इब्रानियों 4

अराम जगै च दाखला

1एस लेई जेसलै के परमेसर दे अराम जगै च दाखल ओनें दा बायदा अयें तकर ऐ, तां असैं डरना चाईदा; कुदै ऐसा नेई उवै, के थुआड़े बिचा कोई जन ओस बायदे थमां दूर ओई जा। 2किके असेंगी उन्दे आला लेखा शोभ समाचार सनाया, जियां इस्राएलियें सुनया हा, पर विश्वास नेई करने दे कारन उनेंगी फायदा नेई ओया लेकन सुने दे वचन थमां उनेंगी केछ फायदा नेई ओया; किके सुनने आलें दे मन च ओ विश्वास कन्ने नेई बैठया।

3एसकरी असैं जिनैं विश्वास कित्ता ऐ, ओस अराम दी जगै च दाखल ओनयां न; जियां ओसने आखया, “मैं क्रोध च कसम खादी, के ओ मेरी अराम दी जगें च दाखल नेई ओई सकगन।” आलां के सृष्टि गी बनाने दे बेलै थमां ओदे कम पूरे ओई चुके दे हे।

4किके सतमें देन दे बारै च ओसने कुदै ए आखे दा ऐ, “परमेसर ने सतमें देन अपने सारें कम गी नपटाइयै बसां कित्ता।”

5ते इत्त्थैं पी ए आखदा ऐ, “ओ मेरे अराम दी जगै च दाखल नेई ओई सकगन।”

6ते जेसलै ए गल्ल अयें तकर बाकी ऐ के किन्नें ओर न जेड़े ओस अराम दी जगै च दाखल ओना ऐ, ते इस्राएलियें गी, जिनैं ओसदा शोभ समाचार पैलैं सुनाया, ओ उक्म नेई मनने दे कारन ओस च दाखल नेई ओई सके, 7तां पी ओ कुसे खास देन गी पक्का करियै इन्नें देन दे बाद राजा दाऊद दी कताब च उसी, अज्ज दा देन आखदा ऐ। जियां पैलैं आखया गीया, “जेकर अज्ज तोस ओसदी बाज सुनो, तां अपने मनें गी कठोर नेई करो।”

8किके जेकर यहोशू उनेंगी बसां जगै च दाखल कराई लैंदा, तां ओदे बाद दुए देन दी चर्चा नेई ओंदी। 9एस लेई जानी लियो के परमेसर दे लोकें आसतै यहूदीयें दे बसां दा देन ओस बसां दी जगै च दाखल ओना बाकी ऐ; 10किके जेड़ा ओदी अराम दी जगै च दाखल ओई चुके दा ऐ, ओ बी परमेसर आला लेखा अपने कम गी पूरा करियै अराम दी जगै च ओया ऐ। 11एस लेई आओ अस ओस अराम दी जगै दाखल ओनें दी कोष्ट करचै, ऐसा नेई उवै, के कोई जन उन्दे आला लेखा परमेसर दा उक्म नेई मनियै डिगी पवै। 12किके परमेसर दा वचन जिंदा, ते कम करने आला, ते अर एक दोधारी तलवार थमां बी बड़ा पैन्ना ऐ; प्राण, ते आत्मा गी, ते जिदुं दे जोड़े-जोड़े गी अन्दर दी जगै गी बख करियै, आर-पार छेदी दिन्दा ऐ; ते मने दी पावनें ते वचारें गी परखदा ऐ। 13सृष्टि दी कोई बी चीज ओस थमां श्प्पी दी नेईयै वरन जेसदा असैं लेखा देना ऐ, ओसदे सामने सारीयां चीजां खुलीयां ते परकट च न।

साड़ा महायाजक

14एस आसतै जेसलै साड़ा इय्ये जेया महायाजक ऐ जेड़ा सरगां चा ओईयै आया, मतलब परमेसर दा पुत्तर यीशु, तां आओ, अस अपने अंगीकार गी मजबूती कन्ने थमी रखचै। 15किके साड़ा ऐसा महायाजक नेई, जेड़ा साड़ी कमजोरीयें च साड़े कन्ने दुखी नेई ओई सकै; वरन ओ तां सारीयें गल्लें च साड़े आला लेखा परखा तां गीया, तां बी निष्पाप निकलया। 16एस आसतै आओ, अस क्रपा दे सिहांसन दे कोल दलेरी कन्ने जाचै, के साड़े उपर दया उवै, ते ओ क्रपा पाचै जेड़ी जरुरत दे बेलै साड़ी मदद करै।

Currently Selected:

इब्रानियों 4: DOG

Highlight

Copy

Compare