योएल 1
1
1यहोवे रा वचन योएल भविष्यवक्ते गे पऊँचेया, जो पूतीएलो रा पाऊ ए, यहोवा ईंयाँ बोलोआ:
टिड्डिया रा अमला
2ओ इस्राएल देशो रे परदानो, सुणो, ओर एते जमीना दे रणे वाल़े सब लोको, त्यानो साथे सुणो! एड़ी गल्ल तुसा रे दिना दे, या तुसा रे बुजुर्गा रे दिना दे कदी पनि ऊई री। 3इना गल्ला रे बारे दे तुसा आपणे बच्चेया गे दशेया करना ओर तुसा रे बच्चेया यो गल्ला आपणे बच्चेया गे दशेया करनिया ओर तुसा रे नाती पोतेया यो गल्ला आऊणे वाल़ी पीढ़िया गे दशेया करनिया। 4जो कुछ गाजाम#1:4 गाजाम कुतरने वाल़िया नाओं री टिड्डिया ते बचेया, से अर्बे#1:4 अर्बे उडणे वाल़ी नाओं री टिड्डिये खाई ला ओर जो कुछ अर्बे नाओं री टिड्डिया ते बचेया, से येलेक#1:4 येलेक उटकणे वाल़ी नाओं री टिड्डिये खाई ला ओर जो कुछ येलेक नाओं री टिड्डिया ते बचेया, से हारसील#1:4 हारसील छिलणे वाल़ी टिड्डिये खाई ला।
टिड्डिया रा आऊणा
5ओ शराबियो, जागी जाओ ओर रोओ! ओ सारे शराब पीणे वाल़ेयो लोको, रोओ। कऊँकि तुसा रा नवां शराब एबे खत्म ऊई चूकी रा ए। हाय, हाय करो, कऊँकि एबे तुसा खे से फेर नि मिलणा। 6टिड्डिया एक तागतबर सेना जेड़िया ए जो मेरे देशो री जमीना दे कूसी चूकी रिया ए। सेयो इतणी जादा ए कि तिना खे गिणी पनि सकदे। तिना रे दाँद शेरो रे दाँदा जेड़े पईने ए। सेयो शेरनिया रे तीखे दाँदा जेड़े ए। 7तिने मेरिया अंगूरा री बेला उजाड़ी तिया ओर मेरे दाऊगल़ेया रे डाल़ तोड़ी ते। तिना मेरे डाल़ा रे छिलके बी चट करी जाणे। तिना रिया पाँगटिया चीटिया ऊई जाणिया ओर सेयो डाल़ सूकी जाणे।
लोका रा रोणा
8जिंयाँ कोई नवीं लाड़ी आपणे लाड़े रे मरने रिया तँईं लको दे टाट बानी की शोग करोई, तिंयाँ ई तुसे बी शोग करो। 9यहोवे रे मन्दरो दे ना तो नज्जो री बलि ओर ना अर्घ आओआ। तेसरी सेवा करने वाल़े जो पुरोईत ए, सेयो शोग करोए। 10कऊँकि जमीना री फसल बर्बाद ऊई गी, एथो तक कि जमीन बी सूकी गी दी ए, कऊँकि नज्ज नाश ऊईगा, अंगूरा री नवीं फसल बर्बाद ऊईगी री। जैतूनो रा तेल बी खत्म ऊईगा। 11ओ जिम्मीदारो, शर्मिंदा ओ, ओ अंगूरा रे बगीचेया रे मालको, कणक ओर जौ खे हाय, हाय करो, कऊँकि फसल बर्बाद ऊई गी री। 12अंगूरा री बेल सूकी गी ओर दाऊगल़ेया रे डाल़ मुरझाणे लगी रे। अनार, खजूर, सेऊ, बल्कि मैदानो रे सारे डाल़ सूकी गे रे ओर लोका बीचे खुशी खत्म ऊईगी दी ए। 13ओ पुरोईतो, लको दे टाट बानी की शोग करो! रोओ, तुसे जो बेदिया री सेवा करोए, शोग करो; तुसे जो मन्दरो दे मेरे परमेशरो री सेवा करोए। आओ, ओर शोगो रे टाल्ले पईनी की रात काटो। रोओ कऊँकि एबे कोई बी तुसा रे परमेशरो रे मन्दरो दे नज्जो री बलि ओर अर्घ नि ल्याऊँदे। 14पवित्र बअरतो रा दिन ठराओ, लोका खे बोलो कि सेयो कुछ नि खाओ। तिना खे एक खास सेवा खे कट्ठा करो। मुखिया खे, ओर तिना सबी खे जो देशो दे रणे वाल़े ए, तिना खे बी बुलाओ। तिना खे आपणे परमेशर यहोवे रे मन्दरो दे बुलाओ। ओर तेसते प्रार्थना करो। 15तेते दिनो खे हाय! कऊँकि यहोवे रा दिन नेड़े ए। से सर्वशक्तिमान परमेशरो रिया तरफा ते सत्यानाश ऊणे रा दिन ऊई की आऊणा। 16म्हारे खाणे-पीणे रिया चीजा आसा सामणे बर्बाद ऊईया। ओर म्हारे परमेशरो रे मन्दरो री खुशी ओर आनन्द चली गा। 17जो बीज आसे बाया था से सूका पड़ने रिया बजा ते फूकीगा ओर नज्जो री फसल बर्बाद ऊई गी। खल्याण खाली ऊईगे ओर नज्जो रे पण्डार खाली ऊईगे।
18डांगर पीड़ा रिया बजा ते किंयाँ रोणे लगी रे? जानवरा रे चूण्डा रे चूण्ड ओरे-पोरे पटकणे लगी रे, कऊँकि तिना खे चरने खे काआ नि मिलणे लगी रा। ओर पेडा-बाकरिया रे चूण्डा रे चूण्ड बी पीड़ा दे ए। 19ओ यहोवा, आऊँ तेरी दुहाई देऊँआ, कऊँकि उजाड़ जगा रिया चराईया आगी दे स्वा ऊईगिया ओर बणो रे सारे डाल़ आगी री बजा ते फूखी गे। 20उजाड़ जगा रे जानवर बी तुसा ते मतादा रिया तँईं बोलोए। पाणिए रिया सूबल़ा सूकी गी रिया ए। ओर आगी रेगिस्तानो रे काओ रे मैदान फूकी ते दे ए।
Currently Selected:
योएल 1: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
