2 इतिहास 25
25
यहूदा मुल्खै राज़अ अमास्या
(2 राज़ै 14:2-6)
1अमास्या ज़धू राज़अ बणअ, सह थिअ तधू पच्ची सालो अर तेऊ किअ एरुशलेम नगरी का उणत्ती साला तैणीं राज़। तेऊए ईजा नाअं आसा जेहोदी अर सह थिई एरुशलेम नगरी का। 2अमास्या किअ तिहअ ई ज़िहअ बिधाता च़ाहा त, पर तज़ी बी निं सह पठी शुचअ-पाक्कअ आथी त। 3ज़िहअ ई सह यहूदा मुल्खो राज़अ बणअ, तेऊ किऐ तिंयां कैद संघा पाऐ तिंयां मारी ज़ुंणीं तेऊओ बाब मारी पाअ त। 4पर तिन्नें शोहरू-माठै निं तेऊ मारै आथी। तेऊ किअ आपणैं साबै तिहअ ई ज़िहअ मोसा गूरे बधाने कताबा दी बिधाता हुकम आसा किअ द, “ज़ै कसरै शोहरू ज़ुल्म किअ होए, तेता पिछ़ू निं तेऊए ईजा-बाबा लै मौते सज़ा दैई अर नां कसरै ईजा-बाबे ज़ुल्मा पिछ़ू शोहरू लै मौते सज़ा दैई। ज़ुंण दोशी आसा, सज़ा बी लोल़ी तेऊ ई भेटी।”
एदोमी संघै जुध
(2 राज़ै 14:7)
5राज़ै अमास्या दैनअ यहूदा अर बिन्यामीन गोत्रा लै समाद संघा शादै तिन्नां मांझ़ै सोभ मर्ध ज़सरी अमर बिहा साला का उझै थिई। इहअ करै डेऊऐ चअन लाख लोग राज़धानी एरुशलेम नगरी लै। तिंयां सोभ तै जुध करनै जोगी कतीर अर ढाल़ा करै जुध करना लै सज़ाण। राज़ै अमास्या बणाऐं तिन्नें टोलीए साबै ज़ुदै-ज़ुदै दल संघा सभाल़ै तिंयां सैनापति अर दलपति का। 6एता का लाऊआ आणै उतरा बाखा इज़राईला का एक लाख सपाही अर तेता लै दैनअ च़ाल़्ही कुंटल़ च़ंदी। 7पर बिधातो एक गूर आअ राज़ै अमास्या सेटा, तेऊ बोलअ, “एप्रैमे आद-लुआद इना इज़राईली सपाही निं आप्पू संघै जुधा लै निंईं। किल्हैकि बिधाता निं उतरा बाखा बस्सै दै इज़राईली संघै आथी!” 8तूह ता समझ़ा इहअ कि इना करै भेटणअ ताह जुधा लै होर बी बल, पर ज़ीत अर हार आसा परमेशरे हाथै। बिधाता हेरनअ तूह तेरै दुशमणा का ज़ताऊई।
9राज़ै अमास्या पुछ़अ परमेशरो सह गूर, “इने बदल़ै ज़ुंण च़ंदी मंऐं इज़राईली लै दैई हेरी, ऐबै तेतो किज़ै हणअ?”
गूरै बोलअ इहअ, “बिधाता हेरनअ ताल्है तेता का खास्सअ होर दैई!” 10तेखअ बोलअ अमास्या तिन्नां उतरा बाखा बस्सै दै एप्रैम गोत्रे इज़राईली मांझ़ै शादै दै सपाही लै कि तम्हैं डेओआ बापस फिरी। इहअ करै डेऊऐ तिंयां फिरी पर एता लै हुऐ तिंयां यहूदे लोगा लै रोश्शै लाल-पिंऊंल़ै।
11तेखअ किई अमास्या हिम्मत संघा डेऊअ आपणीं सैना संघा लई जुधा लै संघा पुजअ लूंणै खागै। तेऊ जुधा दी पाऐ तिन्नैं दस हज़ार एदोमी सपाही मारी। 12होर दस हज़ार सपाही किऐ तिन्नैं यहूदी कैद संघा निंयैं उझै उछ़टै चेचा प्रैंदा लै अर तिधा का शोटै तिंयां ढेक्का अर तिंयां सोभ हुऐ मरी हक्क।
13एसी ज़ुंण इज़राईली सैनो दल ज़ुंण राज़ै अमास्या आपणैं घअरा लै बापस छ़ाडै तै, तिंयां पल़ै बाता सामरी अर बेथ-हारोन मांझ़ै बस्सी दी यहूदी नगरी लै चुटी अर तेथ बस्सै दै यहूदी मांझ़ै पाऐ तिन्नैं चअन हज़ार मणछ मारी संघा पाई तिन्नें ज़ैदात लुटी।
14ज़ांऊं राज़अ अमास्या एदोमी का जुध ज़िती करै बापस फिरअ, तेऊ आणै आप्पू संघै एदोमी लोगे देअए मुहुर्ती बी! तेखअ डाही तेऊ तिंयां मुहुर्ती एरुशलेम नगरी स्तापी अर तेखअ लागअ तेथ बी धूपा ज़ाल़दअ अर माथै टेक्कदअ! 15अमास्या राज़े एऊ कामां करै आई बिधाता तेऊ लै रोश्शै अर बिधाता छ़ाडअ तेऊ सेटा आपणअ एक गूर पुछ़दअ, “तूह किल्है आसा इना पराऐ देअआ-देबीए मुहुर्ती पूज़दअ लागअ द ज़ुंण ताखा आपणैं लोगा बी निं बच़ाऊई सकै?”
16सह गूर त बोल्दअ ई लागअ द कि अमास्या बोलअ तेऊ लै इहअ, “च़ुप्पी रह, नांईं ता हुंह पाऊं ताह मारी! तूह कै हाम्हैं राज़ै लै सलाह दैणैं आल़अ बज़ीर हेरअ बणाईं?”
सह गूर हुअ च़ुप्पी पर एतरअ लअ तेऊ तज़ी बी बोली, “एतरअ गअ मुखा ज़ाण्हुंई कि बिधाता आसा डाही दी कि तूह करनअ ऐबै बरैबाद ई! किल्हैकि एक ता किअ तंऐं पाप अर दुजअ निस्सअ तूह मेरी सलाह शूणीं।”
इज़राईली संघै जुध
(2 राज़ै 14:8-20)
17यहूदा मुल्खे राज़ै अमास्या किअ आपणैं कार-करिंदै संघै जोग। तेखअ दैनअ जोअहाजे शोहरू ज़ैऊए पोचै इज़राईले राज़ै जोआशा लै समाद, “ज़ै हिम्मत थिऐ कर जुधा लै मेरअ मकाबलअ!” 18इज़राईले राज़ै जोआशै दैनअ यहूदे राज़ै अमास्या लै इहअ समाद बापस, “लाबानोन बणैं झ़िंझ़रे कांडै दैनअ केल़ुई लै समाद, ‘तूह कर आपणीं केल़टीओ बैह मेरै झ़ुंभल़ू संघै।’ तेतरी डेऊअ तेस्सी बाती एक बणों ज़ीब संघा दर्ल़अ झ़िंझ़रै कांडैओ झ़ुंभल़ धरनीं! 19तूह ज़ितअ एदोमी का, तै आसा एभै तूह इहअ हुल्लअ-फुल्लअ हुअ द। तिन्नां डिंगा मारदी रह आपणैं घअरै बेशी। तूह किल्है आसा आप्पू लै आफ़त खल़ी करदअ लागअ द? इहअ करै हणीं तेरी अर यहूदा तेरी परज़े बरैबादी!”
20पर अमास्या निस्सअ मनी, बिधाता दैनअ हणैं कि राज़अ अमास्या अर तेऊए सैना हारे किल्हैकि तिंयां थिऐ एदोमी देअआ पूज़दै लागै दै। 21तेखअ निखल़अ इज़राईलो राज़अ जोआश यहूदा बाखा लै अर यहूदे राज़ै अमास्या किअ तेऊ संघै बेथ-शमेश नगरी मकाबलअ। 22तेऊ जुधा लै हारी यहूदे सैना इज़राईला का पठी अर तिन्नें सारी सैना ठुर्ही आपणैं-आपणैं डेरै लै। 23इज़राईले राज़ै जोआशै किअ जोअहाजो पोचअ अर जोआशो शोहरू यहूदो राज़अ अमास्या बेथ-शमेश कैद संघा निंयं आप्पू संघै। तेखअ डेऊअ सह एरुशलेम नगरी संघा पाअ एप्रैम प्रऊल़ी पोर्ही कूणींए प्रऊल़ी तैणीं नगरी फेरो गहल़ कोई च़ार शौ हाथ ढोल़ी। 24तेऊ ज़ेतरअ बी सुन्नअ-च़ंदी भेटअ, बिधाते भबन अर राज़े मैहलै भढारै ज़ेतो पहरअ ओबेद-एदोमे आद-लुआद करा तै, तेथ ज़ेतरै बी सुन्नैं-च़ंदीए भांडै थिऐ, तिंयां निंयैं तेऊ सामरी नगरी लै अर ज़ुंण कैद किऐ, तिंयां बी निंयैं आप्पू संघा।
25यहूदा मुल्खो राज़अ अमास्या रहअ इज़राईले राज़ै जोअहाजे शोहरू जोआशा मरनै बाद पंद्रा साला तैणीं ज़िऊंदअ। 26अमास्या राज़े ज़ुंण बी काम किऐ, तिंयां आसा शुरू का खिरी तैणीं यहूदा अर इज़राईल मुल्खे राज़े इतिहासे कताबा दी लिखी डाहै दै। 27ज़िहअ ई राज़अ अमास्या बिधाता लै विश्वास घात करदअ लागअ, तेखअ हुऐ एरुशलेम तेऊए कई लोग द्रोही अर सह ठुर्हअ तिधा का लकीश नगरी लै पर तेऊए दुशमण पुजै तेऊ पिछ़ू तिधी बी संघा पाअ सह मारी। 28तेऊए ल्हास आणी घोल़ै प्रैंदै यहूदा एरुशलेम नगरी लै संघा डाहअ सह दाबेदपूर राज़ै दाबणे ज़ैगा दाबी।
Currently Selected:
2 इतिहास 25: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
