2 शमूएल 17
17
आहीतपेले अबशलोमा लै सलाह
1खास्सै धैल़ै निं हुऐ तै कि आहीतपेलै बोलअ अबशलोमा लै, “मुंह दै बारा हज़ार मणछ छ़ांटणैं अर हुंह च़ाल्लअ आझ़ ई राची दाबेदे पिछ़ै करदअ डेऊई। 2ज़िधी तेऊओ हैअ चुटे अर खास्सअ थक्कअ द होए, तिधी ढाकणअ मुंह सह। तेऊ छ़ुटणअ डरै दर्छ़णअ अर तेऊ संघे आदमी ठुहर्नै तिधा का डरै। तिधी निं मुंह राज़ै दाबेदा का सुआई होर कोहै मारनअ, 3तेखअ आणनैं मुंह तेऊए सोभ आदमी ताह सेटा लै। तूह बी च़ाहा सिधअ एकी ई मणछा मारनअ अर बाकी सारी परज़ा रहणीं राज्ज़ी राम्बल़ी।” 4अह गल्ल ज़ाण्हुंई अबशलोम अर तिन्नां संघै तिधी होरी इज़राईली का बेघै राम्बल़ी!
हुशाईए सलाह
5अबशलोमै बोलअ, “अरेकीए हुशाई आणा ओर्ही शादी, हुंह भाल़ूं हैनूं एते बारै तेऊए किज़ै सलाह आसा।” 6ज़ांऊं हुशाई आअ अबशलोमै बोलअ तेऊ लै इहअ, “आहीतपेलै दैनी हाम्हां लै एऊ साबै सलाह, तूह बी एऊ ई साबै बोला कि तेरी किज़ै होर सलाह आसा? तै बोल।” 7हुशाई दैनअ अबशलोमा लै ज़बाब, “ज़ुंण सलाह तम्हां लै एभै आहीतपेलै दैनी, मेरै साबै निं सह ठीक आथी! 8ताखा आसा आप्पै थोघ कि तेरअ बाब दाबेद अर तेऊए आदमी आसा ज़बर शूरबीर। एभै आसा तिंयां रोश्शै एही भाल्लणी ज़िहै करबैऊंणैं हुऐ दै ज़सरअ बच़अ हआ लुक्कअ द। तेरअ बाब आसा आप्पू ज़ाण-प्रबीण जोधअ अर सह डेओआ राची सुत्तदअ बी आपणीं सैना का दूर। 9ऐहा बेला हणअ सह किधी खात्ती या किधी होर्ती डुआरै लुक्कअ द। ज़ै दाबेद पैहलै ई थारै आदमी गोटे अर तिन्नां मांझ़ै खास्सै मारी पाए, इना गल्ला शूणीं बोल़णअ लोगा, ‘अबशलोमे आदमी हारै!’
10“तेखअ पल़णीं तेऊ शूरबीरा बी भितरी डअर ज़ुंण सिहा ज़ेही हिम्मत डाहा किल्हैकि सोभी इज़राईली का आसा थोघ कि तेरअ बाब आसा महान जोधअ अर तेऊ संघै आदमी बी आसा शूरबीर। 11मेरी सलाह आसा ताल्है एही कि दान मुल्खा उंधै बेर्शेबा तैणीं सारै देशै बस्सै दै इज़राईलीओ कर झाल़अ, तिंयां लोल़ी समुंदरे रेता ज़िहै खास्सै हुऐ संघा डेऊ तूह आप्पै जुधा लै। 12तेखअ दाबेद ज़िधी बी होए सह हेरनअ हाम्हां लोल़ी अर तेऊ मारदै पल़णअ हाम्हां नच़ानक चुटी ज़िहअ ज़िम्मीं दी ओश पल़ा, तेखअ नां सह बच़णअ अर नां तेऊए साथी मांझ़ै कुंण बच़णअ। 13तेखअ ज़ै सह कहा नगरी दी होए लुक्कअ द, तेता लै निंणै हाम्हां इज़राईली राश्शै संघा पाणअ हाम्हां नगरी फेरो गहल़ उंधै गाडा लै ढोल़ी। तेथ निं हाम्हां एक होछ़अ ज़िहअ पात्थर बी खल़अ छ़ाडणअ।”
14अबशलोम अर होरी इज़राईली बोलअ, “अरेकी हुशाईए सलाह आसा आहीतपेला का राम्बल़ी।” अह किअ बिधाता ई कि आहीतपेले राम्बल़ी सलाह बी लागी तिन्नां निक्की, ताकि अबशलोमा लै आफ़त पल़े।
हुशाई हेरी दाबेदा लै चतैनगी दैई
15तेखअ खोज़अ हुशाई सदोक अर अबतार प्रोहता का, “आहीतपेलै दैनी ती अबशलोम अर इज़राईली सैणैं लै एही-एही सलाह अर मंऐं दैनी एही सलाह। 16ऐबै करा तम्हैं छ़ेक्कअ! राज़ै दाबेदा लै दैआ समाद, ‘आझ़ राची निं दरैऊए बाढै रेगीस्तानै रही, तिधा का निखल़ै पार बाखा लै, इहअ निं हआ कि तिंयां ताह अर तेरै सारै आदमी ढाकी मारी पाए।’”
17अबतार प्रोहतो शोहरू जोनातान अर सदोक प्रोहतो शोहरू आहीमास रहै नगरी का दूर अनरोगल़ कुहै नेल़ न्हैल़ै लागी, किल्हैकि तिंयां निं सोभी नदरी नगरी भितरी डेऊई सकदै तै। एक दासी करा ती तिन्नां सेटा खोज़दी एछदी कि इहअ-इहअ हुअ अर तेखअ डेओआ तै तिंयां राज़ै दाबेदा सेटा खोज़दै। 18पर एकी धैल़ै हेरै तिंयां एकी शोहरू भाल़ी अर तेऊ खोज़अ अबशलोमा का। पर तिंयां दुहै निखल़ै तिधा का छ़ेक्कै-छ़ेक्कै संघा पुजै एकी मणछे घअरै ज़ुंण बहूरीम नगरी का थिअ, तेऊए खोल़ै त एक कुहअ अर तिंयां होथै तेथ भितरा लै उंधै। 19तेऊए लाल़ी ढोप्पअ कुहैओ मोहरअ च़ादरू करै संघा डाहअ तेथ प्रैंदै दल़अ द नाज़ शुक्कणैं पाई अर इहअ करै निं कोही का थोघ लागअ। 20अबशलोमे आदमी पुजै तेऊ घअरै संघा लागै तैहा बेटल़ी पुछ़दै, “आहीमास अर जोनातान किधी आसा?”
तैहा बोलअ, “मंऐं भाल़ै तिंयां गाडा पार टपदै।”
तिंयां रहै तिन्नां लोल़ै लागी पर तिन्नां निं तिंयां भेटै, खिरी डेऊऐ तिंयां एरुशलेम नगरी लै बापस फिरी। 21ज़ांऊं अबशलोमे आदमी तिधा का डेऊऐ, तेखअ निखल़ै आहीमास अर जोनातान कुहै का उझै संघा डेऊऐ राज़ै दाबेदा सेटा, तिन्नैं खोज़अ, “आहीतपेलै दैनी ती एही सलाह, ऐबै करा तम्हैं छ़ेक्कअ, तम्हैं डेओआ दरैऊआ पार।” 22दाबेद अर तेऊ संघै तिंयां सोभ आदमी लागै जरदण नदी पार टपदै अर राच भैणै का आजी गऐ तिंयां दरैऊआ पार निखल़ी।
23ज़ांऊं आहीतपेलै भाल़अ कि ज़ेही तेऊ सलाह दैनी, तेऊ साबै निं इनै किअ, तेऊ लाई आपणैं गाधै दी ज़ीन काठी संघा डेऊअ आपणीं नगरी लै बापस फिरी। संघा ज़ेही-ज़ेही गल्ला तेऊ आपणैं टांडै-टबरा का खोज़णीं ती, तिंयां डाही तेऊ खोज़ी अर आप्पू दैनी तेऊ फांसी संघा मूंअ! सह डाहअ तिन्नैं तिधी दाबी ज़िधी तेऊए दाद-बाब तै दाबै दै।
24दाबेद त गअ द माहानीम नगरी पुजी अर अबशलोम अर तेऊ संघै इज़राईली बी आऐ जरदण नदी पार टपी दाबेदा पिछ़ू। 25अबशलोमै बणाअं जोआबे ज़ैगा अमासा सैनापति। अमासो बाब च़ितरु त इशमाईली अर ईज ती राज़ै नहाशे शोहरी अबीगेल ज़ुंण जोआबे ईज सरूयाहे दाई थिई।
26अबशलोम अर तेऊए इज़राईली सैना पाऐ गलाद पुजी डेरै। 27दाबेद पुजअ माहानीम नगरी, तिधी आऐ दाबेदा सेटा लै नहाशो शोहरू शोभी अमोन मुल्खे रबाह नगरी का, लोदबेर नगरी का अमीएलो शोहरू माकीर, रोगल़ीमा का आअ गलादो बर्ज़िलै। 28तिन्नैं आणी मांदरी, डबरै, माट्टे भांडै, ज़ौ, कणक, मैदअ, भरठे मोल़ी, मसर, भुझ़ै दै छ़ोल्लै, 29मखीर, काच़अ घिऊ, भेडा-बाकरीए हेल़्ह अर गाऊईए दुधे दैंहीं अर पनीर। तिन्नां का थिअ थोघ कि दाबेद अर तेऊ संघै सोभ आदमी हणैं रेगीस्तानै भुखै-नचिशै अर थकै दै।
Currently Selected:
2 शमूएल 17: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
