पजन 19
19
सृष्टिया रे परमेशरो री महिमा
बजाणे वाल़े परदानो रिया तँईं दाऊदो रा पजन
1जेबे लोक तिना चीजा खे देखोए जो परमेशरे स्वर्गो दे राखिया ए, तो सेयो समजी सकोए कि से बऊत महान ए ओर तिने सर्गो दे नौखिया चीजा बणाई राखिया ए।
2हर रोज एकी माणूंए जेड़ा परमेशरो रे बारे दे बताओआ, ओर आगले दिने बी सेई काणी ए।
ओर हर रात एकी माणूंए जेड़ी आसा खे सिखाओई कि परमेशर बड़ा महान ए।
3ना तो कोई बोली ए ओर ना कोई पाषा,
जेती तिना रा शब्द नि सुणदा।
4फेर बी तिना री आवाज सारी तरतिया पाँदे गूँजी री
ओर तिना रे वचन दुनिया रे कनारे तक पऊँची गे रे।
परमेशरे सर्गो बीचे सूरजो रिया तँईं एक मण्डप खड़ा करी राखेया,
5से एड़ा निकल़ोआ जेड़ा लाड़ा आपणे मईलो ते निकल़ोआ।
से दौड़ने वाल़े खिलाड़ी ए जेड़ा आपणी दौड़ दौड़ने रे खुश ओआ।
6से सर्गो रे एक कूणे ते निकल़ोआ
ओर से तिजी रे दूजे कूणे तक चक्कर लगाओआ
ओर तेसरी गर्मी सबी खे पऊँचोई।
7यहोवे रा बिधान खरा ए, से प्राणो खे नवीं जिन्दगी देओआ;
यहोवे रे नियम परोसे जोगे ए,
शरीफ माणूंए खे अक्लमंद बणाई देओए।
8यहोवे रे उपदेश सिद्ध ए, मनो खे खुश करी देओए;
यहोवे री आज्ञा ठीक ए, से आखी रे जोति लई आओई;
9यहोवे रा वचन पवित्र ए, से अनन्तकालो तक बणेया दा रओआ;
परमेशर यहोवे रे फैंसले खरे ओर पुरिया तरआ ते सई ए।
10सेयो तो सूईने ते जादा चाणे जोगे ए ओर शुद्ध सूईने ते बी बढ़ी की मनो खे अच्छे लगणे वाल़े ए;
सेयो सईतो ते ओर छते ते टपकणे वाल़े सईतो ते बी बढ़ी की मीठे ए।#19:10 पजन. 119:72,103
11तिना तेई तेरा दास चौकस कित्तेया जाओआ;
तिना खे मानणे ते बड़ा प्रतिफल मिलोआ।#19:11 2 यूह. 1:8, पजन 119:11
12पर कोई बी आपणी गल़ती नि समजी सकदा,
इजी री खातर ओ यहोवा, तूँ माखे मेरे गुप्त पापा खे माफ करी की पवित्र करी दे।
13तूँ आपणे दासो खे एड़िया चीजा करने ते दूर राख जो माखे पता ए कि गल़त ए;
मेरेया सारे पापा खे मां पाँदे राज नि करने दे!
जे तूँ एड़ा करेया तो आऊँ एबे एड़े पाप करने रिया तँईं दोषी नि ऊणा, ओर आऊँ तेरे खलाफ बिद्रोह करी कि बड़ा पापी नि बणना।#19:13 गिण. 15:30
14ओ परमेशर यहोवा, तूँ माखे छुड़ाणे वाल़ा ओर मेरी रक्षा करने वाल़ा मजबूत पाह्ड़ो जेड़ा ए,
मेरे मुंए रे वचन ओर मेरे मनो रा त्यान करना तां सामणे ग्रहण करने जोगा ओ!
Currently Selected:
पजन 19: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
