लेवी बिधान 14
14
कोढ़ो ते शुद्ध ठराया जाणा
1फेर यहोवे मूसे खे बोलेया, 2“कोढ़िए खे शुद्ध ठराणे री बिदिया ये ए कि से पुरोईतो गे पऊँचाया जाओ;#14:2 मत्ती 8:4 3ओर पुरोईत डेरे ते बारे जाओ ओर पुरोईत तेस कोढ़िए खे देखो, जे तेसरे कोढ़ो री ब्याद ठीक ऊईगी ओ,#14:3 लूका 17:14 4तो पुरोईत आज्ञा देओ कि शुद्ध ऊणे वाल़े माणूंए खे दो शुद्ध ओर जिऊँदे पंछी, देवदारो री लकड़ी, लाल रंगो रा टाल्ला ओर जूब ये सब लई जाणी;#14:4 इब्रानी 9:19 5फेर पुरोईत आज्ञा देओ कि एक पंछी ताजे पाणिए पाँदे माट्टिया रे पांडे रे बलि करना। 6तेबे से जिऊँदे पंछिये खे देवदारो री लकड़ी, लाल रंगो रे टाल्ले ओर जूब इना सबी खे कट्ठे लई की तेस पंछिये रे खूनो रे जो ताजे पाणिए पाँदे बलि करी राखेया डबोई देओ; 7ओर कोढ़ो ते शुद्ध ऊणे वाल़े माणूंए पाँदे सात बार छिड़की की तेसखे शुद्ध ठराओ, तेबे तेस जिऊँदे पंछिये खे मैदानो रे छाडी देओ। 8ओर शुद्ध ऊणे वाल़ा आपणे टाल्ले तोओ ओर सारे बाल़ कटाई की पाणिए साथे नाओं, तेबे से शुद्ध ऊणा ओर तिजी ते बाद से डेरे रे आई जाओ, पर सात दिना तक आपणे डेरे ते बारे ई रओ। 9ओर सातुए दिने से सिर, दाढ़ी ओर प्रियूँआ रे सारे बाल़ कटवाओ ओर आपणे टाल्ले तोओ ओर पाणिए साथे नाओं, तेबे से शुद्ध ऊई जाणा।”
10आठुए दिने से पेडा रे दो बिना नुक्शो रे बच्चे, एकी सालो री बिना नुक्शो री पेडा री बच्ची ओर नज्जो री बलिया खे जैतूनो रे तेलो साथे मिले रा तीन किलो मैदा ओर आदा लीटर तेल ल्याओ। 11ओर शुद्ध ठराणे वाल़ा पुरोईत इना चीजा समेत तेस शुद्ध ऊणे वाल़े माणूंए खे यहोवे रे सामणे मिलणे वाल़े तम्बूए रे द्धारो पाँदे खड़ा करो। 12तेबे पुरोईत मिन्टू लई की दोषबलिया खे तेसखे ओर तेस 310 ग्राम तेलो खे नेड़े ल्यायो ओर इना दुँईं खे ईलाणे रिया पेंटा खे यहोवे रे सामणे ईलाओ; 13ओर पुरोईत तेसा पेडा रे बच्चे खे तेते जगा रे, जेती तेस पापबलि ओर होमबलि डांगरो रा बलिदान करेया करना, मतलब पवित्र जगा रे बलिदान करो; कऊँकि जिंयाँ पापबलि पुरोईतो रा आपणा इस्सा ऊणा तिंयाँ ई दोषबलि बी तेसरा आपणा इस्सा ठईरना; से परम पवित्र ए। 14तेबे पुरोईत दोषबलिया रे खूनो बीचा ते थोड़ा जा लई की शुद्ध ऊणे वाल़े माणूंए रे कानो रे सिरे पाँदे, तेसरे दाँणे आथ ओर दाँणे पैरो रे गूठे रे लगाओ। 15तेबे पुरोईत तेस आदा लीटर तेलो बीचा ते थोड़ा जा लई की आपणे खूँजे आथो पाँदे लटो, 16ओर पुरोईत आपणे दाँणे आथो री गूठिया खे आपणे खूँजे आथो रे तेलो रे डूबाई की तेते तेलो बीचा ते थोड़ा जा आपणी गूठिया साथे यहोवे रे सामणे सात बार छिड़को। 17फेर जो तेल तेसरे आथो रे रई जाणा पुरोईत तेते बीचा ते थोड़ा जा शुद्ध ऊणे वाल़े रे दाँणे कानो रे सिरे पाँदे, तेसरे दाँणे आथ ओर दाँणे पैरो रे गूठे पाँदे दोषबलिया रे खूनो पाँदे लगाओ; 18ओर जो तेल पुरोईतो रे आथो रे रई जाओगा, से तिजी खे शुद्ध ऊणे वाल़े माणूंए रे सिरो पाँदे लगाई देओ ओर पुरोईत तेसरिया तँईं यहोवे रे सामणे प्राश्चित करो। 19तेबे पुरोईत पापबलिया खे बी चढ़ाई की तेसरिया तँईं जो आपणी अशुद्धता ते शुद्ध ऊणे वाल़ा ओ प्राश्चित करो ओर तिजी ते बाद पुरोईत होमबलिया रे डांगरो रा बलिदान करी की 20नज्जो री बलिया समेत बेदिया पाँदे चढ़ाओ ओर पुरोईत तेसरिया तँईं प्राश्चित करो ओर तेबे से शुद्ध ऊई जाणा।
21पर जे कोई गरीब ओ ओर इतणा ल्याऊणे खे तेसगे पैसे नि ओ, तो से आपणा प्राश्चित करवाणे खे ईलाणे खे पेडा रा बच्चा दोषबलिया खे तेलो साथे मिलेया रा एक किलो मैदा नज्जो री बलि करी की ओर एक लीटर तेल ल्यायो; 22ओर दो कूगी या कबूतरिया रे दो बच्चे ल्याओ, जो से ल्याई सको ओर इना बीचा ते एक तो पापबलिया खे ओर दूजा होमबलिया खे ओ। 23ओर आठुए दिने से इना सबी खे आपू खे शुद्ध ठईरने खे मिलणे वाल़े तम्बूए रे द्धारो पाँदे, यहोवे रे सामणे, पुरोईतो गे लई आओ; 24तेबे पुरोईत तेस आदा लीटर तेलो खे ओर दोषबलिया वाल़े पेडा रे बच्चे खे लई की ईलाणे री पेंटा खे यहोवे रे सामणे ईलाओ। 25फेर दोषबलिया रे पेडा रे बच्चे रा बलिदान करेया जाओ; ओर पुरोईत दोषबलिया रे खूनो बीचा ते थोड़ा जा लई की शुद्ध ऊणे वाल़े रे दाँणे कानो रे सिरे पाँदे, तेसरे दाँणे आथ ओर दाँणे पैरो रे गूठे रे लगाओ। 26फेर पुरोईत तेस आदा लीटर तेलो बीचा ते थोड़ा जा लई की आपणे खूँजे आथो पाँदे राखो, 27आपणे दाँणे आथो री गूठिया साथे आपणे खूँजे आथो पाँदले तेलो बीचा ते थोड़ा जा यहोवे रे सामणे सात बार छिड़को; 28फेर पुरोईत आपणे आथो रे तेलो बीचा ते थोड़ा जा शुद्ध ऊणे वाल़े रे दाँणे कानो रे सिरे पाँदे, तेसरे दाँणे आथ ओर दाँणे पैरो रे गूठे पाँदे दोषबलिया रे खूनो पाँदे लगाओ। 29ओर जो तेल पुरोईतो रे आथो रे रई जाओगा, तिजी खे से शुद्ध ऊणे वाल़े रे सिरो पाँदे लगाई देओ ओर पुरोईत तेसरिया तँईं यहोवे रे सामणे प्राश्चित करो। 30तेबे से कूगी या कबूतरिया रे बच्चेया बीचा ते जो से ल्याई सकेया एकी खे चढ़ाओ, 31मतलब जो पंछी से ल्याई सकेया, तिना बीचा ते से एक पापबलिया खे ओर दूजा होमबलिया खे नज्जो री बलिया समेत चढ़ाओ; ईंयाँ पुरोईत शुद्ध ऊणे वाल़े खे यहोवे रे सामणे प्राश्चित करो। 32जेसखे कोढ़ो री ब्याद ऊई री ओ ओर तेसगे इतणी सामर्थ नि ओ कि से शुद्ध ऊणे रे समानो खे ल्याई सको, तो तेसखे येई बिधान ए। #14:32 मरक 1:44, लूका 5:14, मत्ती 8:4
भवनो रा कोढ़
33तेबे यहोवे मूसा ओर हारूणो खे बोलेया, 34“जेबे तुसे कनान प्रदेशो रे पऊँचो, जो मां तुसा री आपणी जमीन ऊणे खे तुसा खे देणी, तेस बखते जे आऊँ कोढ़ो री ब्याद तुसा रे अक्को रे केसी कअरो रे दखाऊँ, 35तो जेसरा से कअर ओ से आई की पुरोईतो गे बताई देओ कि माखे एड़ा लगोआ कि कअरो रे कोई ब्याद ए। 36तेबे पुरोईत आज्ञा देओ कि तेते कअरो रे ब्याद देखणे खे मेरे जाणे ते पईले तेस खाली करी देओ, केथी एड़ा नि ओ कि जो कुछ कअरो रे ओ से सब अशुद्ध ठईरो ओर इजी ते बाद पुरोईत कअर देखणे खे पीतरे जाओ। 37तेबे से तेसा ब्यादा खे देखो ओर जे से ब्याद कअरो री कांदा रे अरी-अरी या लाल-लाल मानो खणी री लकीरा जेड़ी ओ ओर यो लकीरा कांदा रे गईरिया दिशणे लगी रिया ओ, 38तो पुरोईत कअरो ते बारे द्धारो पाँदे जाई की कअरो खे सात दिना तक बन्द करी देओ। 39ओर सातुए दिने पुरोईत आई की देखो; जे से ब्याद कअरो रिया कांदा रे फैली गी ओ, 40तो पुरोईत आज्ञा देओ कि जिना पात्थरा रे ब्याद ए तिना खे निकयाल़ी की शईरो ते बारे केसी अशुद्ध जगा रे सेटी देओ; 41ओर से कअरो रे पीतरे ई पीतरे चऊँ कनारे खुरचवाओ ओर से खरेचणे री माट्टी शईरो ते बारे केथी अशुद्ध जगा रे सेटी देणी; 42फेर तिना पात्थरा रिया जगा रे ओर दूजे पात्थर लई की लगाणे ओर पुरोईत ताजा गारा लई की कअरो खे लिपो।”
43जे पात्थरा खे निकयाल़ने ते बाद, कअरो खे खरेचणे ओर लिपणे ते बाद से ब्याद फेर कअरो दे निकल़ी जाओ, 44तो पुरोईत आई की देखो ओर जे ब्याद कअरो दे फैली गी ओ, तो से जाणी लो कि कअरो रे गल़ाणे वाल़ा कोढ़ ए, से अशुद्ध ए। 45तेबे से सारे गारे समेत पात्थर, लकड़ी ओर कअरो खे खणी की टाल़ी देओ ओर तिना सबी चीजा खे चकाई की शईरो ते बारे केथी अशुद्ध जगा रे सटयाई देओ। 46ओर जदुओ तक से कअर बन्द रओ तदुओ तक जे कोई तिदे जाओ, तो से साँजा तक अशुद्ध रओ; 47ओर जो कोई तेस कअरो दे सओ या कोई तेते कअरो दे रोटी खाओ से आपणे टाल्ले तोई लओ।
48पर जे पुरोईत आई की देखो कि जदुओ ते कअर लिपी राखेया तदुओ ते तिदे ब्याद नि फैली री, तेबे ये जाणी की कि से ब्याद दूर ऊईगी री, कअरो खे शुद्ध ठराओ। 49ओर तेस कअरो खे पवित्र करने खे दो पंछी, देवदारो री लकड़ी, लाल रंगो रा टाल्ला ओर जूब ल्याओ, 50ओर एक पंछी ताजे पाणिए पाँदे माट्टिया रे पांडे रे बलिदान करो, 51तेबे से देवदारो री लकड़ी, लाल रंगो रे टाल्ले ओर जूब ओर जिऊँदा पंछी इना सबी खे लई की बलिदान कित्ते रे पंछिये रे खूनो दे ओर ताजे पाणिए दे डबोई देओ ओर तेस कअरो पाँदे सात बार छिड़को। 52ईंयाँ से पंछिये रे खूने की, ताजे पाणिए रे, जिऊँदा पंछी, देवदारो री लकड़ी, जूब ओर लाल रंगो रे टाल्ले रे जरीये कअरो खे पवित्र करो; 53तेबे से जिऊँदे पंछिये खे शईरो ते बारे मैदानो रे छाडी देओ; ईंयाँ से कअरो रिया तँईं प्राश्चित करो, तेबे से शुद्ध ठईरना।
54सबी प्रकारा रे कोढ़ो री ब्याद ओर जख्म, 55ओर टाल्ला ओर कअरो रा कोढ़, 56ओर सोजा ओर पापड़ी ओर दागो रे बारे दे, 57केसी खे बी शुद्ध ओर अशुद्ध ठराणे री शिक्षा देणे रा बिधि-बिधान येई ए। सबी प्रकारा रे कोढ़ो रा बिधि-बिधान येई ए।
Currently Selected:
लेवी बिधान 14: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
