हबक्कूक 3
3
हबक्कूको रा यहोवे ते प्रार्थना करना
1हबक्कूक नबीए री प्रार्थना। 2ओ परमेशर, आऊँ तेरे बारे दे ओर तेरे कामो रे बारे दे सुणी की डरीगा। ओ परमेशर, एस युगो दे आपणे काम पूरे कर, एस युगो देई तूँ तिना खे पूरा कर, पर जेबे तूँ जोशो दे परी जाए तेबे बी तूँ आसा पाँदे दया खे बताणा याद राख। 3परमेशर तेमानो ते आया, पवित्र परमेशरो खे पारान पाह्ड़ो ते आऊँदे ऊए देखूँआ। तेसरी महिमा रा तेज सर्गो दे परीगा दा ए, ओर तरती तेसरिया स्तुतिया ते परीगी री ए। 4तेसरी जोति सूरजो रे प्रयासे जेड़ी थी, तेसरे आथो ते जोतिया रिया किरणा निकल़ने लगी रिया ए ओर तेसरे आथो दे तेसरी तागत छिपी री ए। 5तेसते आगे-आगे मरी फैलदी गयी ओर बमारी तेसते पीछे-पीछे चली।
6जेबे से खड़ा ऊआ, तो तरती ईल्ली गी। जेबे तिने देश देखे, सेयो डरो रे मारे कांबणे लगे। सेयो पाह्ड़ टूटी-टूटी की रूड़ने लगे ओर चूर-चूर ऊईगे। पुराणे, बऊत पुराणे पाह्ड़ बी टल़ी गे। पर से हमेशा आगे बढ़दा रओआ। 7माखे कूशान शईरो रे तम्बूए दे रणे वाल़े लोक दु:खो साथे दबे दे दिशे ओर मिधान देशो रे डेरे डगमगाई गे। 8ओ यहोवा, क्या तैं रोषो दे आई की नदिया पाँदे बाई ओर समुद्रो खे दूई इस्सेया दे बाँडीता? क्या तूँ तिना ते खुश नि था? ना, तूँ तो आपणे उद्धारो रे कोड़ेया रे रथ पेजणे लगी रा था, 9एड़ा जेड़े तैं आपणा धनुष खोलेया, आपणे तरकशो ते तीर निकाल़े ओर तिना खे चलाणे खे त्यार ऊईगा। सेला। फेर बिजल़िया ते तैं तरती चीरी ती ओर नदिया निकल़ने लगिया। 10पाह्ड़ ताखे देखी की काँबी गे, तूफान ओर जलप्रलय निकल़ी गे, गईरा समुद्र बोलणे लगेया ओर आपणियां लईरा ऊबे चकिया।
11तेरे उडणे वाल़े तीरो री चमका ते, तेरे चमकीले भाल़े री चमका रे प्रयासे ते सूरज कूमणा पुलीगा; ओर चाँद आपणी जगा दे ठईरी गा। 12तूँ रोषो दे आई की तरतिया पाँदे चलणे लगेया, तैं देशा खे सजा दित्ती। 13तूँ आपणे चूणे दे लोका खे बचाणे निकल़ेया, आपणे अभिषिक्ता खे बचाणे निकल़ेया। तैं दुष्टा रे सिर केसी ते ओर सिरो ते लई की पैरा तक तिना रिया आड्डिया तोड़ी तिया। 14तैं तिना रे शूरवीरा रे सिर तिना रे ई बड़छे साथे छेदी राखे, ओर तैं तिना री सेना नाश करिती। जेबे तिना रे सिपाई आसा पाँदे अमला करने खे आगे आए तो सेयो आसणे लगी रे थे। तिने सोचेया कि सेयो आसा ते सानिया ते जीती जाणे, मानो आसे गरीब, कमजोर लोक ए। 15तैं आपणे कोड़ेया पाँदे सवार ऊई की समुद्रो रे उफणदे पाणिये खे आपणे कोड़ेया रे पैरा ते केसी ता। 16ये सब सुणी की मेरा काल़जा काँबीगा ओर मेरे ओठ थरथराणे लगे, मेरे पैर लड़खड़ाणे लगे ओर आऊँ बऊत डरीगा। मां चुपचाप तेस दिनो रा इंतजार करना जेबे आसा पाँदे अमला करने वाल़ेया पाँदे मुसीबत आऊणी। 17दाऊगल़ेया रे डाल़ चाए दाऊगल़े नि लगो, अंगूरा रिया बेली दे चाए अंगूर नि लगो, डाल़ा दे चाए जैतून नि मिलो ओर चाए ये डोरू नज्ज पैदा नि करो, बाड़ेया दे चाए पेडा नि जाओ ओर गवाईणी दे गाय बल़द नि ओ, 18तेबे बी मां परमेशरो रिया बजा ते खुश ओर मगन रणा ओर आपणे उद्धारकर्ता परमेशरो रिया बजा ते बऊत खुश रणा। 19परमेशर यहोवा मेरी तागती रा मूल़ ए, से मेरे पैर ईरणो रे पैरा जेड़े बणाई देयोआ, से माखे मेरी ऊच्ची जगा पाँदे चलाओआ।
Currently Selected:
हबक्कूक 3: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
