निर्गमन 21
21
इब्री गुलामा साथे ठीक टंगो रा बर्ताव करने रे नियम
1ओर जो बिधान तां इस्राएली लोका खे समजयाणे से यो ए। 2“जे तुसे कोई इब्रानी जातिया रा दास खरीदी राखेया ओ, तेबे से छे साला तक सेवा करदा रओ पर सातुए साले बिना कीमत चुकाए आजाद ऊई की चली जाओ। 3जे से आपणे मालको गे कल्ला आया ओ, तो कल्ला ई चली जाओ; पर जे लाड़िया साथे आया ओ, तो तेस साथे तेसरी लाड़ी बी चली जाओ। 4जे तेसरे मालके तेसखे लाड़ी देई राखी ओ ओर तेसा रे माठे-बेटिया जम्मी रे ओ तो तेसरी लाड़ी ओर बाल़क तेस मालको रे रओ ओर से कल्ला ई चली जाओ। 5पर जे से दास मजबूतिया साथे बोलो, ‘आऊँ आपणे मालक ओर आपणी लाड़ी ओर पाऊआ खे प्यार करूँआ इजी री खातर मां आजाद ऊई की नि जाणा;’ 6तो तेसरा मालक तेसखे परमेशरो रे सामणे लई चलो; तेबे तेसखे द्धारो रे फल़े या साखा गे लई जाई की तेसरे कानो रे सूए साथे छेद करो; तेबे से सदा तेसरी सेवा करदा रओ।”
7जे कोई आपणी बेटिया खे दासी ऊणे खे बेची देओ, तो से दासी, मर्द दासो जेड़ी आजाद ऊई की नि जाई सकदी। 8जे तेसा रा मालक तेसा खे आपणी लाड़ी बणाओ ओर तेबे तेसा ते खुश नि रओ, तो से तेसा रा मोल लई कि जाणे देओ ओर तेसा खे तिने तोखा दित्तेया; इजी खे तेसा खे परदेशी लोका रे आथो रे बेचणे रा अक्क तेसखे नि ऊणा। 9जे तिने से आपणे माठे खे ब्यायी ती ओ, तो तेसा साथे बेटिया जेड़ा बर्ताव करो। 10जे से दूजी लाड़ी करी लो, तेबे बी से तेसा री रोटी, टाल्ले ओर तेसा साथले सम्बन्द कम नि करो। 11ओर जे से इना तिंऊँ गल्ला दे कमी करो, तो से जवाणस बिना मोल दित्ते आजाद ऊई की चली जाओ।
खून-खराबे रिया तँईं नियम
12जे कोई केसी माणूंए खे एड़ा बाओ कि से मरी जाओ, तो से बी पक्का काई देणा चाईयो। 13जे तिने तेसखे मारने रिया तँईं योजना नि बणाई राखी ओ ओर मां परमेशरो रिया इच्छा ते या अणजाणे रे से तेसरे आथे की मरी जाओ तो एड़े काणे वाल़े खे नठणे रिया तँईं आऊँ एक जगा ठराऊँगा जेती से नठी जाओ। 14पर जे कोई जाणी बूजी की केसी खे छल करी की काओ तो से काणे वाल़ा माणूं एक बचणे वाल़ी जगा रे मेरी बेदिया ते बी कसिटी की मारने खे दूर लई जाणा।
15जे कोई आपणे माया बाओ खे कूटो से बी पक्का काई देणा चाईयो।
16जे कोई केसी माणूंए खे चोरो, चाए से तेसखे बेची देओ, चाए से तेसगे ई मिलो, तेबे से बी जरूर काई देणा चाईयो।
17जे कोई आपणे माया-बाओ खे स्राप देओ से बी जरूर काई देणा चाईयो।
18जे माणूं आपू बीचे लड़ो ओर एक दूजे खे पात्थर या मुक्के एड़े बाओ की से मरो नि पर काईल ऊई की बछौणे दे पड़ी जाओ, 19पर बादो ते जे से उठी की सोठिया रे साअरे ते बारे चलणे-फिरने लगो, तेबे से बाणे वाल़ा तेते दशा रे तेसरे पड़े रणे रे बखतो ते लई की ठीक ऊणे तक तेसरा नकसवाण परी देओ ओर तेसरा लाज बी कराओ तेबे से सजा ते आजाद ऊई सकोआ।
20जे कोई मालक आपणे दास-दासिया खे सोठे कि एड़ी बाओ की से मरी जाओ तेबे तेसखे जरूर सजा देणी। 21पर जे से दास या दासी एक या दो दिना रे ठीक ऊई जाओ तो तेसरे मालको खे सजा नि देणी कऊँकि से दास तेसरा तअन ए।
22जे माणूं आपू बीचे मार-पीट करी की केसी गर्भवती जवाणस खे बाई देओ ओर तेसा रे टाल़ चली जाओ ओर कोई नकसवाण नि ओ तो मारने वाल़े ते तिथणा ई मोल लओ जितणा तेसा रा लाड़ा पंचा रिया रजामंदिया ते ठराओ। 23पर जे से मार-पीट करदे बखते मरी जाओ तो प्राणो रे बदले प्राण लया जाओ,
24ओर आखी रे बदले आख ओर दाँदो रे बदले दाँद ओर आथो रे बदले आथ ओर पईरो रे बदला पईरो ते लया जाओ, 25ओर दागो रे बदले दाग ओर जख्मो रे बदले जख्म ओर कुटणे रे बदले कुटणे री सजा देणी।
26जेबे कोई मालक आपणे दास-दासिया री आखी खे एड़ी बाओ की से फूटी जाओ तो से मालक तेसा आखी रे बदले तिना खे आजाद ऊई की जाणे देओ।
27ओर जे मालक आपणे दास-दासिया खे बाई की तिना रा दाँद तोड़ी देओ तो से मालक तेस दाँदो रे बदले तिना खे आजाद ऊई की जाणे देओ।
डांगरा खे समाल़ी की राखणे री जिम्मेबारी
28जे बल़द केसी माणूंआ या जवाणसा खे एड़ा सींग बाओ की से मरी जाओ तो से बल़द पक्का ई पात्थर बाई की काई देणा ओर तेसरा मास नि खाणा पर बल़दो रा मालक तेस नुकशाणो रा जिम्मेबार ठईरो। 29पर जे तेस बल़दो खे पईले तेई सींग बाणे रा प्यास ओ ओर तेसरे मालको खे पता ऊँदे ऊए बी से बानी नि राखेया ओ ओर से केसी माणूं या जवाणसा खे काई देओ, तेबे तो तेस बल़दो पाँदे पात्थर बाए जाओ ओर तेसरा मालक बी काई देणा चाईयो। 30जे तेस मरे रे माणूंए रे बदले तेस बल़दो रे मालको पाँदे अरजाना ठराई राखेया ओ, तो प्राण छुड़ाणे खे जो कुछ तेसखे ठराया जाओ, तेसखे तिथणा ई देणा पड़ना। 31चाए बल़दे कोई माठा या बेटी कायी राखे ओ, तेबे बी एस नियमो रे मुताबिक तेस मालको साथे बर्ताव कित्तेया जाओ। 32जे बल़दे केसी दास या दासिया खे सींग बायी राखेया ओ, तो बल़दो रा मालक तेस दासो रे मालको खे तीई शेकेल चाँदी#21:32 तीई शेकेल चाँदी मतलब आदा किलो चाँदी देओ ओर तेस बल़दो खे पात्थर बाए जाओ।
33जे कोई माणूं गड्डा खणी की तिजी खे नि टखो ओर तिदे केसी रा बल़द या गह्दा रूड़ी जाओ, 34तो जेसरा से गड्डा ओ से तेस नुकशाणो खे परी देओ, से डांगरो रे मालको खे तेसरा पैसा देओ पर लोथ गड्डे वाल़े री ठईरो।
35जे केसी रा बल़द केसी ओरी रे बल़दो खे एड़ा काओ कि से मरी जाओ, तो सेयो दोनो माणूं जिऊँदे बल़दो खे बेची की तेसरा पैसा आपू बीचे आदी-आदी बांडी लओ ओर लोथ बी तेड़ी ई बांडी लो। 36जे ये पता सबी लोका खे ओ कि तेस बल़दो खे पईले तेई सींग बाणे री आदत थी, पर तेसरे मालके से बानी नि राखेया था, तो पक्का से बल़दो रे बदले बल़द परी देओ, पर लोथ तेसरी ई ठईरो।
Currently Selected:
निर्गमन 21: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
