़ैल़ै तै गबोन नगरीए लोग मारनै।” 2गबोनी लोग निं इज़राईली आथी तै, तिंयां थिऐ अमोरी लोगा मांझ़ै एक छ़ुंढ, इज़राईली त तिन्नां लै बच़न दैनअ द कि तिन्नां निं तिंयां किछ़ दैंदै हणैं। पर राज़अ शाऊल उझ़ुअ त तिन्नां खतम करदअ किल्हैकि सह च़ाहा त इज़राईली अर यहूदा सोभी ज़ैगा काबू करनअ।#ज़ैह. 9:3-15 3दाबेदै शादै गबोनी लोग संघा पुछ़अ तिन्नां का, “तम्हैं बोला हुंह तम्हां लै किज़ै करूं? ज़ुंण गलती शाऊलै किई, तेतो किज़ै प्राश्त आसा ताकि तम्हैं बिधाते परज़ा लै भिई बर्गत दैए?”
4गबोनी लोगै दैनअ दाबेदा लै ज़बाब, “शाऊला संघै म्हारै झ़गल़ैओ फैंसलअ निं सुन्नैं-च़ंदी दैई मुक्कदअ अर नां हाम्हैं कहा इज़राईली मारनअ च़ाहंदै।”
राज़ै बोलअ, “तै खोज़ा ओर्ही, ज़िहअ तम्हैं बोले मुंह करनअ तिहअ ई।”
5तिन्नैं बोलअ राज़ै लै, “शाऊल च़ाहा त हाम्हां पठी खतम करनअ कि इज़राईला मांझ़ै निं लोल़ी त म्हारअ एक मणछ बी ज़िऊंदअ रहअ। 6तूह दै आजू तेऊए लुआदा मांझ़ै सात ज़ण्हैं हाम्हां का सभाल़ी। तिंयां निंणै हाम्हां बिधाता छ़ांटै दै राज़ै शाऊले नगरी गिबा धारा लै। तिधी दैणीं हाम्हां तिन्नां लै बिधाता सम्हनै फांसी।”
राज़ै बोलअ, “हुंह दैंऊं तिन्नां तम्हां का।”
7पर राज़ै दाबेदै डाहअ शाऊलो पोचअ मोपीबशेत बच़ाऊई किल्हैकि दाबेदै ती जोनाताना लै बिधाते सोह खाई ज़बान दैनी दी।#1 शमू. 20:15-17; 2 शमू. 9:1-7 8#1 शमू. 18:19राज़ै शाऊले ती एक डाही दी बेटल़ी अईयाहे शोहरी रिज़पा, तेसे तै दूई शोहरू हुऐ दै, एकी नाअं त अर्मोनी अर तेसे दुजै शोहरू नाअं बी थिअ मोपीबशेत, शाऊले ज़ेठी शोहरी मिराब ती मेहोलाह नगरीए बर्ज़िले शोहरू आद्रीएला संघै बैही दी, तेसे तै पांज़ शोहरू। दाबेदै बझ़ैल़ै ईंयां सात ज़ण्हैं ढाकणैं 9संघा दैनै तिंयां गबोनी लोगा का सभाल़ी। गबोनी दैनी तिन्नां लै धारा प्रैंदै बिधाता सम्हनै फांसी अर तिंयां सात ज़ण्हैं मूंऐं एकी बारी। ईंयां गल्ला हुई पैहलै ज़ेठै ज़ेभै ज़ौआ लऊंदै जाआ लागी।
10शाऊले डाही दी बेटल़ी अईयाहे शोहरी रिज़पा बणाईं तिधी नेल़ टोल्हा प्रैंदै खिंथा करै आप्पू लै छ़ान संघा रही तिधी ज़ेठा पोर्ही शाऊंणै खास्सअ भराल़ लागणै तैणीं पहरी बेशी। तैहा निं धैल़ी तिन्नां आपणैं शोहरूए ल्हासा प्रैंदै कहा च़ेल्लू-पखीरू बेशणै दैनअ अर नां राची कहा बणें ज़ीबा दैनअ खाणैं।
11ज़ांऊं राज़ै दाबेदा का कुंणी खोज़अ कि अईयाहे शोहरी रिज़पा ज़ुंण शाऊले डाही दी बेटल़ी आसा, तैहा किअ इहअ-इहअ, 12दाबेद डेऊअ गलाद जबेश नगरीए लोगा सेटा संघा आणै शाऊल अर तेऊए शोहरू जोनाताने हस्तू मांगी। तिन्नैं तै तिंयां बेथ-शान तेऊ च़फै का च़ोरी आणै दै ज़िधी तिंयां पलिश्ती तैहा धैल़ी च़ुंढदै डाहै तै लाई ज़हा धैल़ी तिंयां गिलबा धारा जुधा दी मारै तै।#1 शमू. 31:8-13 13राज़ै दाबेदै झाल़ै शाऊल अर जोनाताने हस्तू संघै तिन्नां साता ज़ण्हैं हस्तू बी ज़ुंण ज़हा लै तिधी फांसी दैनी ती। 14तेखअ डाहै तिन्नैं शाऊल अर तेऊए शोहरू जोनाताने हस्तू बिन्यामीन मुल्खै जेला नाओंए ज़ैगा दाबी ज़िधी शाऊलो बाब कीश त दाबअ द। ज़िहअ दाबेद राज़ै हुकम त किअ द, सोभ काम हुअ तिहअ ई। तेखअ शूणीं खिरी बिधाता देशा लै तिन्नें अरज़।
पलिश्ती जोधै संघै मकाबलअ
(1 इतिहास 20:4-8)
15पलिश्ती हेरअ भिई इज़राईली संघै जुध छ़ेल़ी अर दाबेद अर तेऊए सैना डेऊऐ तिन्नां संघै मकाबलै लै। दाबेद गअ छ़ेक्कै थकी। 16पलिश्ती मांझ़ै रपाईए खिंबो एक जोधअ इशबनोब, तेऊए हाथै त कांस्सैओ एक बडअ बर्छ़अ कोई साढै चिई किलूओ अर कुछी ती तिछी तलबार अर सह आअ राज़ै दाबेदा मारदअ। 17सरूयाहे शोहरू अबीशै गअ तेतरी दाबेदे मज़त करदअ एछी, तेऊ बाही तेऊ पलिश्ती लै एही कि सह मूंअ तिधी। तेखअ बोलअ दाबेदे आदमी सोह खाई दाबेदा लै इहअ, “तूह निं हाम्हां आझ़ा पोर्ही जुधा लै आणनअ, इज़राईलीए आशा आसा तूह ई, हाम्हैं निं ताह बाझ़ी हणअ च़ाहंदै!”#1 राज़. 11:36; भज. 132:17
18एता बाद हुअ पलिश्ती संघै गोब ज़ैगा भिई जुध, तेऊ जुधा लै पाअ हुशाई नगरीए सिबकै रपाईए खिंबो सप नाओं जोधअ मारी।
19ज़ांऊं गोब भिई पलिश्ती संघै जुध हुअ, तेऊ जुधा दी पाअ बेतलेम नगरीए याईरे शोहरू एलहानै गात नगरीए गोलियाथो भाई लेहमी जोधअ मारी ज़सरी बर्छ़े डैंढी राछ़े लाठै ज़ेही मोट्टी थिई।
20तेखअ हुअ पलिश्ती संघै गात नगरी एक होर जुध, तेथ त रपाईओ एक दैंत्तर जोधअ, तेऊए ती हाथै-खूरै छ़ह-छ़ह गुंठी पठी गणी करै च़ौबी। 21तेऊ पाई इज़राईली संघै मकाबलै लै हाक, अर सह पाअ दाबेदे भाई शिमेहे शोहरू जोनातानै मारी। 22ईंयां च़ार पलिश्ती ज़ुंण दाबेद अर तेऊए आदमी मारै, ईंयां तै गात नगरी रपाईए आद-लुआद।
Currently Selected:
2 शमूएल 21: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
