निर्गमन 6
6
1तेबे यहोवे मूसे खे बोलेया, “एबे तां देखणा कि मां फिरौनो री तरफा खे आपणा सामर्थी आथ बढ़ाणा ओर तिजी सामर्थी आथो री बजअ ते से इस्राएलिया खे आपणे देशो ते निकाल़ने खे मजबूर ऊई जाणा।”
मूसे रा बुलाया जाणा
2परमेशरे मूसे खे बोलेया, “आऊँ यहोवा ए; 3आऊँ सर्वशक्तिमान परमेशरो रे नाओं ते तेरे पितर अब्राहम, इसहाक ओर याकूबो खे दर्शण देऊँ था पर यहोवे रे नाओं ते आऊँ तिना सामणे नि आया। 4ओर मैं तिना साथे एक वाचा पक्की कित्ती कि कनान देशो रे जेती सेयो परदेशी बणी की रओ थे, से तिना खे देई देऊँ। 5इतणा ई नि इस्राएली लोक जिना खे मिस्र देशो रे माणूं गुलामिया रे राखो थे, आँऊ तिना रे दु:खो रा कणना सुणी की आपणी वाचा रे मुताबिक तिना री मताद करूँआ। 6इजी री बजअ ते तूँ इस्राएलिया खे बोल कि आऊँ यहोवा ए ओर मां तुसे मिस्रिया रे बोजो निठा ते निकयाल़ने ओर मां आपणा आथ बढ़ाई की ओर तिना पाँदे सामर्था रे कामो रे जरीये सजा देई की तुसे तिना री गुलामिया ते छुड़ाणे#6:6 प्रेरित 13:17 7ओर मां तुसे आपणी प्रजा बनाणे खे अपनाई लणे ओर आऊँ तुसा रा परमेशर ठईरना ओर तुसा जाणी लणा कि आऊँ तुसा रा परमेशर यहोवा ए, जो तुसा खे मिस्रिया रे बोजो निठा ते निकयाल़ी की ली आयी रा। 8ओर जेते देशो खे देणे रा वादा मैं अब्राहम, इसहाक ओर याकूबो साथे कित्तेया था, मां तुसे तिदे ई पऊँचाई देणे ओर मां तुसे तेतेरे अक्कदार बणाई देणे। आऊँ तो यहोवा ए।”
9यो गल्ला मूसे इस्राएलिया खे बोलिया, पर तिने मनो री बेचैनी ओर गुलामिया री क्रूरता रिया बजअ ते तिना री नि सुणी। 10तेबे यहोवे मूसे खे बोलेया, 11“तूँ जाई की मिस्रो रे राजा फिरौनो खे बोल कि इस्राएलिया खे आपणे देशो ते निकल़ने दे।” 12ओर मूसे यहोवे खे बोलेया, “देख इस्राएलिए ई मेरी नि सुणी; तेबे फिरौनो मेरी किंयाँ सुणनी कऊँकि आऊँ बोलणे रे बी तोतल़ा ए।” 13तेबे यहोवे मूसा ओर हारूणो खे इस्राएलिया ओर मिस्रो रे राजा फिरौनो रिया तँईं आज्ञा इजी बजअ ते दित्ती कि सेयो इस्राएलिया खे मिस्र देशो ते निकयाल़ी की लई जाओ।
मूसा ओर हारूणो रा खानदान
14तिना रे पितरा रे कराने रे खास माणूं यो ए इस्राएलो रा जेठा रूबेनो रे पाऊ हनोक, पल्लू, हेस्रोन ओर कर्मी थे, इना ते रूबेनो रे कुल निकल़े। 15शिमोनो रे पाऊ यमूएल, यामीन, ओहद, याकीन ओर सोहर थे ओर एक कनानी जवाणसा रा पाऊ शाऊल बीए इना ते शिमोनो रा कुल निकल़ेया। 16लेविए रे पाऊ जिना ते तिना रा खानदान चली रा तिना रे नाओं यो ए मतलब गेर्शोन, कहात ओर मरारी, ओर लेवी 137 साला तक जिऊँदा रया। 17गेर्शोनो रे पाऊ जिना ते तिना रा कुल चली रा सेयो लिब्नी ओर शिमी थे। 18कहातो रे पाऊ अम्राम, यिसहार, हेब्रोन ओर उज्जीएल ए ओर कहातो री सारी उम्र 133 साला री ऊई। 19मरारी रे पाऊ महली ओर मूशी थे। येई लेविए रा कुल था जिना ते तेसरा खानदान चलेया। 20अम्रामे आपणी बुआ योकेबेदा#6:20 योकेबेदा एते नाओं रा मतलब ए यहोवे री महिमा साथे ब्या करी ता ओर तेसा ते हारूण ओर मूसा जम्मे ओर अम्राम एक सौ सैंती साला तक जिऊँदा रया। 21यिसहार रे पाऊ कोरह, नेपेग, जिक्री थे। 22उज्जीएलो रे पाऊ मीशाएल, एलसाफान ओर सित्री थे। 23हारूण अम्मीनादाबा री बेटी ओर नहशोनो री बईण एलीशेबा खे ब्यायी की ली आया ओर तेसा ते नादाब, अबीहू, एलीआजार ओर ईतामार जम्मे।
24कोरह रे पाऊ अस्सीर, एलकाना, अबीआसाफ ए ओर इना ते कोरहिया रे कुल निकल़े। 25हारूणो रे पाऊ एलीआजारे पूतीएलो री एकी बेट्टिया साथे ब्या करी ला ओर तेसा ते पीनहास जम्मेया। जिना ते तिना रा कुल चलेया। लेविया रे पितरो रे कराने रे खास माणूं यो ईए। 26हारूण ओर मूसा सेयो ईए जिना खे यहोवे ये आज्ञा दित्ती, “इस्राएलिया खे चूण्ड-चूण्ड करी की तिना रे जत्थेया रे मुताबिक मिस्र देशो ते निकयाल़ी की ली आओ।” 27ये सेयो ई मूसा ओर हारूण ए जिने मिस्रो रे राजा फिरौनो खे बोलेया कि आसा इस्राएली मिस्रो ते निकयाल़ी की लई जाणे।
हारूण ओर मूसे खे परमेशरो री आज्ञा
28जेबे यहोवे मिस्र देशो रे मूसे ते ये गल्ल बोली कि, 29“आऊँ तो यहोवा ए, इजी री खातर आऊँ तुसा खे जो कुछ बोलूँगा, से सब मिस्रो रे राजा फिरौनो खे बोलणा।”
30पर मूसे यहोवे खे जबाब दित्तेया, “आऊँ तो बोलणे रे बी तोतल़ा ए, फिरौनो मेरी बिल्कुल पनि सुणनी?”
Currently Selected:
निर्गमन 6: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
