सपन्याह 1
1
1ये यहोवे रा सन्देश ए जो तिने कूशीए रे पाऊ सपन्याह खे दित्तेया। कूशीए रा बाओ गदल्याह था। गदल्याह रा बाओ अमर्याह था, अमर्याह रा बाओ हिजकिय्याह था। यहोवे ये सन्देश सपन्याह खे तेबे दित्तेया जेबे योशिय्याह राजा था। योशिय्याह आमोनो रा पाऊ था, जो यहूदा रा राजा था।
परमेशरो रे न्याय रा दिन
2यहोवा बोलोआ, “मां तरतिया पाँदे रणे वाल़े सबी रा अन्त करी देणा, यहोवे री येई बाणी ए। 3मां माणूं ओर डांगर ओर जानवर सबी रा अन्त करी देणा, मां सर्गो रे पंछी ओर समुद्रो री मछलिया रा ओर दुष्टा समेत तिना री राखी री ठोकरा रिया बजा रा बी अन्त करी देणा, मां माणूंआ री जाति बी तरतिया पाँदा ते नाश करी देणी,” यहोवे री येई बाणी ए। 4“मां यहूदा पाँदे ओर यरूशलेमो रे सब रणे वाल़ेया सजा देणी ओर एते जगा रे बाल देवते रे बचे रे पुरोईता समेत देवतेया रे पुजारिया रे नाओं नाश करी देणे। 5कऊँकि सेयो लोक आपणे-आपणे कअरो रे छतो पाँदे चढ़ोए ओर सूरज, चाँद ओर सर्गो रे तारेया री आराधना करोए। सेयो यहोवे री आज्ञा खे मानणे रा वादा करेया करोए, फेर बी सेयो मोलेक देवते री पूजा करदे रओए। 6ओर मां सेयो लोक नाश करी देणे जो पईले मेरी आराधना करो थे एबे नि करदे। सेयो एबे यहोवे री आज्ञा खे नि मानदे।”
7परमेशर यहोवे सामणे चुपचाप खड़े रओ, कऊँकि यहोवे रे न्याय रा दिन नेड़े ए। यहोवे आपणी प्रजा बड़े बलिदानो खे त्यार करी राखे ए तिने आपणे पराऊणे शुद्ध करी राखे। 8जेबे यहोवा बलिदान चढ़ाणे खे त्यार ऊणा, मां अधिकारिया ओर राजे रे माठेया खे सजा देणी। मां तिना सबी रा बी न्याय करना जो ओरी देशा रे रीति रवाजा खे मानोए। 9तेस दिने मां तिना सबी खे सजा देणी जो देऊल़ी खे लाँगोए ओर जो आपणे स्वामिए रे कअरो खे छल ओर चगड़े ते कट्ठे कित्ते रे तअनो ते परोए। 10यहोवे री ये बाणी ए, “तेस दिने, लोक यरूशलेमो रे मछलिया रे फाटको गे चींगणे। लोका शईरो रे नवें इस्से गे रोणा, ओर लोका पाह्ड़िया गे कअरा रे रूड़ने रिया आवाजा सुणनिया।”
11ओ मक्तेश#1:11 मक्तेश शईरो रा ऊँदला इस्सा जेती बपार ओ था। जगा दे रणे वाल़ेयो लोको, तुसे चींगणे। कऊँ? कऊँकि अमीर ओर बपारी नाश करी देणे, जिना गे बऊत चाँदी आ। 12तेस दिने मां दिऊआ लई की यरूशलेमो दे खोजबीन करनी ओर जो लोक आपणे पापा दे बेफिकर ऊई की बैठी रे, तिना खे सजा देणे खे। सेयो सोचोए कि यहोवे तिना साथे कुछ नि करना, चाए खरा ओ या बुरा। 13तेबे तिना रे दुश्मणा तिना री तअन-सम्पत्ति लूटी देणी ओर तिना रे कअर उजाड़ ऊणे, तिना कअर तो बनाणे, पर तिना दे रयी नि सकणे ओर तिना अंगूरा रे बगीचे तो लगाणे, पर तिना रा शराब नि पी सकणे।
14परमेशरो रा डराऊणा दिन नेड़े ए, से फटाफट नेड़े आऊणे लगी रा, ये एड़ा बखत ऊणा जेबे लोका ईंकी-ईंकी की रोणा, एड़ा बखत ऊणा जेबे तागतबर सिपाईया बी जोरे-जोरे की रोणा, 15से रोषो रा दिन, से मुसीबता रा ओर परेशानिया रा दिन, से उजाड़ ओर नाशो रा दिन, से अन्देर ओर अन्दकूप न्हेरे रा दिन ऊणा, ये बऊत ई न्हेरे वाल़ा दिन ऊणा, बऊत ई काल़ा ओर बादल़ा रे परेया रा दिन ऊणा। 16रड़सिंगे री आवाज ओर लड़ाईया रे नारे सुणने। सिपाईया तिना शईरा पाँदे अमला करना जिना दे किले ओर गुम्मट ए। 17मां सबी माणूंआ पाँदे मुसीबत ल्याऊणी। इजी री खातर तिना अन्देया लोका जेड़े बाट टोल़नी। तिने यहोवे रे खलाफ पाप करी राखेया ए। तिना रा खून तूड़ा जेड़ा बाह्ई देणा। तिना रिया लाशा जमीना पाँदे सड़ी जाणिया। 18परमेशरो रे रोषो रे दिने, ना तो चाँदी तिना खे बचायी सकोआ ओर ना सूईना, कऊँकि तेसरी जल़ना री आगी साथे सारी तरती फूकी जाणी, अचाणक तेस तरतिया रे रणे वाल़े सबी रा अन्त करी देणा।
Currently Selected:
सपन्याह 1: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
