2 इतिहास 27
27
यहूदा मुल्खै जताम राज़अ
(2 राज़ै 15:32-38)
1ज़धू जताम यहूदा मुल्खो राज़अ बणअ, तधू त सह पच्ची सालो। तेऊ किअ एरुशलेम नगरी का सोल़ा साला तैणीं राज़। तेऊए ईजा नाअं त जेरूशा अर सह थिई सदोके शोहरी। 2तेऊ किअ आपणैं बाब उज़ियाह ज़िहअ भलअ ज़ेता करै बिधाता खुश हआ। पर आपणैं बाब उज़ियाह ज़िहअ बिधाते भबनै पबित्र ज़ैगा डेऊई धूप ज़ाल़णै ज़िहअ पाप निं तेऊ किअ। पर हाँ लोग रहै तेऊए राज़ा दी पाप करदै लागी।
3बिधाते भबनै उतर दिशा बाखे प्रऊल़ बणाईं राज़ै जतामै अर ओपेल धारा नेल़ एरुशलेम नगरीए दुआलीए मराम्मत बी किई तेऊ। 4यहूदा धारा बाखे मुल्खै बसाऊई तेऊ नऊंईं नगरी अर उंधै रेगीस्ताना बाखा डाहै तेऊ गहल़-कोट च़िणीं। 5राज़ै जतामै किअ अमोनी राज़ै संघै जुध संघा ज़ितअ बी। तेखअ पल़ी ती अमनोनी लोगा यहूदा मुल्खे राज़ै लै चिई साला तैणीं हर साल च़ाल़्ही-च़ाल़्ही कुंटल़ च़ंदी, दस-दस हज़ार कुंटल़ कणक अर दस-दस हज़ार कुंटल़ ज़ौ सांठ दैणीं। 6जताम रहअ परमेशर बिधाता लै शुचअ-पाक्कअ अर सह हुअ खास्सअ बलबान राज़अ। 7ज़िहअ बी राज़ै जतामै किअ, तेऊ ज़ेतरै जुध किऐ, तिंयां सोभै गल्ला आसा यहूदा अर इज़राईल मुल्खे राज़े इतिहासे कताबा दी लिखी डाही दी। 8ज़धू जताम यहूदा मुल्खो राज़अ बणअ, तधू त सह पच्ची सालो। तेऊ किअ एरुशलेम नगरी का सोल़ा साला तैणीं राज़। 9ज़ांऊं जताम मूंअ, सह डाहअ दाबेदपूर गहल़ै राज़ै दाबणे मल्थाना दी दाबी अर तेऊओ शोहरू अहाज बणअ तेऊए ज़ैगा यहूदा मुल्खो राज़अ।
Currently Selected:
2 इतिहास 27: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
