1 शमूएल 16
16
1बिधाता बोलअ तेखअ शमूएला लै इहअ, “ताह कधू तैणीं रहणअ शाऊले तैणीं हिक्का पटाक्कदै लागी? हुंह निं च़ाहंदअ कि शाऊल आजू इज़राईलीओ राज़अ रहे! शींगा दी निंऊं जैतूनो तेल भरी संघा डेऊ बेतलेम नगरी ईशैई नाओंए मणछा सेटा, किल्हैकि तेऊए शोहरू मांझ़ै आसा मंऐं एक ज़ण्हअ इज़राईलीओ राज़अ लाअ द बणाईं।”
2शमूएलै बोलअ इहअ, “मेरै भलै किधी च़ाल्लअ इहअ हई, ज़ै शाऊला का थोघ लागे, तेऊ पाणअ हुंह मारी!”
बिधाता बोलअ शमूएला लै, “तूह निंयैं आप्पू संघै एक बाछ़ू संघै बोलै इहअ, ‘हुंह आसा बिधाता लै हूम करदअ आअ द।’ 3हूमा लै करै ईशैई लै बी छ़ांदअ अर तेखअ खोज़ूं हुंह कि ताह किज़ै करनअ। ज़हा हुंह खोज़ूं तूह करै मुंह बाखा तेऊओ राज़ै हणां लै अभिषेक।”
4शमूएलै किअ ज़िहअ बिधाता बोलअ त तिहअ ई। सह डेऊअ बेतलेम नगरी लै, नगरीए सैणैं आऐ डरदी-काम्बदी तेऊ सेटा लै संघा पुछ़अ इहअ, “तूह राज्ज़ी-खुशी दी आअ कि किज़ै होर गल्ल आसा?”
5शमूएलै दैनअ ज़बाब, “हुंह आअ बिधाता लै राज्ज़ी-खुशी दी हूमा करदअ, तम्हैं सोभै करा आप्पू शुचै संघा एछा मुंह संघै हूमा लै।” शमूएलै दैनअ ईशैई अर तेऊए शोहरू लै बी छ़ांदअ कि शुचै हई एछा हूमा लै।
6ज़ांऊं ईशैई अर तेऊए शोहरू आऐ, शमूएले सोठअ तेऊए शोहरू एलीआबा लै, “अह ज़ुंण मणछ इधी आसा खल़्हुअ द, बिधाता हणअ अह ई छ़ांटअ द।” 7पर बिधाता बोलअ शमूएला लै, “तूह निं इहअ भाल़अ लागै कि अह आसा हेरनअ बित्तअ अर खास्सअ लाम्मअ। मंऐं अह आथी छ़ांटअ द किल्हैकि हुंह निं तेऊ साबै भाल़दअ ज़िहै मणछ भाल़ा। मणछ भाल़ा बाघलअ रूप पर हुंह भाल़ा मणछो दिल कि सह किहअ आसा।”
8ईशैई शादअ आपणअ शोहरू अबीनादाब संघा छ़ाडअ सह शमूएला सेटा। शमूएलै बोलअ, “बिधाता निं अह बी छ़ांटअ आथी।” 9तेखअ शादअ ईशैई आपणअ शोहरू शमाह। शमूएलै बोलअ, “अह बी निं बिधाता छ़ांटअ आथी।” 10इहअ करै छ़ाडै ईशैई आपणैं सात शोहरू बारी-बारी शमूएला सेटा, पर शमूएलै बोलअ, “बिधाता निं इना मांझ़ै कोहै छ़ांटअ आथी!” 11तेखअ पुछ़अ शमूएलै ईशैई का, “सोभ एछी गऐ कि तेरै होर शोहरू बी आसा?”
ईशैई दैनअ ज़बाब, “नांईं, सोभी का कान्हअ आसा एक होर, सह आसा भेडा-बाकरीए हेल़्ही फुआल डेऊअ द।”
शमूएलै बोलअ ईशैई लै, “तेऊ आण ओर्ही शादी, ज़ेभै तैणीं सह इधी निं पुजे, तेभै तैणीं निं हाम्हां रोटी खांदै बेशणअ।” 12ईशैई छ़ाडै फुआला बणां लै आदमी संघा शादअ सोभी का कान्हअ शोहरू तेऊ नाअं त दाबेद। सह थिअ मोट्टअ-धोटअ अर हेरनअ बित्तअ, तेऊए आछी भाल़णेंओ बी लागा त लोभ। बिधाता बोलअ शमूएला लै, “अह आसा सह! उझ़ू जैतूनो तेल तरैल़ एऊए मुंडै।” 13शमूएलै तरैल़अ तेऊए मुंडै शींगा का जैतूनो तेल अर तेऊए होर भाई तै तिधी भाल़ै लागै दै। तेभी आई बिधाते पबित्र आत्मां दाबेदा लै संघा बस्सी तेऊ दी। तेखअ डेऊअ शमूएल रामाह नगरी लै फिरी।
दाबेद शाऊला सेटा
14बिधाते पबित्र आत्मां निखल़ी शाऊला का पोर्ही अर बिधाता दैनअ तेऊ दी भूत बस्सणै। 15शाऊले दास लागै तेऊ लै इहअ बोल्दै, “बिधाता दैनअ ताह दी भूत बस्सणै, सह लागअ ताह डरैऊंदअ। 16मेरै मालक, तूह कर हाम्हां लै हुकम, हाम्हैं आणू इहअ मणछ लोल़ी ज़ुंण बधिया बींन ज़ाणा बाज़ी। तेखअ ज़ेभै बी परमेशरा बाखा सह भूत ताह काबू करे, तेभै-तेभै बाज़णीं तेऊ बींन, संघा हणअ तूह राम्बल़अ।”
17शाऊलै किअ तिन्नां लै हुकम, “ठीक आ, ज़ुंण सोभी का बधिया बींन ज़ाणा बाज़ी, तेऊ आणा लोल़ी मुंह सेटा लै।”
18तिन्नां मांझ़ै बोलअ कुंणी इहअ, “शूणां, मंऐं भाल़अ द बेतलेम नगरीए ईशैईओ शोहरू दाबेद, सह बाज़ा बेघै बधिया बींन। सह हेरनअ बी आसा बित्तअ, गल्ला बी करा अक्लीए अर सह आसा बी शूरबीर। बिधाता रहा तेऊ संघा।”
19शाऊलै छ़ाडै आपणैं दूत ईशैई सेटा इहअ समाद लई, “तेरअ शोहरू दाबेद ज़ुंण भेडा-बाकरीए हेल़्ही फुआल हआ, तेऊ छ़ाड मुंह सेटा लै।” 20ईशैई छ़ाडअ दाबेद शाऊला सेटा लै, तेऊ संघै दैनअ एक छ़ेल्हू, रोटी करै दैनअ एक गाधअ लादी अर एक खाल्हल़अ दैनअ दाखे रसो भरी। 21दाबेद पुजअ शाऊला सेटा संघा हआ त धैल़ तेऊए च़ाकरी लै खल़अ। शाऊला गम्मअ दाबेद अर तेऊ डाहअ सह आप्पू संघै तेऊए अस्त्र-शस्त्रा ढोणै आल़अ। 22शाऊलै दैनअ ईशैई लै इहअ समाद, “मुंह गम्मअ तेरअ शोहरू दाबेद, ऐबै दै एऊ मुंह ई सेटा रहणैं।” 23ज़ेभै-ज़ेभै परमेशर शाऊला लै तेऊ भूता शाचणैं दैआ थिअ, तेभै-तेभै बाज़ा त दाबेद बींन अर तेखअ निखल़ा त सह भूत पोर्ही अर तेखअ हआ त शाऊल राम्बल़अ।
Currently Selected:
1 शमूएल 16: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
