1 राज़ै 8
8
बिधाते करारो मणशू पजैल़अ भबना भितरी
(2 इतिहास 5:2—6:2)
1तेखअ शादै राज़ै सुलैमानै सोभी गोत्र अर टोली का इज़राईली सैणैं एरुशलेम नगरी लै एही गल्ला करना लै कि बिधाते करारो मणशू निंणअ सियोन दाबेदपूर गहल़ा का बिधाता लै बणाऐं दै भबना लै।#2 शमू. 6:12-16; 1 राज़. 15:25-29 2इज़राईली सोभ सैणैं हुऐ छ़ानींए थैरा बाती शऊजै राज़ै सुलैमाना सेटा कठा।#लेब. 23:34 3ज़ांऊं तिधी सोभ इज़राईली सैणैं पुजै, प्रोहतै च़कअ बिधाते करारो मणशू 4संघा पजैल़अ बिधाते भबना भितरी। प्रोहतै अर लेबी निंयैं करारे मणशू संघा तिंयां सोभ पबित्र भांडै अर सारअ समान ज़ुंण मेल़-ज़ोल़े खिम्भा दी थिऐ। खिम्भ बी निंयं तिन्नैं खोल्ही करै उझै। 5राज़अ सुलैमान अर इज़राईली टोली का ज़ेतरै बी लोग तिधी तै आऐ दै, तिंयां लागै करारे मणशू आजू हांढदै अर बाता काटै तिन्नैं एतरै खास्सै रिठ अर होर पशूए हेल़्ही कि तिन्नां निं कुंण गणी सकदअ त। 6तेखअ पजैल़अ प्रोहतै सह करारो मणशू बिधाता लै बणाऐं दै भबना भितरी तैहा ज़ैगा ज़ेता लै खास पबित्र ज़ैगा बोला तै, संघा डाहअ तिन्नां करूब नाओंए स्वर्ग दूते फैंखा हेठै बशैल़ी। 7तिंयां करूबे फैंख तै इहै कि करारो मणशू आअ तेते लोहल़ी संघी तेथ हेठै। 8करारे मणशू दी लाई दी लोहल़ी ती एही लाम्मी कि तिंयां जाआ ती भितरी खास पबित्र ज़ैगा आजू सम्हनै का शुझुई पर होर्ता का निं तिंयां किधी का शुझदी ती। तिंयां लोहल़ी आसा आझ़ तैणीं बी तिधी। 9करारे मणशू भितरी निं तिन्नां दूई पात्थरे शिला सुआई होर किछ़ै आथी त ज़ुंण तेथ होरेब धारा का एछी मोसा गूरै तधू डाही ती ज़धू बिधाता इज़राईली संघै मिसर देशा का एछदी बारी करार किई ती।#बधा. 10:5
10ज़ांऊं प्रोहत खास पबित्र ज़ैगा का बागै निखल़ै, तिधी घोर्हुऐ बिधाते भबना फेर घणैं बादल़।#लुआ. 40:34,35 11तिन्नां बादल़ा करै निस्सअ बिधाते भबनै च़ाकरी करनै आल़ै प्रोहते खल़ै टेखुई किल्हैकि बिधाते भबनै लाई बादल़ा जैंदरी लागअ धुप्पै ज़िहअ झ़ामण अर बिज़ल़ीए झ़प्प-तल़प्पी। 12#भज. 18:11; 97:2तेखअ किई राज़ै सुलैमानै एही अरज़,
“हे बिधाता, तंऐं आसा सरगै सुरज़ टकैल़अ द,
तज़ी बी आसा तंऐं इहअ बोलअ द कि ताह रहणअ घणैं न्हैरै बादल़ा जैंदरी,
13ऐबै बणाअं मंऐं ताल्है रहणा लै महान भबन,
एथ लोल़ी तूह जुगै-जुगै तैणीं रहअ।”
सुलैमानै दैनअ परज़ा लै भाषण
(2 इतिहास 6:3-11)
14सोभ इज़राईली तै तिधी खल़्हुऐ दै, तेखअ फिरअ राज़अ सुलैमान तिन्नां बाखा लै अर तेखअ किई बिधाता सेटा अरज़ कि तिन्नां लै बर्गत दैए। 15सुलैमानै बोलअ इहअ, #2 शमू. 7:4-11; 1 इति. 17:3-10“इज़राईले परमेशर बिधाते लोल़ी सदा ज़ै-ज़ैकार हुई! तेऊ ज़ुंण ज़बान मेरै बाब दाबेदा लै दैनी ती, सह किई आझ़ तेऊ पूरी। तेऊ बोलअ त इहअ, 16‘ज़धू मंऐं आपणीं परज़ा मिसर देशा का काढी आणी, तधा ओर्ही आझ़ तैणीं निं मंऐं इज़राईला मांझ़ै आप्पू लै एही कोहै नगरी छ़ांटी ज़िधी मेरी पूज़ा-गाज़ा करना लै भबन बणांए। पर मंऐं छ़ांटअ आपणीं परज़ा इज़राईली प्रैंदै राज़ करना लै तूह दाबेद।’
17“मेरअ बाब दाबेद राज़अ च़ाहा त बिधाता लै एक भबन बणाणअं ताकि तैहा ज़ैगा एछी सोभ इज़राईली माथअ टेक्के।#2 शमू. 7:1-3; 1 इति. 17:1,2 18पर बिधाता बोलअ राज़ै दाबेदा लै, ‘ज़ुंण तूह मेरै नाओंए प्रतप्पा लै मुल्है भबन बणाणां लै सोठा, तेरी अह सोठ आसा भली। 19पर ताह निं सह बणाणअं भेटणअ, पर तेरै शोहरू बणाणअं आजू मेरै नाओंए प्रतप्पा लै मुल्है भबन।’#2 शमू. 7:12,13; 1 इति. 17:11,12
20“अह ज़ुंण बैण बिधाता बोलअ त, सह किअ तेऊ ऐबै पूरअ। हुंह बेठअ आजू आपणैं बाब दाबेदे ज़ैगा इज़राईल देशो राज़अ अर बिधाता लै भबन बी हेरअ मंऐं बणाईं। 21भबना भितरी बिधाते करारे मणशू डाहणां लै बी बणाईं मंऐं भबना भितरी ज़ैगा। तेथ भितरी आसा दूई पात्थरे शिला बिधाते हाम्हां इज़राईली संघै सह करार ज़ुंण बिधाता म्हारै दादा-बाबा संघै मिसर देशा का एछदी बारी सीनाई धारा किई ती।”
राज़ै सुलैमाने अरज़
(2 इतिहास 6:12-42)
22तेखअ डेऊअ सुलैमान तिधी सोभी लोगा नदरी बिधाते बेदी सेटा संघा किई आपणैं हाथ उझै सरगा बाखा करी एही अरज़, 23“हे इज़राईले परमेशर बिधाता, ताह ज़िहअ नां स्वर्गै कुंण आथी अर नां उंधै धरती दी कुंण ताह बराबर परमेशर आथी! तूह झ़ूरा आपणीं परज़ा लै अर तूह करा तिन्नां लै आपणीं करार पूरी ज़ुंण तेरै बधान अर बिधी मनणा लै शुचअ-पाक्कअ रहा। 24तंऐं ज़ेही मेरै बाब दाबेदा लै ज़बान दैनी ती, सह किअ तंऐं आझ़ आपणअ एक-एक बैण पूरअ। 25ऐबै हे इज़राईले परमेशर बिधाता होर बी ज़ुंण गल्ला तंऐं बोली आसा डाही दी तिन्नां बी करै पूरी। तंऐं आसा मेरै बाबा लै बोलअ द, ‘तेरी आद-लुआदा मांझ़ै ई हणअ एक ज़ण्हअ इज़राईला प्रैंदै सदा लै राज़अ, ज़ै तिंयां ताह ज़िहै ई मेरै बधान अर बिधी मने।’#1 राज़. 2:4 26ऐबै हे इज़राईले परमेशर, ज़ुंण तंऐं मेरै बाब दाबेदा का आसा बोलअ द, ऐबै लोल़ी तिंयां सोभै गल्ला तेही ई निभी।
27“हे परमेशर, ऐबै ताह सच्च़ी रहणअ धरती दी? ताल्है पल़ा सारअ भ्रमंड बी थोल़अ, तेखअ मेरअ बणाअं द अह होछ़अ ज़िहअ भबन किधी च़ाल्लअ ताल्है पूरअ पल़ी!#2 इति. 2:6 28हे मेरै परमेशर बिधाता, हुंह आसा तेरअ दास, ज़ीबाण, तूह शुण आझ़ मेरी अरज़ ज़ुंण आझ़ हुंह ताखा करा। 29अह भबन छ़ांटअ तंऐं आप्पू लै कि इधी तेरी पूज़ा-गाज़ा होए। तूह रहै धैल़ी-राची एता भाल़अ लागी अर ज़ेभै हुंह एथ बाखा मोहरअ करी अरज़ करूं, तेता शूणैं तूह।#बधा. 12:11 30हुंह आसा तेरअ दास, अर इज़राईली सारी परज़ा बी आसा तेरी। हाम्हां मांझ़ै तेरै भबना बाखा भाल़ी अरज़ करे, तूह शूणैं तेता स्वर्गा का संघा करै म्हारै पाप माफ।
31“ज़ै कहा मणछा दुजै मणछा लै ज़ुल्म करनैओ दोश होए अर ज़ै सह मणछ तेरै भबनै तेरी बेदी सेटा एछी सोह खाए कि तेऊओ निं किछ़ै कशूर आथी, 32तै हे बिधाता, तूह करै आपणैं दासो नसाफ स्वर्गा का। तूह दैऐ कदुष्टा लै आप्पै सज़ा अर नर्दोश लोल़ी राज्ज़ी-राम्बल़अ रहअ।
33“ज़ै तेरी परज़ा इज़राईली ताल्है पाप करनै पिछ़ू दुशमणा का हारे, तेखअ ज़ै तिंयां तेरै भबना लै एछी लेर-पकार पाई ताखा माफी मांगे, 34तूह शूणैं स्वर्गा का तिन्नें अरज़ संघा करै आपणीं इज़राईली परज़े पाप माफ। तेखअ आणै तिन्नां तैहा ज़ैगा लै बापस फरेऊई ज़ुंण तंऐं तिन्नें दादा-बाबा लै आसा दैनी दी।
35“ज़ै तेरी परज़ा ताल्है पाप करनै पिछ़ू तूह ज़ै तिन्नां लै सरगा का पाणीं हणअ बंद करे, तेखअ ज़ै तिंयां पाप करनअ छ़ाडे अर तेरै भबना बाखा फिरी ताखा अरज़ करे, 36तूह शूणैं तिन्नें अरज़ स्वर्गा का संघा करै राज़ै अर इज़राईलीए पाप माफ, तूह दैऐ तिन्नां लै भलै करने शिक्षा। हे परमेशर, तेखअ दै तूह आपणीं ऐहा ज़ैगा सरग हणैं ज़ुंण तंऐं सदा लै आपणीं परज़े ज़ैदात आसा बणाईं दी।
37“ज़ै केभै एऊ देशै नकाल़, कि मरी, नाज़ा लै शुक्कअ पल़े, रैट्टै कि नाज़ा लै गाल़्ही लागे, कि तेरी परज़ा दुशमण गोटे, कि तेरी परज़ा लै आफ़त पल़े कि किज़ै रोग लागे, 38तेभै ज़ै तेरी परज़ा इज़राईली दिला का माल़ी च़ेते कि तिन्नें भलै हुई गलती अर ज़ै तिंयां मणछ ताह सेटा एऊ भबना बाखा बाह फुआरी अरज़ करे, 39तेभै शूणैं तूह तिन्नें अरज़ स्वर्गै आपणैं घअरै संघा छ़ाडै तिन्नां लै माफी। तिन्नां लै दैऐ ज़सरै मन्नैं ज़िहअ होए तिहअ फल। किल्हैकि मणछे मन्नैं किज़ै आसा, एतो थोघ हआ सिधअ ताखा ई। 40ताकि तैहा ज़ैगा ज़ुंण तंऐं तिन्नें दादा-बाबा लै दैनी ती, तेथ रहणअ तिन्नां आपणीं ज़िऊंदी ज़िता तेरी डरा हेठै अर तिन्नां करनअ ज़िहअ तूह बोला तिहअ।
41-42“तेखअ ज़ै तेरी इज़राईली परज़ा छ़ाडी ज़ै कुंण होर दूर परदेसा का तेरअ नाअं अर तेरै महान कामें बारै शूणीं ताह सेटा लै एछे अर सह तेरै एऊ भबना बाखा फिरी अरज़ करे, 43तूह शूणैं तेऊए अरज़ स्वर्ग आपणैं बसेरै का। तूह करै तेऊए दिला-मन्नें पूरी ताकि संसारे सोभी लोगा का तेरअ थोघ लागे अर तिंयां बी तेरी परज़ा इज़राईली ज़िहै तेरी डरा हेठै रहे। तेखअ लागणअ तिन्नां सोभी का थोघ ज़ुंण मंऐं ताल्है भबन बणाअं, अह ज़ैगा आसा तेरी पूज़ा-गाज़ा करने।
44“हे बिधाता, ज़ै केभै तूह आपणीं परज़ा दुशमणा संघै मकाबलै करदै ज़िधा लै बी छ़ाडे, तिंयां ज़िधी बी होए अर ज़ै तिंयां खास्सै दूर हई बी तंऐं आप्पू लै छ़ांटी दी ऐहा नगरी अर मंऐं ताल्है बणाऐं दै एऊ भबना बाखा आपणअ मोहरअ करी ताह बिधाता सेटा अरज़ करे, 45तूह शूणैं तिन्नें अरज़ स्वर्गै संघा दैऐ तिन्नां लै तिन्नें दुशमणा का ज़ीत।
46“हे बिधाता, एही ता आसा सोभ मणछ पापी, पर ज़ै तेरी परज़ा ताल्है पाप करे अर तेता पिछ़ू ज़ै तूह इहअ रुश्शे कि तेरी परज़ा दुशमणा का हारे अर दुशमण तिन्नां होरी देशा लै कैद करी निंए, च़ाऐ सह देश केतरअ बी दूर किल्है निं होए, 47तूह शूणैं आपणीं परज़े अरज़ तेथ बी। ज़ेऊ देशै तिंयां कैद करी होए निऐं दै, ज़ै तेथ तिंयां ताह सेटा लेर-पकार पाई बोले, ‘हे म्हारै बिधाता, हाम्हैं किअ घोर पाप, हाम्हैं आसा खास्सै कदुष्ट अर हाम्हैं किऐ बेघै कदुष्ट काम।’ 48तेखअ ज़ै तिंयां दिला मना का माल़ी च़ेते अर तिंयां दूर दुशमणे देशा का बी तैहा ज़ैगा ज़ुंण तंऐं तिन्नें दादा-बाबा लै दैनी ती, ऐहा नगरी ज़ुंण तंऐं आप्पू लै छ़ांटी अर भबन ज़ुंण मंऐं ताल्है बणाअं, एथ बाखा मोहरअ करी ताखा अरज़ करे, 49तूह शूणैं तिन्नें अरज़ स्वर्गै आपणैं घअरै संघा करै तिन्नां लै झींण। 50तिन्नैं ताल्है च़ाऐ ज़िहअ बी पाप किअ द होए, तूह करै तिन्नां माफ अर ज़ुंणीं दुशमणै तिंयां कैद करी निऐं, तिंयां लोल़ी तेरी परज़ा लै झणैल़ू हुऐ। 51ऐहा गल्ला डाहै आद ईंयां आसा तिंयां लोग ज़ुंण तंऐं आप्पू लै छ़ांटै अर तंऐं आणै दा तिंयां मिसर देशा का काढी, तेता समझ़ तूह इहअ कि तिंयां आसा तंऐं लोहै गाल़णे भठी दी भकदै कोयलै मांझ़ा का काढी आणै दै।
52“हे महान बिधाता, हुंह आसा तेरअ दास, इज़राईली परज़ा बी आसा तेरी, ज़ेभै बी हाम्हैं ताह सेटा लेर-पकार पाई अरज़ करे, तेभै शूणैं तूह संघा करै म्हारी मज़त। 53ज़धू तंऐं म्हारै दाद-बाब मिसर देशा का काढी आणै तधू बोलअ त तंऐं आपणैं दास मोसा लै कि इना लै बोल इहअ, ‘संसारे सोभी लोगा मांझ़ा का छ़ांटै मंऐं थारै मालक बिधाता तम्हैं आप्पू लै कि मेरी खास परज़ा होए।’”
खिरी किई सुलैमानै एही अरज़
54ज़ांऊं सुलैमान बिधाता सेटा अरज़ करी मुक्कअ, सह खल़्हुअ तेखअ बिधाते बेदी सेटा का खल़अ ज़िधी सह ज़ान्हूंए बलै उझै सरगा बाखा हाथ करी बेठअ द थिअ। 55तेखअ मांगी तेऊ ज़ोरै-ज़ोरै इहअ बोली बिधाता का सोभी इज़राईली लै बर्गत, 56“तेऊ बिधाते लोल़ी ज़ै-ज़ैकार हुई ज़ुंणीं आपणीं परज़ा इज़राईली लै ज़िहअ तेऊ बोलअ त तिहअ ई बशैघ दैनअ। म्हारी भलाईए तैणीं ज़ुंण बी गल्ला तेऊ आपणैं दास मोसा का हाम्हां लै बोली ती, तेता मांझ़ै निं एक बी गल्ल एही छ़ुटी ज़ुंण पूरी निं हुई होए।#बधा. 12:10; ज़ैह. 21:44,45 57म्हारअ परमेशर बिधाता ज़िहअ म्हारै दादा-बाबा संघै रहअ, तिहअ लोल़ी सह हाम्हां संघै बी रहअ, तेऊ निं हाम्हैं कधि लोल़ी छ़ाडै अर नां शोटी लोल़ी डाहै। 58तेऊ लोल़ी ती म्हारी एही मज़त किई कि ज़िहअ सह च़ाहा हाम्हैं तेही ज़िन्दगी ज़िऊए अर तेऊए बधाने तिन्नां सोभी बिधी मने ज़ुंण तेऊ म्हारै दादा-बाबा लै दैनी ती। 59मेरी आसा एही अरज़ कि ज़ेतरी गल्ले मंऐं बिधाता सेटा अरज़ किई, बिधाता लोल़ी ती तिंयां सदा आद डाही। तेऊ लोल़ी इज़राईली परज़ा अर तिन्नें राज़े धैल़ ज़ेही तिन्नां ज़रुरत पल़ी तेही मज़त किई। 60तेखअ लागणअ त संसारै सोभी देशा का थोघ कि बिधाता ई आसा एक्कै असली दी परमेशर, तेऊ छ़ाडी निं होर कोहै आथी। 61तम्हैं तेऊए परज़ा बी लोल़ी त सदा म्हारै परमेशर बिधातो बधान अर तेते सोभी बिधी सदा तिहै ई मंदै रहै ज़िहै आझ़ आसा।”
बिधाते भबने पूज़
(2 इतिहास 7:4-10)
62तेखअ किअ राज़ै सुलैमानै अर तिधी आऐ दै सोभी इज़राईली बिधाता लै मेल़-ज़ोल़ो बल़ीदान। 63तिन्नैं किऐ तिधी बाई हज़ार बल्द, एक लाख बिह हज़ार रिठे हेल़्ही मेल़-ज़ोल़े बल़ीदान अर इहअ करै हुई भबने प्रतिष्ठा। 64तैहा ई धैल़ी किअ राज़ै सुलैमानै बिधाते भबना आजूए ताटीए बी प्रतिष्ठा। तेऊ किऐ तिधी खास्सै हूम, मेल़-ज़ोल़ अर नाज़ बल़ीदान अर च़र्बी हुई एतरी खास्सी कि भबना आजूए कांस्से बेदी दी निस्सी सह हूम करना लै अक्की। 65सुलैमान राज़ै अर सारी इज़राईली परज़ा मनाऊंअ भबने प्रतिष्ठा बाद साता धैल़ी तैणीं छ़ानींओ थैर। बिधाते तैहा जाचा लै आऐ उतरा बाखा हमात ज़ोता ओर्ही पछ़मा बाखा मिसर देशे सिऊंआं तैणींए खास्सै मणछ। 66तेखअ छ़ाडै सुलैमानै आठुई धैल़ी#8:66 आठुई धैल़ी साता धैल़ी छ़ानींए थैरा मनाऊंणै बाद सोभ लोग आपणैं-आपणैं घअरा लै। तिंयां लागै राज़े सर्राफी करदै संघा डेऊऐ खुशी-खुशी घअरा लै। किल्हैकि बिधाता दैनी आपणैं दास दाबेद अर इज़राईली परज़ा लै खास्सी बर्गत।
Currently Selected:
1 राज़ै 8: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
