पजन 20
20
जीतणे रिया तँईं प्रार्थना
बजाणे वाल़े रे परदानो रिया तँईं दाऊदो रा पजन
1आऊँ प्रार्थना करूँआ कि जेबे तूँ मुसीबता दे ए तो प्रभुए तेरी सुणी लओ!
ओर याकूबो रा परमेशर तेरी रक्षा करो!
2से आपणियां पवित्र जगा ते तेरी मताद करो,
ओर सिय्योन पाह्ड़ो ते ताखे सम्बाल़ो!
3से तेरी सारी नज्जो री बलिया खे याद राखो
ओर तेरी होमबलिया खे ग्रईण करो। सेला
4से तेरी मनो री इच्छा खे पूरी करो
ओर तेरी सारी योजना खे सफल करो!
5तेबे आसा तेरे उद्धारो रिया खुशिया दे चींगणा
ओर म्हारे परमेशरो री तारीफ करी कि तेरिया जीता रा जशन मनाणा।
प्रभु ताखे तेरिया सबी प्रार्थना रा ज्वाब देओ।#20:5 पजन 60:4
6एबे माखे पता लगी गा कि यहोवा आपणे चूणे दे राजे रा उद्धार करोआ,
से पवित्र स्वर्गो ते तेसरी प्रार्थना सुणोआ फेर आपणे महान बलो ते तेसखे जीत दिलाओआ।
7केसी खे रथा रा ओर केसी खे कोड़ेया रा परोसा ए,
पर आसे आपणे प्रभु परमेशरो री सामर्था पाँदे परोसा राखूँए।#20:7 पजन 33:16,17
8एड़े लोक तो नपी गे ओर रूड़ीगे
पर आसे तो उठे ओर सीदे खड़े ए।
9ओ प्रभु, राजे खे बचाई दे,
जेबे आसे ताखे बुलाऊँ तो तूँ आसा खे ज्वाब दे।
Currently Selected:
पजन 20: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
