1 इतिहास 17
17
नातान गूरो राज़ै दाबेदा लै समाद
(2 शमूएल 7:1-17)
1राज़अ दाबेद रहा त ऐबै आपणैं मैहलै। एकी धैल़ै शादअ तेऊ नातान गूर संघा बोलअ तेऊ लै इहअ, “इधी भाल़, हुंह आसा आप्पू केल़ुईए काठा करै बणाऐं दै मैहलै लागअ द रहंदअ पर बिधातो करारो मणशू आसा खिम्भा हेठै डाहअ द!”
2नातान गूरै दैनअ राज़ै दाबेदा लै ज़बाब, “ज़िहअ तेरअ दिल बोला तिहअ कर, किल्हैकि बिधाता आसा ताह संघै।”
3पर तैहा ई राची बोलअ बिधाता नातान गूरा लै, 4“डेऊ, तूह बोल मेरै दास दाबेदा लै कि हुंह बिधाता बोला इहअ, ‘सह निं तूह आथी ज़हा मुंह रहणा लै भबन बणाणअं! 5ज़हा धैल़ी मंऐं इज़राईली मिसर देशा का काढी आणै, तधा ओर्ही आझ़ तैणीं रहअ हुंह खिम्भा दी एछदअ डेऊंदअ ज़ैगै-ज़ैगै हांढदअ लागी, हुंह निं कोई खास भबनै रहअ। 6हुंह ज़िधी-ज़िधी बी आपणीं परज़ा इज़राईली संघै रहअ, मंऐं ज़ेतरै बी इज़राईली प्रैंदै प्रधान छ़ांटै, मंऐं निं तिन्नें कोही टोली का एही किछ़ै खरी खोज़ी कि तिन्नैं मुल्है केल़ुईए काठा करै भबन किल्है निं बणाअं?’
7“तूह खोज़ मेरै दास दाबेदा का, ‘स्वर्गे सारी सैने मालक बिधाता बोलअ इहअ कि मंऐं आणअ तूह भेडा-बाकरीए हेल़्ही फुआला बणां का एते तैणीं शादी, अर मंऐं बणाअं तूह राज़अ कि मेरी परज़ा इज़राईली प्रैंदै राज़ करे। 8ज़िधी बी तूह एछदअ डेऊंदअ रहअ, हुंह रहअ कबल्लअ ताह संघै। मंऐं किऐ ताखा आजी तेरै दुशमण खतम। मंऐं किअ तूह संसारै बडै-बडै महान लोगा ज़िहअ मशूर। 9-10मंऐं बिधाता आसा आपणीं परज़ा इज़राईली लै एक ज़ैगा डाही दी अर तिंयां बसाऊंणै मुंह तैहा ज़ैगा। तिधी निं तेखअ तिंयां कोही हंतणैं। तैहा ज़ैगा पुजणैं बाद आऐ खास्सी बारी उपद्रभी लोग तिन्नां हारदै-मारदै, पर ऐबै निं इहअ भिई हणअ। मेरी रही ताल्है ज़बान कि तूह डाहणअ मुंह तेरै दुशमणा का बच़ाऊई अर ताल्है दैणीं मुंह खास्सी आद-लुआद। 11ज़ांऊं तूह खास्सअ प्रोढअ जाणअ हई, तेखअ डाहणअ तूह तेरै दादा-बाबा ई ज़िहअ दाबी। तेरअ एक शोहरू बणाणअं मुंह ताह बाद तेरी ज़ैगा राज़अ अर तेऊओ राज़ करनअ मुंह होर बी बलबान। 12तेरअ सह शोहरू ई हणअ ज़हा मुल्है भबन बणाणअं अर तेरै खिंबै हणअ एक इहअ, ज़सरअ राज़ सारी सदा रहणअ। 13तेऊओ बाब हणअ हुंह आप्पै अर सह हणअ मेरअ शोहरू। ज़ै सह गलती करे, तेऊ लै दैणीं मुंह आप्पै सज़ा ज़िहअ एक बाब करा। मुंह झ़ूरनअ तेऊ लै सदा। 14आपणीं परज़ा अर राज़ सभाल़णअ मुंह सदा लै तेऊ का अर तेऊओ राज़ हणअ सदा लै अटल़।’”
15नातान गूरै खोज़ी दाबेदा का पठी गल्ला ज़ुंण बिधाता तेऊ का प्रगट किई ती।
दाबेदै किअ बिधातो शूकर
(2 शमूएल 7:18-29)
16तेखअ डेऊअ राज़अ दाबेद बिधाते खिम्भा भितरी अर करारे मणशू सेटा बेशी बोलअ इहअ, “हे मेरै पबित्र परमेशर बिधाता, ज़ुंण बी तंऐं मुल्है किअ, हुंह निं तेता जोगी आथी त, नां मेरअ खिंब तेता जोगी आथी त। 17मेरै साबै किअ तंऐं मुल्है खास्सअ। पर तंऐं डाही आजू मेरी आद-लुआदा लै बी करार करी। पबित्र परमेशर बिधाता, तंऐं किअ मुंह संघै इहअ बभार कि हुंह आसा होए कोई महान मणछ। 18हे मेरै मालक बिधाता, हुंह दाबेद ताल्है एता का खास्सअ होर किज़ै सका बोली! हुंह आसा तेरअ दास अर तंऐं किअ मेरअ अदर? 19बिधाता, तूह च़ाहा त इहअ ई कि ताह करनै मुल्है ईंयां महान काम। तूह च़ाहा त तेता पूरअ करनअ ज़ुंण तंऐं पैहलै ई त बोलअ द।
20“हे पबित्र परमेशर बिधाता, हाम्हां सोभी का आसा थोघ कि ताह ज़िहअ शुचअ निं कोहै आथी तूह आसा एक्कै परमेशर होर निं ताह ज़िहअ कोहै आथी। 21नां सारी धरती दी इज़राईला ज़िहअ होर देश आथी ज़ुंण तंऐं गलामी का छ़ड़ैऊई आपणीं खास परज़ा बणाऐं। ज़ुंण महान अर नुआहरै काम तंऐं तिन्नां लै किऐ, तेता करै हुअ तूह सारै संसारै मशूर। तंऐं काढै होरी देशे लोग अर तिन्नें देअ आपणीं परज़ा पजैल़णैं का आजी दरल़ाऊई ताकि तिधी तेरै आपणैं लोग बस्से ज़ुंण तंऐं मिसर देशे गलामी का आणै आज़ाद करी। 22तंऐं बणाऐं इज़राईली सदा लै आपणीं खास परज़ा अर हे बिधाता, तूह हुअ सदा लै तिन्नों परमेशर।
23“ऐबै हे परमेशर बिधाता, ज़ुंण करार तंऐं मुंह अर मेरी आद-लुआदा संघै किई तेता कर तूह सदा लै पाक्की अर तूह करै तिहअ ई ज़िहअ तंऐं बोलअ द आसा। 24तै रहणअ तेरअ नाअं सदा अर लोगा बोल़णअ सदा इहअ, ‘इज़राईलो परमेशर आसा सह स्वर्गे सारी सैनो मालक बिधाता।’ मुंह तेरै दास दाबेदो खिंब डाहै तूह सदा अटल़। 25तूह आसा असली दी इज़राईलो परम प्रधान परमेशर बिधाता ज़हा का सारअ बल आसा! मुंह हुई ताखा एही अरज़ करने हिम्मत किल्हैकि तंऐं आसा मुंह आपणैं दासा का सोभै गल्ला खोज़ी हेरी दी अर इहअ बी आसा बोली डाहअ द कि ताह बणाणैं मेरै खिंबा का राज़ै।
26“तूह बिधाता आसा परमेशर, तंऐं आसा मुल्है शुची ज़बान दैनी दी। 27ऐबै आसा ताखा मेरी अरज़ कि ऐबै दै खुशी-खुशी मेरै खिंबा लै बर्गत ताकि तूह तिन्नां बाखा सदा रहे। पबित्र परमेशर बिधाता, तंऐं हेरी तिन्नां लै बर्गत दैई अर तेरी बर्गत रहणीं मेरी आद-लुआदा लै सदा।”
Currently Selected:
1 इतिहास 17: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
