लेवी बिधान 13
13
चामड़िया रे रोगो ते जुड़े रे नियम
1तेबे यहोवे मूसा ओर हारूणो खे बोलेया, 2“जेबे केसी माणूंए रे शरीरो री चामड़िया पाँदे सोजा या पापड़ी या दाग ऊई जाओ ओर तेसरे चामड़िया रे कोढ़ो री बमारिया जेड़ा कुछ दिशो, तो तेसखे हारूण पुरोईतो गे या तेसरे पाऊआ गे जो पुरोईत ए तिना बीचा ते केसी एकी गे लई जाओ। 3जेबे पुरोईत तेसरे चामड़िया री बमारिया खे देखो ओर तेसरी ब्यादी री जगा रे बाल़ सफेद ऊईगे ओ ओर ब्याद चामड़िया रे पीतरे गईरी दिशो, तो से जाणी लो कि ये कोढ़ो जेड़ी चामड़िया रा रोग ए ओर पुरोईत तेस माणूंए खे देखी कि तेसखे अशुद्ध ठराओ। 4पर से दाग तेसरी चामड़िया रे सफेद तो ओ, पर चामड़िया ते गईरा नि दिखो ओर ना ई तेते जगा रे बाल़ सफेद ऊई रे ओ, तो पुरोईत तेस माणूंए खे साता दिना तक बंद करी की राखो; 5ओर सातुए दिने पुरोईत तेसखे फेर देखो ओर जे से ब्याद जेड़ी की तेड़ी बणी री रओ ओर तेसरी चामड़िया रे नि फैली री ओ, तो पुरोईत तेसखे ओर साता दिना तक बन्द करी की राखो; 6ओर सातुए दिने पुरोईत तेसखे फेर देखो ओर जे दिशो कि ब्यादिया री चमक कम ए ओर ब्यादी चामड़िया पाँदे ओर फैली री नि ओ, तो पुरोईत तेसखे शुद्ध ठराओ; कऊँकि तेसरे चामड़िया रे तो पापड़ी ए ओर से आपणे टाल्ले तोई की शुद्ध ऊई जाओ। 7पर जे पुरोईतो रे देखणे ते बाद जिदे से शुद्ध ठराया था, से पापड़ी तेसरी चामड़िया रे बऊत फैली जाओ, तो से फेर पुरोईतो गे दखाया जाओ; 8ओर जे पुरोईतो खे दिशो कि पापड़ी चामड़िया रे फैली गी री, तो से तेसखे अशुद्ध ठराओ, कऊँकि से कोढ़ ईए जो एकी-दूजे खे फैली सकोआ।”
9जे केसी खे फैलणे वाल़ी कोढ़ो री जी ब्याद ओ, तो से माणूं पुरोईतो गे पऊँचाया जाओ; 10ओर पुरोईत तेसखे देखो ओर जे से सोजा तेसरी चामड़िया पाँदे सफेद ओ ओर तिजी री बजअ ते बाल़ बी सफेद ऊईगे ओ ओर तेते सोजे रे बिना चामड़िया रा मास ओ, 11तो पुरोईत जाणी लओ कि तेसरी चामड़िया रे फैलणे वाल़ा कोढ़ ए, इजी री खातर से तेसखे अशुद्ध ठराओ ओर तेसखे बन्द करी की नि राखो, कऊँकि से अशुद्ध ए। 12ओर जे कोढ़ केसी री चामड़िया रे एथो तक फैली जाओ कि जेती केथी पुरोईत देखो रोगिए रे सिरो ते लई की पैरो रे तल़ुए तक कोढ़ सारी चामड़िया तक फैली गा रा, 13तो पुरोईत त्यानो साथे देखो ओर जे कोढ़ तेसरे सारे शरीरो रे फैली गा रा, तो से तेस माणूंए खे शुद्ध ठराओ; कऊँकि तेसरा शरीर जो बिल्कुल सफेद ऊईगा रा इजी खे से शुद्ध ई ठईरो। 14पर जेबे तिदे चामड़िया ते बगैर मास दिशो, तेबे तो से अशुद्ध ठईरो। 15पुरोईत चामड़िया ते बगैर मास देखी की तेसखे अशुद्ध ठराओ, चामड़िया ते बगैर मास अशुद्ध ई ओआ; कऊँकि से कोढ़ो जेड़ा रोग ए। 16पर जे से चामड़िया ते बगैर मास फेर सफेद ऊई जाओ, तो से माणूं पुरोईतो गे जाई की दखाओ, 17तेबे पुरोईत तेसखे देखो ओर जे से ब्याद दुबारा ते सफेद ऊईगी ओ, तो पुरोईत रोगिए खे शुद्ध जाणो; तेबे से शुद्ध ए।
18फेर जे केसी माणूंए री चामड़िया रे फोड़ा ऊई की ठीक ऊईगा ओ, 19ओर फोड़े री जगा रे सफेद जा सोजा या लाल ऊई की सफेद दाग ओ, तो से पुरोईतो गे दखाया जाओ; 20फेर पुरोईत तेस सोजे खे देखो ओर जे से चामड़िया ते गईरा दिशो ओर तिजी रे बाल़ बी सफेद ऊईगे ओ, तो पुरोईत तेस माणूंए खे ये जाणी की अशुद्ध ठराओ; कऊँकि से कोढ़ो री ब्याद ए, जो फोड़े ते फूटी की निकल़ी री। 21पर जे पुरोईत देखो कि तिदे सफेद बाल़ निए ओर से चामड़िया ते गईरी निए ओर तेतेरी चमक कम ऊई री, तो पुरोईत तेस माणूंए खे साता दिना तक सबी ते लग राखो। 22ओर जे से ब्याद तेस बखतो तक चामड़िया रे सच्ची फैली जाओ, तो पुरोईत तेस माणूंए खे अशुद्ध ठराओ; कऊँकि से कोढ़ो री ब्याद ए। 23पर जे से दाग नि फैलो ओर आपणी ई जगा रे बणेया रा रओ, तो से फोड़े रा दाग ए; इजी खे पुरोईत तेस माणूंए खे शुद्ध ठराओ।
24फेर जे केसी रे चामड़िया रे फूखणे रा जख़्म ओ ओर तेस फूखणे रे जख़्मो रे चामड़िया ते बगैर दाग लाल ऊई की सफेद या सफेद ई ऊई जाओ, 25तो पुरोईत तेस दागो खे देखो ओर तेते दागो रे बाल़ सफेद ऊईगे रे ओ ओर से चामड़िया ते गईरा दिखो, तो से कोढ़ ए; जो तेस फूखणे रे दागो ते फूटी की निकल़ी रा; पुरोईत तेस माणूंए खे अशुद्ध ठराओ; कऊँकि तेसरे कोढ़ो री ब्याद ए। 26पर जे पुरोईत देखो कि दागो रे सफेद बाल़ निए ओर ना ई से चामड़िया ते गईरा ए ओर तेतेरी चमक कम ऊई री, तो से तेसखे साता दिना तक बन्द करी की राखो, 27ओर सातुए दिने पुरोईत तेसखे देखो ओर जे से चामड़िया रे फैली गी ओ, तो पुरोईत तेस माणूंए खे अशुद्ध ठराओ; कऊँकि तेसखे कोढ़ो री ब्याद ए। 28पर जे से दाग चामड़िया रे नि फैलेया ओ ओर आपणी जगा पाँदे तेड़ा रा तेड़ा ई बणेया रा ओ ओर तेतेरी चमक कम ऊई री ओ, से फूकणे रिया बजअ ते सूजी रा, तो पुरोईत तेस माणूंए खे शुद्ध ठराओ, कऊँकि से दाग फूकणे रिया बजअ ते ए।
29फेर जे केसी जवाणसा रे सिरो रे या मर्दो री ठोडिया रे जख्म ओ, 30तो पुरोईत जख्मो खे देखो ओर जे से चामड़िया ते गईरा दिखो ओर तिदे पूअरे-पूअरे पतल़े बाल़ ओ, तो पुरोईत तेस माणूंए खे अशुद्ध ठराओ; से सिर या ठोडिया रा कोढ़ ए। 31जे पुरोईत तेस जख्मो खे देखो कि से चामड़िया ते गईरा निए ओर तिदे काल़े-काल़े बाल़ निए, तो से रोगिए खे सात दिना तक बन्द करी की राखो। 32ओर सातुए दिने पुरोईत तेस जख्मो खे देखो, तेबे जे से फैलेया रा नि ओ ओर तिदे पूअरे-पूअरे बाल़ नि ओ ओर से चामड़िया ते गईरा नि दिखो, 33तो से माणूं गँजा कराया जाओ, पर जेती से जख्म ऊई रा ओ, तेती से गँजा नि करना ओर पुरोईत तेस माणूंए खे ओर बी साता दिना तक बन्द करी देओ; 34ओर सातुए दिने पुरोईत जख्मो खे देखो ओर जे से चामड़िया रे नि फैली रा ओ ओर चामड़िया ते गईरा नि दिखो, तो पुरोईत तेस माणूंए खे शुद्ध ठराओ ओर से आपणे टाल्ले तोई की शुद्ध ठईरो। 35पर जे तेसरे शुद्ध ऊणे ते बाद जख्म चामड़िया रे थोड़ा जा बी फैलो, 36तेबे पुरोईत तेसखे देखो ओर जे से चामड़िया रे फैली रा ओ, तो पुरोईत तिदे पूअरे बाल़ नि टोल़ो, कऊँकि से माणूं अशुद्ध ए। 37पर जे तेसरी नजरा रे से जख्म तेड़ा रा तेड़ा ई बणेया रा रओ ओर तिदे काल़े-काल़े बाल जम्मी रे ओ, तो से जाणी लओ कि जख्म ठीक ऊईगा रा ओर से माणूं शुद्ध ए, पुरोईत तेसखे शुद्ध ई ठराओ।
38फेर जे केसी जवाणसा रे या मर्दो रे चामड़िया रे सफेद दाग ओ, 39तेबे पुरोईत तिजी खे देखो ओर जे तेसरी चामड़िया रे सेयो दाग कम सफेद ओ, तो से जाणी लओ कि तेसखे चामड़िया रे निकल़ी री जाज ईए, तो से माणूं शुद्ध ठईरो।
40फेर जे केसी रे सिरो रे बाल़ चढ़ीगे ओ, से गँजा तो अए, पर शुद्ध ए। 41ओर जेसरे सिरो रे आगले बाल़ चढ़ीगे ओ, से माथे ते गँजा तो अए, पर शुद्ध ए। 42पर जे तेसरे गँजे सिरो रे या माथे पाँदे लाल ओर सफेद दाग ओ, तो जाणी लणा कि से तेसरे गँजे सिरो पाँदे या माथे पाँदे निकल़ेया रा कोढ़ ए। 43इजी री खातर पुरोईत तेसखे देखो ओर जे जख्मो रा सोजा तेसरे गँजे सिरो पाँदे या माथे पाँदे एड़ा लाल ओर सफेद ओ, जेड़ा चामड़िया रे कोढ़ो रे ओआ, 44तो से माणूं कोढ़ी ए ओर अशुद्ध ए; इजी खे पुरोईत तेसखे जरूर अशुद्ध ठराओ; कऊँकि से जख्म तेसरे सिरो पाँदे ए।
45एड़े कोढ़िए रे टाल्ले फटे रे ओर सिरो रे बाल़ पतिंगे रे रओ ओर से आपणा मुंओ पाँदला ओठ टखी की अशुद्ध-अशुद्ध बोलदा रओ। 46जितणे दिना तक से ब्याद तेसरे रओ तितणे दिना तक से तो अशुद्ध रणा; इजी री खातर से कल्ला रया करो, तेसरे रणे री जगा डेरे ते बारे ओ।#13:46 लूका 17:12
टाल्ले ओर चामड़े री चीजा रा कोढ़
47फेर जिना टाल्लेया रे कोढ़ो री ब्याद ओ, चाए से टाल्ला ऊना रा ओ चाए लीलणो रा, 48से ब्याद चाए तेते लीलणो रे या ऊना रे टाल्ले रे थाले ओ चाए पाँदे, या से ब्यादी चामड़े रे या चामड़े ते बणी री केसी चीजा रे ओ, 49जे से ब्याद केसी टाल्ले रे चाए थाले ओ चाए पाँदे या चामड़े रे या चामड़े ते बणी री केसी चीजा रे अरी ओ या लाल जी ओ, तो जाणी लणा कि से कोढ़ो री ब्याद ए ओर से पुरोईतो गे दखाई जाओ।#13:49 मत्ती 8:4, मरक 1:44, लूका 5:14, लूका 17:14 50ओर पुरोईत तेसा चीजा खे देखो ओर ब्यादी वाल़ी चीजा खे साता दिना तक बन्द करी की राखो; 51ओर सातुए दिने तेसा चीजा खे देखो ओर जे से ब्याद टाल्ले रे चाए पाँदे ओ चाए थाले, या चामड़े रे या चामड़े री बणी री केसी चीजा रे फैली गी ओ, तो जाणी लणा कि से गल़ाणे वाल़े कोढ़ो री बमारी ए, इजी री खातर से चीज, चाए केड़े ई कामो री कऊँ नि ओ, तेबे बी अशुद्ध ठईरनी। 52से तेस टाल्ले खे जिदे थाले या पाँदे ब्याद ओ, चाए से ऊना रा बुणेया रा ओ चाए लीलणो रा या चामड़े री चीजा रा ओ, तिजी खे फूकी देओ, से ब्याद गल़ाणे वाल़े कोढ़ो री ए, से चीजा आगी रे फूकी जाओ।
53जे पुरोईत देखो कि से ब्याद तेस टाल्ले रे थाले या पाँदे ए या चामड़े री बुणी री तेसा चीजा रे नि फैली, 54तेबे पुरोईत जेते चीजा रे ब्याद ए तिजी खे तोणे री आज्ञा देओ, तेबे तिजी खे ओर बी साता दिना तक बन्द करी की राखो; 55ओर तिजी खे तोणे ते बाद पुरोईत तिजी खे देखो ओर जे ब्यादिया रा ना तो रंग बदली रा ओ ओर ना ई ब्याद फैली री ओ, तो जाणी लणा कि से अशुद्ध ए; से आगी रे फूकी देणी। 56पर जे पुरोईत देखो कि तेतेरे तोणे ते बाद ब्यादिया री चमक कम ऊईगी, तो से तिजी खे चाए पाँदे ओ चाए थाले ओ या चामड़े री बुणी री चीजा ते फाड़ी की निकयाल़ो; 57ओर जे से ब्याद तेबे बी तेते टाल्ले रे थाले या पाँदे या चामड़े री बुणी री तेते चीजा रे दिशो, तो जाणी लणा कि से फूटी की निकल़ी री ब्याद ए ओर जिदे से ब्याद ओ से आगी रे फूकी देणा। 58जे तेते टाल्ले ते जेतेरे थाले या पाँदे ब्याद ओ या चामड़े री बुणी री जो चीज ओ तेते ते जेबे तोई जाओ ओर ब्याद जांदी रओ, तो से दूजी बार तोई की शुद्ध ठईरो।
59ऊन या लीलणो रे टाल्ले रे थाले या पाँदे या चामड़े री बुणी री केसी चीजा रे जो कोढ़ो री ब्याद ओ तिजी खे शुद्ध या अशुद्ध ठराणे रा येई बिधि-बिधान ए।
Currently Selected:
लेवी बिधान 13: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
