निर्गमन 22
22
डांगरा रे हरजाने रे बारे दे नियम
1जे कोई माणूं बल़द, पेड या बाकरी चोरी की कायी देओ या बेची देओ, तो से बल़दो रे बदले पाँज बल़द ओर पेडा-बाकरिया रे बदले चार पेडा बाकरिया परी देओ। 2जे चोर राती रे बखते चोरी करदे ऊए पकड़ेया जाओ ओर तेस पाँदे एड़ी मार पड़ो कि से मरी जाओ, तो तेसरे खूनो रा दोष काणे वाल़े पाँदे नि लगणा। 3ओर जे सूरज निकल़ी चुको ओर से मारेया जाओ तो तेसरे खूनो रा दोष लगणा; पर जे से तेस बखते मारेया नि जाओ तो जरूरी ए कि से नुकशाणो खे परी देओ पर जे तेसगे चोरिया रा नुकशाण परने खे कुछ नि ओ, तो से चोरिया रिया बजअ ते बेचेया जाओ। 4जे चोरेया रा बल़द या गह्दा या पेड-बाकरी चोरो गे जिऊँदी मिलो, तो से तिजी रा दुगणा परी देओ।
फसल बचाणे रे नियम
5जे कोई आपणे डांगरो ते केसी रा डोरू या बगीचा चराओ, मतलब आपणे डांगरा खे एड़ा छाडी देओ कि से ओरी रे डोरूआ खे चरी देओ, तो से आपणे डोरूआ ते ओर आपणे अंगूरा रे बगीचे ते खरिया ते खरी फसला बीचा ते तेस नुकशाणो खे परी देओ।
6जे कोई आग बाल़ो ओर से कांडेया रे लगी जाओ ओर पूल़ेया रे टेर, नज्ज या खड़िया फसला रा डोरू फूकी जाओ, तो जिने आग बाल़ी राखी ओ, से तेस नुकशाणो खे जरूर परी देओ।
आपणी जायदाता रे नियम
7जे कोई आपणे पड़ोसिये गे पैसे या कोई ओर चीज सम्माल़ने खे छाडो पर से तेसरे कअरो ते चोरी ऊई जाओ ओर जे चोर पकड़ेया जाओ, तो दुगणा तेसखे ई परना पड़ना। 8ओर जे चोर नि पकड़ेया जाओ, तो कअरो रा मालक परमेशरो सामणे, न्याय करने वाल़ेया गे ल्याया जाओ ताकि निश्चा ऊई जाओ कि तिने आपणे पाई-बन्दुओ रे पैसे या चीज चोरी करी राखी कि नई।
9चाए बल़द, गह्दा, पेड, बाकरी, टाल्ले चाए कोई बी एड़ी राची री चीजा रे बारे दे दोष कऊँ नि लगाया जाओ, जेतेखे दो जणे आपणी-आपणी बोलोए, तो दुँईं रा मकद्दमा परमेशरो सामणे, न्याय करने वाल़ेया गे ल्याया जाओ ओर जेसखे न्यायी दोषी ठराओ, से दूजे खे दुगणा परी देओ।
10जे कोई आपणे पड़ोसिये गे आपणा गह्दा, पेड, बाकरी या कोई बल़द सम्माल़ने खे राखो ओर केसी रे बिना देखे से मरी जाओ या तेसरे बुड़ी जाओ या कोई तिजी खे लई जाओ कऊँकि तेती देखणे वाल़ा कोई नि था, 11तेबे से पड़ोसी जेसगे से जानवर समाल़ी राखे थे यहोवे रे नाओं री कसम खाओ कि मैं एसरी जायदात नि चोरी; तेबे जायदाता रा मालक इजी खे सच्च मानो ओर दूजे खे तेसखे कुछ पनि देणा पड़ना। 12पर जे से डांगर पड़ोसिये रे कअरो तेई चोरी राखेया ओ, तो से तेसरे मालको खे तिजी री कीमत परी देओ। 13ओर जे तेस डांगरो रे किने जंगल़ी जानवरे टुकड़े-टुकड़े करीते ओ, तो से माणूं फाड़े रे सबूतो खे ली आओ, तेबे तेसखे तिजी रा नुकशाण नि परना पड़ना।
14फेर जे कोई माणूं आपणे पड़ोसिये ते डांगर मांगी की ली आओ ओर तेसरा मालक साथे नि ओ ओर तेसरे बूड़ी जाओ या से मरी जाओ, तो से पक्का तेसरा नुकशाण परी देओ। 15पर जे तेस डांगरो रा मालक साथे ओ, तो दूजे माणूंए खे तेसरा नुकशाण नि परना पड़ना ओर जे से कराये पाँदे लई राखेया ओ तो तेसरा नुकशाण तेसरे कराये रे आईगा।
चाल-चलण ओर तर्मो रे नियम
16जे कोई मर्द केसी जवान बेटिया खे जेसा रे ब्याओ री गल्ल नि लगी री ओ बईकाई की तेसा साथे गल़त काम करो, तो से जरूर तेसा री कीमत देई की तेसा साथे ब्या करी लो ओर से तेसरी लाड़ी ऊणी। 17पर जे तेसा रा बाओ तेसा खे देणे खे बिल्कुल ना करी देओ, तो गल़त काम करने वाल़ा तेसा बेटिया री कीमता रे मुताबिक पैसे तोली की देई देओ।
18तैं डाग-डगुमा करने वाल़ी जवाणस जिऊँदी नि राखणी।
19जो कोई पशुआ साथे गल़त काम करो से पक्का काया जाओ।
20जो कोई यहोवे खे छाडी की केसी ओरी देवते खे बलि करो, तेसरा सत्यानाश कित्तेया जाओ।
21तुसे परदेशिया खे नि सताएयो ओर ना ई तेस पाँदे अन्देर करना, कऊँकि मिस्र देशो रे तुसे बी परदेशी थे।
22केसी बिदुआ या अनाथ बाल़को ते नाजाईज फाईदा नि लणा। 23जे तुसे एड़ेया ते नाजाईज फाईदा लओ ओर सेयो कोई बी मांगे पुकार करो, तो मां जरूर तिना री पुकार सुणनी; 24तेबे मेरा रोष पड़कणा ओर मां तुसे तलवारी साथे मरवाणे ओर तुसा री लाड़िया बिदुआ ओर तुसा रे बच्चे अनाथ ऊई जाणे।
25जे तूँ मेरी प्रजा बीचा ते केसी शरीफो खे जो तांगे रओआ पैसे रा त्वार दे, तो तेसते महाजनो जेड़ा ब्याज नि लणा ओर तेसरे त्वारो रा फाईदा लंदे ऊए तेसखे कर्जदार नि बणाओ।
26जे तूँ कदी आपणे पाई-बन्दुआ रे टाल्ले बन्दक बणाई की राखी बी लओ, तो सूरजो रे छिपणे ते पईले तेसखे वापस करी देया; 27कऊँकि से तेसगे एक ई टखणे खे ए, तेसरे शरीरो रा से एक ई टाल्ला ऊणा; तेबे से क्या टखी की सऊणा? ओर जेबे से मांगे पुकार करोगा, तेबे मां तेसरी पुकार सुणनी, कऊँकि आऊँ तो दया करने वाल़ा ए।
28परमेशरो रा बेज्जती नि करना ओर ना ई आपणे लोका रे परदानो खे स्राप देणा।
29आपणे डोरूआ री फसल ओर फल़ा रे रसो बीचा ते माखे देणे रे देरी नि करनी। आपणे माठेया बीचा ते जेठा बच्चा माखे देणा।
30तिंयाँ ई आपणी गायी ओर पेडा-बाकरिया रे जेठे बच्चे बी माखे देणे; सात दिन तक तो बच्चा आपणी माया गे रओ ओर आठुए दिने से माखे देई देणा।
31तुसे मेरिया तँईं पवित्र माणूं बणेयो, इजी बजअ ते जो डांगर मैदानो रे फाड़ेया रा मिलो तेसरा मास नि खाणा, से कुत्तेया सामणे सेटी देणा।
Currently Selected:
निर्गमन 22: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
