2 शमूएल 20
20
शेबा हुअ दाबेदे खलाफ खल़अ
1 #
1 राज़. 12:16; 2 इति. 10:16 तिधी त गिलगाल मुल्खा का एक शेबा नाओं मणछ आअ द। सह थिअ बिन्यामीन गोत्रा का बिकरी नाओंए मणछो शोहरू। सह थिअ बेघै निक्कअ उपद्रभी मणछ। तेऊ बाज़अ तिधी नर्शिंगअ संघा बोलअ ज़ोरै-ज़ोरै इहअ, “एऊ ईशैईए शोहरू दाबेदे राज़ा दी निं म्हारअ किछ़ आथी! अह निं म्हारअ राज़अ आथी! इज़राईलीओ, एछा, आपणैं-आपणैं घअरा लै लागा हांढदै!” 2इज़राईली डेऊऐ दाबेदा छ़ाडी बिकरीए शोहरू शेबा पिछ़ू! पर यहूदे लोग रहै दाबेदा संघै पाक्कै अर तिंयां आऐ जरदण नदी ओर्ही एरुशलेम तैणीं राज़ै संघा।
3राज़अ दाबेद पुजअ एरुशलेम आपणैं मैहलै, ज़ुंण तेऊ तिंयां आपणीं दस डाही दी बेटल़ी पिछ़ू मैहलै फाज़त लै ती डाही दी, तेऊ डाही तिंयां एकी ज़ुदै घअरै पहरै दी। सह रहअ तिन्नें हर ज़रुरती पूरी करदअ लागी पर तेखअ निं सह तिन्नां कोही संघै भिई सुत्तअ-बेठअ आथी। तिन्नें ज़िन्दगी निभी तधा बाद बिधबा बेटल़ी ज़ेही।#2 शमू. 16:22
4राज़ै बोलअ अमासा लै इहअ, “यहूदे सोभी लोगा झाल़ पर्शी तैणीं इधी मुंह सेटा अर तूह आप्पू बी लोल़ी बगती पुजअ।” 5अमासा डेऊअ यहूदी शधाणूं, पर तेऊ लागअ तेता का खास्सअ बगत ज़ुंण राज़ै तेऊ लै दैनअ त। 6तेखअ बोलअ दाबेद राज़ै अबीशै लै, “बिकरीए शोहरू शेबा पाणीं हाम्हां लै अबशलोमा का बी खास्सी आफ़त। तूह निंऊं मेरै आदमी संघा कर तेऊओ पिछ़अ, इहअ निं हआ कि सह म्हारी गहल़ा आल़ी नगरी दी कबज़अ करे अर म्हारै हाथा का छ़ुटे।” 7तेखअ डेऊऐ जोआब आदमी अर राज़ै दाबेदे खास-खास आदमी अर एरुशलेम नगरी का सैनो खास दल अबीशै संघै बिकरीए शोहरू शेबा लोल़ै पिछ़ू। 8ज़ांऊं तिंयां गबोन बडी टोल्हा सेटा पुजै, तिधी गअ तिन्नां सेटा अमासा पुजी। जोआब त कुछी च़ाम्भल़े गाची अर तेथ तलबार बान्हीं जुधा लै तैर्हुअ द, ज़ांऊं सह आजू हांढदअ लागअ, तेऊए तलबार पल़ी धरनीं। 9जोआबै बोलअ अमासा लै, “लै साथी राज्ज़ी-राम्बल़अ आसा तूह?” तेखअ लाअ जोआबै तेऊए दाल़्ही दी च़ुंज़ी माख्खू दैणा लै दैहणअ हाथ। 10अमासा निं जोआबे दुजै हाथै कटारो धैन किअ! जोआबै बाही कटारा करै अमासे पेटै कि तेऊए काढै बागै अर सह हुअ तिधी मरी खतम अर दुजी बाहणें निं जोआबा ज़रुरत ई पल़ी। तेखअ डेऊऐ जोआब अर तेऊओ भाई अबीशै बिकरीए शोहरू शेबे पिछ़ै करदै। 11जोआबो एक आदमी खल़्हुअ अमासे ल्हासा सेटा संघा बोलअ ज़ोरै इहअ, “ज़ुंण बी जोआब अर दाबेदा बाखा आसा, सह एछै जोआबा पिछ़ू!”
12अमासे ल्हास ती लोधल़ै करै लत्त-पथ हुई दी अर मांझ़ बाता पल़ी दी। जोआबे आदमी भाल़अ कि सोभ लोग लागै तैहा ल्हासा सेटा खल़ै हंदै, तेऊ निंईं सह ल्हास घिशी करै संघा डाही सरलै खेचै शोटी अर तेऊ प्रैंदै डाहअ एक झिकल़अ पाई। 13ज़ांऊं ल्हास मांझ़ बाता का पोर्ही काढी हेरी, तेखअ लागै सोभ जोआबा पिछ़ू बिकरीए शोहरू शेबा लोल़ै हांढदै।
14शेबा दैनी इज़राईल मुल्खे सोभी गोत्रा बाती हांढ अर खिरी पुजअ सह बेरीए देशै अबेल-बेथ-माकाहा नगरी अर बिकरीए टोलीए सोभ लोग हुऐ तिधी कठा संघा डेऊऐ शेबा पिछ़ू। 15एसी गअ जोआबे आदमी का थोघ लागी कि शेबा आसा तिधी। तिन्नैं गोटी पिछ़ू का अबेल-बेथ-माकाहा नगरी, तेखअ बणाअं तिन्नैं नगरीए गहल़े नील़ै पात्थर अर माट्टैओ चेच लाई एक टाप्पअ अर गहल़े आथरी बी लाई तिन्नें हेठै खार ताकि तेते भीत धाक्कअ दैई ढुल़े। 16तैहा नगरी ती एक बेटल़ी बडी अक्ली आल़ी, तैहा लाई नगरीए गहल़ा पिछ़ू का हाक्का, “शूणां! मेरी गल्ल शूणां! जोआबा लै बोला ओर्ही एछ, मुंह करनीं तेऊ संघै किज़ै गल्ला।” 17जोआब डेऊअ तैहा नेल़ ज़िहअ अर तैहा पुछ़अ, “तूह आसा जोआब?”
तेऊ बोलअ, “हाँ, हुंह ई आसा।”
तैहा बोलअ, “मालक, मेरी गल्ला शुण।”
जोआबै बोलअ, “बोल तूह, हुंह आ शूणअ लागअ द।”
18सह लागी इहअ बोल्दी, “सैणैं प्रोढै बोला तै म्हारै इहअ, ‘अबेल नगरी का लआ सलाह,’ ज़ुंण सलाह अबेल नगरी का तिन्नां भेटा ती, तेता करै हआ तै तिन्नें झ़गल़ै खतम। 19अह नगरी आसा सारै इज़राईला लै ईजा ज़ेही, अह आसा इज़राईला मांझ़ै शुची-पाक्की अर मेल़-ज़ोल़ च़ाहणैं आल़ी नगरी। तंऐं किल्है लाई अह खोई? ज़ुंण बिधातो आसा, तेता बरैबाद करदअ किल्है आसा तूह लागअ द?”
20जोआबै दैनअ ज़बाब, “इहअ निं कधि लोल़ी हुअ! हुंह निं थारी नगरी खोंदअ अर बरैबाद करदअ आथी आअ द! 21म्हारै दिलै निं एही गल्ल आथी। एप्रैम देशा का आसा एथ बिकरीओ शोहरू शेबा नाओं मणछ आअ द, सह आसा दाबेद राज़ैओ द्रोही हुअ द। तम्हैं दैआ तेऊ हाम्हां का सभाल़ी अर तेखअ लागणअ हाम्हां ऐहा नगरी का हांढदै।”
तैहा बोलअ जोआबा लै, “तेऊओ मूंड दैणअ हाम्हां गहल़ा प्रैंदी बाती ताह सेटा लै उंधै शोटी।” 22तेखअ डेऊई सह आपणीं नगरीए सैणैं सेटा अक्ल सोठी, तिन्नैं मनी तेसे गल्ला अर तिन्नैं पाअ बिकरीओ शोहरू शेबा काटी अर तेऊओ मूंड शोटअ नगरीए प्रैंदी बाती बागै जोआबा सेटा। तेखअ किअ जोआबै आपणैं लोगा लै नर्शिंगै बाज़ी शारअ कि नगरी छ़ाडा। तिंयां डेऊऐ आपणैं-आपणैं डेरै लै अर खिरी पुजअ जोआब एरुशलेम दाबेद राज़ै सेटा बापस।
दाबेदे कार-करिंदै
23जोआब त इज़राईली सारी सैनो सैनापति, जहोयादे शोहरू बेनियाह त दाबेदे फाज़त करनै आल़ै सपाहीओ प्रधान, 24अदोराम त सैना लै मज़दूर मणछो प्रधान। आहीलूदो शोहरू जहोशापात त सारी हुई-बिति दी गल्ला लिखणैं आल़अ, 25शबा त काईथ, सदोक अर अबतार तै प्रोहत, 26याईर नगरीओ ईरा बी थिअ दाबेदो निज़ी प्रोहत।
Currently Selected:
2 शमूएल 20: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
