गिणती 21
21
कनानी राजे पाँदे जीत
1जेबे अराद शईरो रा कनानी राजा, जो दक्खण देश नेगेबो रे रओ था, तिने ये सुणेया कि अतारिमो री बाटा रिये एबे इस्राएली आऊणे लगी रे, तेबे तेसरी सेना इस्राएलो ते लड़ी ओर तिना बीचा ते कुछ लोका खे पकड़ी की बन्दी बणाई की लई चले। 2तेबे इस्राएली लोके कसम खाई, “ओ यहोवा, जे सच्ची तूँ तिना लोका खे म्हारे वशो रे करी दे, तो आसा तिना रे शईर पुरिया तरअ ते नाश करी देणे।” 3इस्राएलो री ये गल्ल सुणी की यहोवे कनानी तिना रे वशो रे करीते; तेबे तिने तिना रे शईरो समेत तिना रा बी पूरा नाश करिता; इजी खे तेते जगा रा नाओं होर्मा#21:3 होर्मा मतलब पूरा नाश राखेया।
पीतल़ी रा साप
4फेर सेयो होर नाओं रे पाह्ड़ो ते निकल़ी की लाल समुद्रो रिये गये कि एदोम देशो ते बारे-बारे कूमी की जाईए पर बाटा रिये चलदे-चलदे लोका रा मन बऊत दु:खी ऊईगा। 5तेबे सेयो परमेशरो रे खलाफ गल्ला करने लगे, ओर मूसे खे बोलेया, “तुसे लोक आसा खे मिस्रो ते सुनसाण जगा रे मरने खे कऊँ लई आये? ओर एती ना रोटी ए ओर ना ई एती पाणी ए ओर आसा रे प्राण एसा नक्कमी रोटिया खाई की ऊबी गे रे।”
6तेबे यहोवे तिना लोका बीचे तेज जईरो वाल़े साप पेजे ओर सेयो तिना खे डसणे लगे ओर बऊत इस्राएली लोक मरीगे।#21:6 1 कुरिन्थ 10:9 7तेबे लोक मूसे गे जाई कि रोंदे ऊए बोलणे लगे, “आसे पाप करी राखेया कि आसे यहोवे रे ओर तेरे खलाफ गल्ला करी राखिया; यहोवे ते प्रार्थना कर कि से इना सापा खे आसा बीचा ते दूर करो।” तेबे मूसे तिना रिया तँईं प्रार्थना कित्ती।
8यहोवे मूसे खे बोलेया, “एक तेज जईरो वाल़े सापो री मूर्ति बणवाई की खम्बे पाँदे लटका; तेबे जो सापो रा डसेया रा तिजी खे देखो से जिऊँदा ऊई जाणा।” 9तो मूसे एक पीतल़ी रे सापो री मूर्ति बणवाई की खम्बे पाँदे लटकाया; तेबे सापो रे डसेया रे बीचा ते जिने-जिने से पीतल़ी रा साप देखेया से जिऊँदा बची गा।#21:9 यूह. 3:14
होर पाह्ड़ो ते मोआबो री तरफा खे सफर
10तेबे इस्राएलिए निकल़ी की ओबोतो रे डेरे लगाए। 11फेर तिने ओबोतो ते निकल़ी की इय्ये-अबीरामो रे डेरे लगाए, इय्ये रा मतलब ए पात्थरा रा टेर, जो पूर्वो री तरफा खे मोआबो रे सामणे री सुनसाण जगा रे ए। 12तेथा ते निकल़ी की तिने जेरेद नाओं री काअटिया रे डेरे लगाए। 13फेर तेथा ते निकल़ी की तिने अर्नोन नदी, जो सुनसाण जगा रिये बह्यी की एमोरिया रे देशो रे निकल़ोई, तिजी रे दूजे कनारे डेरे खड़े कित्ते; कऊँकि अर्नोन मोआबियो ओर एमोरिया रे बीचे ऊई की मोआब देशो रा बन्ना ए। 14इजी बजअ ते यहोवे री संग्राम नाओं री कताबा रे ईंयाँ लिखी राखेया,
“सूपा रे बाहेब शईर
ओर अर्नोन नदिया री काअटिया,
15ओर तिना काअटिया री टलान जो आर नाओं रे शईरो री तरफा खे ए
ओर जो मोआबो रे बन्ने पाँदे ए।”
16फेर तेथा ते सेयो निकल़ी की बैर जगा तक गये; बैरो रा मतलब ए कुआँ, एस कुएँ रे बारे दे यहोवे मूसे खे बोलेया था, “तिना लोका खे कट्ठा कर ओर मां तिना खे पाणी देणा।”
17तेस बखते इस्राएलिए ये गीत गाया,
“ओ कुएँ, परी जा, तेस कुएँ रे बारे दे गाओ!
18जो कुआँ हाकिमे खणेया
ओर इस्राएलो रे अमीरे आपणी सोठिया ओर डण्डेया साथे ओर डूगा खणेया।”
फेर सेयो सुनसाण जगा ते मत्तान नाओं री जगा खे गए, 19फेर मत्ताना ते नहलीएल जगा खे आये ओर नहलीएलो ते बामोत जगा खे आये, 20ओर बामोतो ते निकल़ी की तेसा काअटिया री तरफा खे गए जो मोआबो रे मैदानो रे ए ओर पिसगा पाह्ड़ो रे तेस सिरे तक बी जो यशीमोनो री तरफा तक चुकेया राए, यशोमोन मतलब रेत तेथो तक पऊँची गा।
एमोरियो रे राजा सिहोनो पाँदे जीत
(बिधान 2:26-3:11)
21तेबे इस्राएली लोके एमोरिया रे राजा सिहोनो गे सन्देशा देणे खे दूत पेजी की ये बोलेया, 22“आसा खे आपणे देशो रिये ऊई की जाणे री आज्ञा दे; आसे मुड़ी की केसी डोरूए रिये या अंगूरो रे बगीचे बीछीए नि जाऊँगे; ना केसी कुएँ रा पाणी पिऊँगे ओर जदुए तक तेरे देशो ते बारे नि ऊई जाऊँगे तदुए तक सड़का रिये ई चली जाऊँगे।” 23तेबे बी सिहोन राजे इस्राएली लोका खे आपणे देशो रिये ऊई की जाणे नि दित्तेया; इतणा ई नि बल्कि आपणी सारी सेना खे कट्ठा करी की इस्राएली लोका रा मुकाबला करने खे सुनसाण जगा खे निकल़ी गा ओर यहसो तक पऊँची की तिना साथे लड़ेया। 24तेबे इस्राएली लोके सेयो पुरिया तरअ ते नाश करीते ओर अर्नोनो ते यब्बोक नदिया तक, जो अम्मोनिया रा बन्ना था, तेसरे देशो रे अक्कदार ऊईगे कऊँकि अम्मोनिया रा बन्ना तो मजबूत था। 25ईंयाँ इस्राएलिए एमोरिया रे सब शईर लई ले ओर सेयो आपणे बणाई ले, तिना साथे हेशबोन ओर तिजी रे ओरले-पोरले शईर बी आपणे बणाई कि तिदे रणे लगे। 26हेशबोन एमोरिया रे राजा सिहोनो रा शईर था; तिने मोआबो रे पईले राजे ते लड़ी की तेसरा सारा देश अर्नोनो तक तेसरे आथो ते छुड़ाई ता था। 27इजी री बजअ ते गूढ़ गल्ला करने वाल़े बोलोए,
“हेशबोनो रे आओ,
सिहोनो रा शईर वशो, ओर मजबूत कित्तेया जाओ।
28कऊँकि हेशबोनो ते आग लगी,
सिहोनो रे शईरो ते प्रयासा निकल़ेया;
जेते की मोआब देशो रा आर शईर,
ओर अर्नोनो री पाह्ड़िया री पूजा करने रिया जगा फूकी गिया।
29ओ मोआबो रे लोको, तां पाँदे हाय!
कमोश देवते री पूजा करने वाल़े लोक नाश ऊईगे,
तिने आपणे पाऊ भगोड़े बणाईते
ओर आपणी बेटिया एमोरी राजा सिहोनो री दासिया बणाई तिया।
30पर आसे सेयो लोक अराई ते,
हेशबोने तिना रे बच्चे दीबोनो तक नाश करीते
ओर आसे तिना रिया जवाणसा नोपह तक ओर तिना रे मर्द मेदबा तक नाश करीते।”
31ईंयाँ इस्राएली लोक एमोरिया रे देशो रे रणे लगे। 32तेबे मूसे याजेर शईरो रा पेत लणे पेजेया ओर तिने तेसरे गाँवो लई ले ओर तेथो रे एमोरी तेस देशो ते निकयाल़ी ते।
बाशानो रे राजा ओगो पाँदे जीत
33तेबे सेयो मुड़ी की बाशानो री बाटा रिये जाणे लगे ओर बाशानो रे राजे ओगे तिना रा मुकाबला कित्तेया, से लड़ने खे आपणी सारी सेना समेत एद्रेईया रे निकल़ी की आया। 34तेबे यहोवे मूसे खे बोलेया, “तेसते डर नि; कऊँकि मां तेसरी सारी सेना ओर देश तेरे आथो रे करी देणा ओर जेड़ा तैं एमोरिया रे राजा हेशबोनो रे रणे वाल़े सिहोनो साथे कित्तेया, तेड़ा ई तेस साथे बी करना।” 35तेबे इस्राएलिए राजा ओग ओर तेसरे पाऊ ओर सारी प्रजा खे एथो तक मारेया कि तेसरा कोई बी नि बचेया ओर सेयो तेसरे देशो रे अक्कदार ऊईगे।
Currently Selected:
गिणती 21: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
