2 इतिहास 21
21
1खिरी ज़ांऊं राज़अ जहोशापात मूंअ, सह डाहअ दाबेदपूर नगरी दाबी अर तेऊ बाद बणअ तेऊओ शोहरू जेहोराम यहूदा मुल्खो राज़अ।
यहूदा मुल्खो राज़अ जेहोराम
(2 राज़ै 8:17-24)
2इज़राईल मुल्खे राज़ै जहोशापाते तै सात शोहरू, जेहोराम त सोभी का ज़ेठअ अर तेऊ कान्हैं तै छ़ह शोहरू अजर्याह, जेहीएल, जकर्या, अजर्याह, मिकाईल, शपताह। 3जहोशापातै दैनअ तिन्नां सोभी लै सुन्नअ, च़ंदी अर होर बी खास्सी किम्मती च़िज़ा ज़ैदात बांडी। संघा सभाल़ी तिन्नां सोभी लै यहूदा मुल्खै एक-एक गहल़ा आल़ी नगरी। 4पर ज़ांऊं जेहोरामै यहूदा मुल्खै राज़-काज़ सभाल़अ, तेऊ पाऐ आपणैं सोभ कान्हैं भाई मारी अर तिन्नां संघै मारै थोल़ै इज़राईली कार-करिंदै बी!
5जेहोराम बणअ बत्ती साले अमरा राज़अ अर तेऊ किअ एरुशलेम नगरी का इज़राईल मुल्खै आठा साला तैणीं राज़। 6तेऊए राणीं ती अहाब राज़ेए देई अर इज़राईले राज़ै अहाबे खिंबा ज़िहअ किअ जेहोरामै बी सह ई पाप ज़ेता बिधाता नांईं च़ाहंदअ त कि सह करे। 7पर बिधाता निं यहूदा बरैबाद करनअ च़ाहंदअ त, किल्हैकि तेऊ ती आपणैं दास दाबेदा संघै करार किई दी कि तेऊए आद-लुआदा मांझ़ै रहणअ यहूदा दी कुंण नां कुंण राज़अ बणी।
8जेहोरामे राज़ा दी हुअ एदोम देश यहूदे गलामी का आज़ाद संघा बणाअं तिन्नैं आपणअ एक राज़अ। 9राज़ै जेहोराम अर तेऊए कार-करिंदै किऐ आपणैं सारै रथ कठा संघा पुजअ एदोम। तिधी गोटै तिंयां एदोम देशे सैना फेर-फिरदै। तैहा राची निखल़ै तिंयां तिधा का बडी मस्सा बच़ी। 10इहअ करै हुअ एदोम यहूदा का आज़ाद अर सह आसा आझ़ तैणीं बी#21:10 आझ़ तैणीं बी ऐहा कताबा लिखणे ज़मानै तैणीं तिहअ ई। लिब्ना नगरी बी हुई तेऊ ई ज़मानै यहूदा का आज़ाद। किल्हैकि जेहोराम राज़अ हुअ त आपणैं दादा-बाबे परमेशर बिधाता का दूर। 11होर ता होर तेऊ डाहै यहूदा मुल्खे ज़ैगा-ज़ैगा धारा मुहुर्ती पूज़ा करने कंज़रै गान-स्तान भिई बणाईं अर संघा कराऊअ एरुशलेम अर यहूदा मुल्खे परज़ा का मुहुर्ती पूज़ा करनैओ पाप ज़ेता बिधाता नांईं च़ाहंदअ त कि तिंयां करे।
12एलियाह गूरै दैनअ राज़ै जेहोरामा लै च़िठी लिखी इहअ समाद, “मेरअ समाद आसा ताल्है तेऊ परमेशर बिधाता बाखा ज़हा तेरअ दाद-बाब दाबेद मना त। तेऊ बिधाता का आसा शुझदअ लागअ द कि तंऐं निं आपणैं बाब यहूदा मुल्खै राज़ै जहोशापात अर आपणैं दादू आसाह राज़ै ज़िहअ भलअ किअ! 13तंऐं किअ तेता का उंबल़अ! तंऐं किई इज़राईल मुल्खे पापी कंज़रै राज़ै ज़ेही नकल। तंऐं किऐ एरुशलेम अर यहूदा मुल्खे परज़ा बिधाता का दूर, ज़िहअ अहाब राज़ै अर तेऊए आद-लुआदै इज़राईल मुल्खै किअ त! तंऐं पाऐ आप्पू कान्हैं आपणैं सक्कै भाई तोही मारी ज़ुंण ताखा राम्बल़ै थिऐ! 14एतो नतिज़अ हणीं ताल्है घोर आफ़त! बिधाता दैणीं तेरी परज़ा, तेरै शोहरू, तेरी बेटल़ी लै घोर सज़ा। तेरी ज़ैदात करनी तेऊ पठी बरैबाद अर तेरअ राज़ हणअ खतम। 15ताह लागणीं आंजा दी लागणीं एही नबिज़री बमारी कि पेटै दाहे झोशा करै निखल़णीं तेरी आंजा बी बागै।”
राज़ै जेहोरामे खिरीए धैल़ै
16बिधाता किअ इहअ कि कूश देशा नेल़ बस्सै दै पलिश्ती अरब देशे लोग ज़िधूऐ राज़ै जेहोरामा लै। 17तिन्नैं छ़ेल़अ यहूदा मुल्खा संघै जुध। तिन्नां एरुशलेम राज़े मैहलै ज़ेतरी ज़ैदात भेटी, सह लुटी तिन्नैं पठी। तिन्नैं निंयैं राज़ै जेहोरामे सोभ बेटल़ी अर सोभ शोहरू आप्पू संघै कैद करी। जेहोराम राज़ै सेटा छ़ाडअ सिधअ तेऊओ सोभी कान्हअ शोहरू अहाजया।
18इना एतरी गल्ला हणैं बाद दैनी बिधाता जेहोरामा आंजा दी लागी नबिज़री बमारी लागणै अर तेऊ लागी पेटै दाहे झोशा। 19दाह रही बढदी ई लागी अर तेऊ लागी पेटै दाहे एही झोशा कि आंजा बी निखल़ी बागै अर खिरी हुई कोई दूई साला बाद तेऊए मौत। तेऊ मरनै बाद निं तेऊए अदर करना लै निं परज़ा खुशबूदार मसालै ज़ाल़ी आगीओ घैनअ पाअ ज़िहअ तेऊए दादा-बाबा लै लोग करा तै।
20जेहोराम बणअ बत्ती साले अमरा राज़अ अर तेऊ किअ एरुशलेम नगरी का इज़राईल मुल्खै आठा साला तैणीं राज़। तेऊ मरनैओ दुख निं कोही हुअ। सह डाहअ तिन्नैं दाबेदपूर नगरी दाबी पर तिन्नां घोरी दी निं तिन्नैं सह दाबअ ज़िधी खासकर राज़ै दाबा तै।
Currently Selected:
2 इतिहास 21: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
