उत्पत्ति 27
27
इसहाको रा एसावो खे आशीर्वाद देणे रा बिचार
1जेबे इसहाक स्याणा ऊईगा ओर तेसरिया आखी एड़िया तुँदल़िया पड़ी गिया कि तेसखे दिशो नि था, तेबे तिने आपणे जेठे पाऊ एसावो खे बुलाई की बोलेया, “ओ मेरे पाऊ,” तिने बोलेया, हाँजी पिता जी, “आऊँ एती ए।” 2तिने बोलेया, “सुण, आँऊ तो स्याणा ऊईगा रा ओर आँऊ नि जाणदा कि आऊँ कदी मरी जाणा। 3इजी री खातर एबे तूँ आपणे शिकार करने रे औजार बगैरा लई की मैदानो खे जा ओर माखे शिकार करी की ली आओ। 4मेरी पसन्दा रे मुताबिक स्वाद रोटी बणाई की मांगे ली आओ ताकि आँऊ मरने ते पईले तिजी खे खाई की ताखे दिलो ते आशीर्वाद देई सकूँ।”
5तेबे एसाव शिकार करने खे मैदानो रे गया। जेबे इसहाक एसावो साथे इना गल्ला बोलणे लगी रा था तेबे रिबका सुणने लगी री थी।
याकूबो रे जरीये आशीर्वाद चुराणे रा बिचार
6रिबके आपणे पाऊ याकूबो खे बोलेया, “सुण, मैं तेरा बाओ तेरे पाई एसावो साथे ये बोलदा ऊए सुणेया, 7कि तूँ मेरिया तँईं शिकार करी की तिजी री स्वाद रोटी बणा, ताकि आऊँ तिजी खे खाई की ताखे यहोवे रे आगे मरने ते पईले आशीर्वाद देई सकूँ। 8इजी री खातर एबे, ओ मेरे पाऊ, मेरी गल्ल त्यानो साथे सुण ओर आँऊ जिंयाँ बोलूँई तिंयाँ कर। 9तूँ बाकरिया रे चूण्डो गे जाई की तिना रे दो अच्छे-अच्छे बच्चे ली आओ ओर मां तेरे बाओ री खातर तिना री पसन्दा रे मुताबिक स्वाद रोटी बनाणी। 10तेबे तैं से आपणे बाओ गे लई जाणा ताकि से तिजी खे खाई की मरने ते पईले ताखे आशीर्वाद देओ।”
11याकूबे आपणी आम्मा रिबका खे बोलेया, “मेरा पाई एसाव तो बऊत बाल़ो वाल़ा मर्द ए ओर आऊँ तो बिना बाल़ो वाल़ा मर्द ए। 12जे केथी मेरा बाओ माखे टटोल़ने लगो तो आऊँ तेसरी नजरा दे तोखेबाज ठईरना ओर आशीषा रे बदले स्राप ई कमाणा।”
13तेसरी आम्मे तेसखे बोलेया, “ओ मेरे पाऊ, स्राप तां पाँदे नि, मां पाँदे ई पड़ो। तूँ बस मेरी सुण ओर जाई की बाकरिया रे बच्चेया खे मांगे ली आओ।”
14तेबे याकूबे जाई की तिना खे आपणी आम्मा गे लई आया ओर तेसरी आम्मे तेसरे बाओ री पसन्दा रे मुताबिक स्वाद रोटी बणाईती। 15तेबे रिबके आपणे जेठे पाऊ एसावो रे बांके टाल्ले जो तेसा गे कअरे थे, लई की आपणे छोटे पाऊ याकूबो खे पन्याईते। 16ओर बाकरिया रे बच्चेया रिया खाला तेसरे आथो रे ओर तेसरे चिकणे गल़े रे लपेटी तिया। 17ओर से स्वाद सलूणा ओर आपणी बणाई री रोटी बी आपणे पाऊ याकूबो रे आथो रे देईती।
18तेबे से आपणे बाओ गे गया ओर बोलेया, “ओ मेरे बाओ,” तिने बोलेया, “क्या गल्ल ए? ओ मेरे पाऊ तूँ कुण ए?” 19याकूबे आपणे बाओ खे बोलेया, “आँऊ तेरा जेठा पाऊ एसाव ए। मैं तेरी आज्ञा रे मुताबिक करी राखेया। तो उठ ओर बैठी की मेरे शिकारो खे खा कि तूँ माखे जिऊए ते आशीर्वाद देई सको।”
20फेर इसहाके आपणे पाऊए खे बोलेया, “ओ मेरे पाऊ, क्या बजअ ए कि ये ताखे इतणी चट ई मिलीगा?” तिने ये जबाब दित्तेया, “तेरे परमेशर यहोवे से मां सामणे करी ता।”
21तेबे इसहाके याकूबो खे बोलेया, “ओ मेरे पाऊ नेड़े आओ, आऊँ ताखे तोपी की जाणूं कि तूँ सच्ची मेरा पाऊ एसाव ए कि नई।” 22तेबे याकूब आपणे बाओ इसहाको रे नेड़े गया ओर तिने तेसखे तोपी की बोलेया, “तेरा बोल तो याकूबो जेड़ा ए, पर तेरे आथ एसावो जेड़े ई लगो ए।” 23ओर तिने से नि पछयाणा, कऊँकि तेसरे आथ तेसरे पाई एसावो जेड़े बाल़ा वाल़े थे। ओर इसहाके तेसखे आशीर्वाद दित्तेया।
24फेर तिने पूछेया, “क्या तूँ सच्ची मेरा पाऊ एसाव ए?” याकूबे बोलेया, “आ पिता जी, आऊँ आ।”
याकूबो खे आशीर्वाद मिलणा
25फेर इसहाके बोलेया, “ओ मेरे पाऊ, शिकारो री रोटी मां नेड़े ली आओ ताकि आऊँ आपणे पाऊए रे शिकारो री रोटी खाई की ताखे दिलो ते आशीर्वाद देऊँ।” तेबे याकूब तेसा रोटिया खे तेसरे नेड़े ली आया ओर तिने खाया ओर से तेसगे शराब बी ली आया ओर तिने पिया। 26फेर तेसरे बाओ इसहाके तेसखे बोलेया, “ओ मेरे पाऊ नेड़े आई की मेरे गल़े लग।”
27से नेड़े जाई की तेसरे गल़े लगेया। तेबे इसहाके तेसरे टाल्लेया री खुशबू सींगी की तेसखे ये आशीर्वाद दित्तेया,
“देख, ये मेरे पाऊए री खुशबू ए,
ये डोरूए री खुशबू जेड़ी ए,
जेते पाँदे यहोवे आशीष देई राखी;
28परमेशर ताखे सर्गो ते पाल़ा,
ओर जमीना री खरिया ते खरी फसल,
ओर बऊत सारा नज्ज ओर नया शराब देओ;
29दुनिया रे प्रदेशो रे लोक तेरे अधीन ओ
ओर हर जातिया रे लोक तांगे माथा टेको;
तूँ आपणे पाईया रा मालक ओ
ओर तेरी आम्मा रे पाऊ तांगे माथा टेको।
जो ताखे स्राप देओ, से आपू ई स्रापित ओ,
ओर जो ताखे आशीर्वाद देओ, से आशीष पाओ।”
आशीर्वादो खे एसावो री अर्ज करना
30जिंयाँ ई ये आशीर्वाद इसहाक याकूबो खे देई चुकेया ओर याकूब आपणे बाओ इसहाको रे सामणे ते निकल़ने ई लगी रा था कि एसाव शिकार करी की पऊँची गा। 31तेबे से बी स्वाद रोटी बणाई की आपणे बाओ गे ली आया ओर तिने आपणे बाओ खे बोलेया, “ओ मेरे बाओ, उठी की आपणे पाऊए रे शिकारो रा मास खा ओर माखे दिलो ते आशीर्वाद दे।”
32तेसरे बाओ इसहाके पूछेया, “तूँ कुण ए?” तेबे तिने बोलेया, “आऊँ तेरा जेठा पाऊ एसाव ए।”
33तेबे इसहाके बऊत जादा थरथरांदे ऊए बोलेया, “तेबे से कुण था, जो शिकार लई की मांगे ली आया था ओर मैं तेरे आऊणे ते पईले खाई ला ओर तेसखे आशीर्वाद दित्तेया? ओर से सच्चो खेई आशीषित बी ऊणा।”
34आपणे बाओ री ये गल्ल सुणी की एसावे बऊत दु:खी ऊई की जोरे की रोंदे ऊए आपणे बाओ खे बोलेया, “ओ मेरे बाओ, माखे बी आशीर्वाद दे।”
35फेर तिने बोलेया, “तेरा पाई तोखे साथे आया ओर तेरे आशीर्वाद लई की चलीगा।”
36तेबे एसावे आपणे बाओ खे बोलेया, “क्या तेसरा नाओं याकूब ईंयाँ ई नि राखी राखेया? तिने माखे दो बार तोखा दित्तेया, पईले मेरा जेठे ऊणे रा अक्क तो तिने छुड़ाई ला ओर एबे देख, तिने मेरे आशीर्वाद बी लई ले।” फेर तिने बोलेया, “क्या तैं मेरिया तँईं बी कोई आशीर्वाद बचाई की नि राखेया?”
37इसहाके एसावो खे जबाब देई की बोलेया, “सुण, मैं से तेरा स्वामी ठराया ओर तेसरे सारे पाई तेसरे अधीन करीते ओर नज्ज ओर नई शराब देई की से रज्जाई राखेया, तो एबे ओ मेरे पाऊ, आऊँ तेरिया तँईं एबे कुछ नि करी सकदा?”
38एसावे आपणे बाओ खे बोलेया, “ओ मेरे पिता, क्या तेरे मनो रे एक ई आशीर्वाद ए? ओ मेरे पिता, माखे बी आशीर्वाद दे।” ईंयाँ बोली की एसाव जोरे-जोरे की रोणे लगेया।
39तेसरे बाओ इसहाके तेसखे बोलेया,
“सुण, तेरे रणे री जगा पजणे वाल़ी जमीना ते दूर ओ
ओर सर्गो रा पाल़ा पड़ने वाल़ी जगा ते बी दूर ओ।
40तूँ आपणी तलवारी रिया तागती पाँदे जिऊँदा रणा
ओर आपणे पाईए रे अधीन तो ओ,
पर जेबे तूँ आजाद ऊई जाणा,
तेबे तेसरा बोज आपणी कांदा पाँदा ते चकी की सेटी देणा।”#27:40 इब्रानी 11:20
याकूबो रा एसावो रे डरो ते नठणा
41एसावे तो याकूबो साथे आपणे बाओ रे दित्ते रे आशीर्वादो रिया बजअ ते बैर राखेया ओर तिने मनो रे सोचेया, “मेरे बाओ रा आखरी बखत नेड़े ए, तेबे मां आपणा पाई याकूब काई देणा।”
42जेबे रिबका खे आपणे जेठे पाऊए रिया यो गल्ला बताईया तो तेबुई तेसे आपणे छोटे पाऊ याकूबो खे बुलाई की बोलेया, “सुण, तेरे पाईए एसावे ताखे काणे खे आपणे मनो रे सब्र राखी राखेया। 43इजी खे एबे, ओ मेरे पाऊ, मेरी सुण ओर हारान प्रदेशो खे मेरे पाई लाबानो गे नठी जा; 44ओर थोड़े दिना तक मतलब जदुओ तक तेरे पाईए रा रोष नि उतरो, तदुओ तक तेसगे ई रणा। 45फेर जेबे तेरे पाईए रा रोष तां पाँदा ते उतरी जाओगा ओर जो काम तैं तेस साथे करी राखेया, जेबे से तिजी खे पूली जाओगा, तेबे मां तूँ तेथा ते बुलाई देणा। एड़ा नि ओ कि माखे एक ई दिन तुसे दोनो खोणे पड़ो।”
46फेर रिबके इसहाको खे बोलेया, “हित्ती जातिया री बेटिया रिया बजअ ते आऊँ आपणे प्राणा ते नफरत करूँई, तेबे जे एड़िया हित्ती जातिया री बेटिया बीचा ते, जेड़ी एस प्रदेशो रिया बेटिया ए, याकूब बी एकी खे केथी ब्यायी लओ तो मेरी जिन्दगिया दे क्या फायदा ऊणा?”
Currently Selected:
उत्पत्ति 27: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
