1 इतिहास 18
18
राज़ै दाबेदै ज़ितै जुध
(2 शमूएल 8:1-18)
1थोल़ै धैल़ै बाद छ़ेल़अ राज़ै दाबेदै पलिश्ती संघै भिई जुध अर तिंयां हारै दाबेदा का भिई। तेऊ छ़ड़ैऊई तिन्नां का गात नगरी अर तेता ओरी-पोरीए गराअं ज़ेथ तिन्नैं कबज़अ त किअ द। 2तेखअ ज़ितअ दाबेद मोआबी का। तेखअ किअ दाबेदै मोआबी प्रैंदै राज़ अर तिंयां दैआ तै तेऊ लै कारअ।
3एता बाद छ़ेल़अ दाबेदै सिरीया देशे सोबा नगरीए राज़ै हदादेज़ेरा का हमात मुल्खा नेल़ जुध, किल्हैकि हदादेज़ेर च़ाहा त फरात दरैऊआ प्रैंधल़ै मुल्खै कबज़अ करदअ लागअ द। 4तेऊ जुधा दी किऐ दाबेदै हदादेज़ेरे एक हज़ार रथ, सात हज़ार घोल़े शुंआर, बिह हज़ार पैदल सपाही आपणैं कबज़ै दी। तेता का डाहै दाबेदै एक शौ रथा लै घोल़ै बच़ाऊई अर बाकी किऐ तेऊ ज़ान्हूं पिछ़ूए नस काटी बरैबाद।
5ज़ांऊं दमिश्क नगरीए अरामी लोगै आपणीं सैना सोबा नगरीए राज़ै हदादेज़ेरे मज़त करदी छ़ाडी, दाबेदे सैना पल़ी तिन्नां लै चुटी अर तिन्नां मांझ़ै पाऐ बाई हज़ार सपाही मारी। 6तेखअ बशैल़ी दाबेदै अरामी मुल्खै आपणीं सैने च़ौकी, तिन्नां प्रैंदै बी हुअ दाबेदो राज़ संघा लागै तिंयां बी दाबेदा लै कारै दैंदै। ज़िधी बी दाबेद डेऊअ, बिधाता दैनी तेऊ लै ज़ीत। 7हदादेज़ेर राज़ै का थिई सुन्नें ढाल़ा अर तिंयां किई राज़ै दाबेदै आपणैं कबज़ै दी संघा आणी एरुशलेम नगरी लै। 8तेता संघै आणअ दाबेद राज़ै हदादेज़ेर राज़े तिभात अर कून नगरी का खास्सअ कांस्सअ बी। बादा का बणाअं त राज़ै सुलैमानै तेऊ कांस्सै करै बिधाते भबना लै कांस्सैओ बडअ कल़ाह, थाम्ह अर कांस्सैओ होर समान।
9हमात नगरीए राज़ै तोई का लागअ थोघ कि दाबेदे सैना का हारी सोबा नगरीए हदादेज़ेर राज़े सारी सैना, 10तेखअ छ़ाडअ तेऊ आपणअ शोहरू हादोराम राज़ै दाबेदा सेटा राज्ज़ी-खुशी अर हदादेज़ेर राज़ै का ज़ितणें बधाई दैंदअ। किल्हैकि हदादेज़ेर राज़ै छ़ेल़अ त तोई संघै कई बारी जुध। जोरामै आणै दाबेदा लै भैंट दैणा लै सुन्नैं, च़ंदी अर कांस्से भांडै। 11राज़ै दाबेदै डाहै तिंयां भांडै बिधाता लै मणसी ज़ुदै ज़िहै अर सह सुन्नअ, च़ंदी अर कांस्सअ बी डाहअ तेऊ बिधाता लै तिहअ ई ज़ुदअ ज़ुंण तेऊ एदोम, मोआब, अमोन, पलिश्ती अर अमोलकी ज़ातीए लोगा का जुध ज़िती आणअ त।
12अबीशै ज़सरी ईज सरूयाह थिई, तेऊ ज़ितअ लूंणै खागा दी एदोमी का जुध अर तिन्नें पाऐ तेऊ ठारा हज़ार आदमी मारी। 13तेखअ डाही तेऊ आपणीं सैने च़ौकी एदोम अर इहअ करै हुअ एदोमी प्रैंदै बी राज़ै दाबेदो राज़। ज़हा संघै बी राज़ै दाबेदो जुध हुअ, बिधाता दैनी तेथ तेऊ लै ज़ीत।
राज़ै दाबेदे खास कार-करिंदै
14दाबेदै किअ सारै इज़राईला प्रैंदै राज़ अर सह डाहा त धैन कि सारी परज़ा संघै लोल़ी एक बराबर बभार हुअ अर सोभी लोल़ी शुचअ नसाफ भेटअ। 15अबीशैओ भाई जोआब ज़सरी ईज सरूयाह थिई, सह थिअ राज़ै दाबेदो सैनापति। दाबेदो इतिहास लिखणैं आल़अ त आहीलूदो शोहरू जहोशापात, 16आहीतूबो शोहरू सदोक अर अबतारो शोहरू अबीमोलक तै बडै प्रोहत। शाबशा थिअ राज़ै दाबेदो काईथ, 17जहोयादा प्रोहतो शोहरू बेनियाह थिअ राज़ै दाबेदे आपणीं फाज़त करनै आल़ै शूरबीरो प्रधान अर दाबेदे आपणैं शोहरू बी थिऐ बडी-बडी पदबी दी।
Currently Selected:
1 इतिहास 18: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
