1 राज़ै 9
9
बिधाता आअ भिई राज़ै सुलैमाने सुपनै
(2 इतिहास 7:11-22)
1राज़अ सुलैमान मुक्कअ त बिधाता लै भबन अर आप्पू लै मैहल बणाईं, होर बी ज़िहअ सह च़ाहा थिअ, तेता बी मुक्कअ सह बणाईं। 2तेखअ हुअ बादा का इहअ कि बिधाता किई सुलैमाना संघै भिई सुपनै गल्ला ज़ेही तेऊ संघै बिधाता गबोन सुपनै गल्ला किई ती।#1 राज़. 3:5; 2 इति. 1:7 3बिधाता बोलअ तेऊ लै इहअ, “मंऐं शूणीं तेरी अरज़ अर सह बी कि तूह किज़ै च़ाहा कि हुंह करूं। ज़ुंण तंऐं मुल्है अह भबन बणाअं, अह ज़ैगा छ़ांटी मंऐं सदा लै ज़िधी सदा मेरी पूज़ा-गाज़ा होए। इधी रहणअ हुंह कबल्लअ भाल़अ लागी। 4ज़ै तूह आपणैं बाब दाबेदा ज़िहअ शुचअ-पाक्कअ रही मेरी च़ाकरी करे अर ज़ै तूह मेरअ बधान अर तेते सोभी बिधी मने, 5तै हणीं मेरी सह ज़बान पूरी ज़ुंण मंऐं तेरै बाब दाबेदा लै बोलअ त कि तेरी आद-लुआदा मांझ़ै हणअ एक ज़ण्हअ इज़राईला दी सदा राज़अ।#1 राज़. 2:4
6“पर ज़ै तूह कि तेरै आद-लुआद मेरै हुकम नांईं मने अर होरी देअआ पूज़दै लागे, 7तेखअ निं हुंह आपणीं परज़ा इज़राईली तैहा ज़ैगा रहणैं दैंदअ ज़ुंण मंऐं तिन्नां लै दैनी ती। तेखअ अह भबन ज़ुंण मंऐं आपणीं पूज़ा करना लै मनअ, एथ बी लागणै बाण-भेखल़। तेखअ हणैं इज़राईली होरी देशा लै हास्सणां अर सुहांगा लै। 8तेखअ रहणीं एऊ भबनै सिधी पात्थरे डिंगरी! एसी बाती एछदै नांहंदै लागणअ एता भाल़ी प्राच अर तिंयां हणैं रहैन संघा बोल़णअ, ‘एऊ देशा अर एऊ भबना संघै बिधाता इहअ किल्है किअ?’#2 राज़. 25:9; 2 इति. 36:19 9तेखअ बोल़णअ होरी लोगा इहअ, ‘इज़राईली मणछै छ़ाडअ आपणअ परमेशर बिधाता मनणअ ज़ुंणीं तिंयां मिसर देशा का काढी आणै तै! ऐबै लागै तिंयां होरी देअआ पूज़दै। तैही पाई बिधाता ईंयां सोभै खरी तिन्नां लै।’”
सुलैमाने हिरामा संघै करार
(2 इतिहास 8:1,2)
10राज़ै सुलैमाना लागी बिधाता लै भबन अर आप्पू लै मैहल बणाणां लै कोई बिह साला। 11सूर देशे राज़ै हिरामै दैनै तै सुलैमाना लै ज़ेतरै तेऊ लोल़ी तेतरै कैली अर केल़ुईए काठ अर सुन्नअ। ज़ांऊं सारअ काम मुक्कअ, राज़ै सुलैमानै दैनै हिरामा लै गलील मुल्खे बिह नगरी। 12हिराम पुजअ सूर देशा का तिधी संघा भाल़ी तिंयां नगरी अर तेऊ निं सुलैमानै दैनी दी तिंयां नगरी गम्मी आथी। 13राज़ै हिरामै बोलअ राज़ै सुलैमाना लै, “सुलैमान, मेरै साथीआ, लै तंऐं मुल्है ईंयां नगरी दैनी!” हिरामै डाहअ तिन्नां नगरी नाअं काबूल कि ईंयां आसा बृथा। अह नाअं आसा आझ़ तैणीं बी पल़अ द। 14हिरामै दैनअ राज़ै सुलैमाना लै कोई च़ाल़्ही कुंटल़ सुन्नअ।
सुलैमाने होर काम
(2 इतिहास 8:3-18)
15ज़ांऊं सुलैमान बिधाता लै भबन अर राज़ मैहलो सारअ काम करी मुक्कअ, तेखअ ज़ेतरै बी राज़े बेठी खटणै आल़ै लोग थिऐ, तिंयां डाहै तेऊ भबन अर एरुशलेम नगरी फेर गहल़ा च़िणदै लाई। तेखअ च़िणीं तेऊ हसोर, मगिदो अर गज़ेर नगरी। 16पैहलै हुअ त इहअ कि गज़ेर नगरी गिम्मी ती मिसर देशे माहा राज़ै, तेऊ चैल़ी ती सारी नगरी दी आग संघा पाऐ तै तिधी रहणैं आल़ै कनानी लोग मारी। बादा का ज़ांऊं तेऊए शोहरीओ बैह राज़ै सुलैमाना संघै हुअ, तेखअ दैनी तेऊ सह नगरी आपणीं शोहरी लै। 17सुलैमानै च़िणीं गज़ेर नगरी भिई। उंधलै बेथ-हारोन नगरी बी डाहै तेऊ आपणैं बेठू भिई च़िणदै लाई। 18यहूदा रेगीस्तानै बालात अर तदमोर नगरी, 19ज़ेतरी नगरी दी सुलैमाने ज़िणसीए भढार अर रथ-घोल़ै थिऐ, तिंयां नगरी बी च़िणीं तेऊ भिई। एरुशलेम, लाबानोन अर ज़ेतरी बी नगरी दी तेऊओ राज़ त, तिंयां नगरी किई सुलैमानै ज़िहअ सह च़ाहा त तेही पाक्की। 20-21सुलैमान राज़े बेठू तै तिंयां ज़ुंण तिन्नां कनानी लोगे आजू आद-लुआद ज़ुंण इज़राईली कनान देशे ज़ैगा गिम्मदी बारी ज़िऊंदै छ़ाडै तै। तिंयां थिऐ अमोरी, हित्ती, परिजी, हिब्बी, जबेशी। ईंयां लोग आसा आझ़ तैणीं#9:20-21 आझ़ तैणीं ज़धू अह कताब लिखी, तधू तैणीं बी इज़राईलीए गलाम। 22पर इज़राईली मांझ़ै निं सुलैमानै कोहै गलाम बणाअं, इज़राईली हआ तै तेऊए कार-करिंदै, सैना दी, सैनापति अर रथ अर घोल़ै शुंआरीए दलपति।
23बेठू प्रैंदै कामां कराऊंणै आल़ै अफसर थिऐ पांज़ शौ पज़ाह ज़ण्हैं, ज़ुंण सुलैमाने ज़ैगै-ज़ैगै कामां भाल़ै हआ तै।
24सुलैमाने राणीं ज़ुंण मिसर देशे माहा राज़ेए देई थिई, सह आई दाबेदपूरा का तेऊ नऊंऐं मैहला लै ज़ुंण सुलैमानै बणाअं त। तेखअ डाहअ पुर्बा बाखा नगरी दी कोट च़िणीं।
25सुलैमानै बिधाता लै ज़ुंण बेदी ती बणाईं दी, तेथ करा त सह हर साल चिई बारी बिधाता लै हूम अर मेल़-ज़ोल़ो बल़ीदान करी अर बिधाता लै धूप ज़ाल़ी। इहअ करै छ़ेक्कअ तेऊ बिधातो भबन बणाईं।#लुआ. 23:17; 34:23; बधा. 16:16
26एदोम मुल्खै एलात नगरी नेल़ लाल समुंदरे बाढै एजोन-गेबर बणाऐं राज़ै सुलैमानै पाणींए खास्सै ज़हाज़ बी। 27तिन्नां ज़हाज़ा दी छ़ाडै राज़ै हिरामै आपणैं ज़ाण-प्रबीण सपाही सुलैमाने आदमी संघै काम करदै। 28तिंयां डेऊए ओपीर नगरी अर तिधा का आणअ तिन्नैं एक शौ शाठ कुंटल़ सुन्नअ राज़ै सुलैमाना लै।
Currently Selected:
1 राज़ै 9: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
