निर्गमन 2
2
मूसे रा जन्म
1तिना दिना रे लेविए रे कराने रे एकी मर्दे एक लेवी वंशो री बेटिया साथे ब्या करी ला।
2कुछ बखतो ते बाद से जवाणस गर्भवती ऊई ओर तेसा रे एक पाऊ पैदा ऊआ ओर ये देखी की कि ये बाल़क बऊत सुन्दर ए, तीन मीन्ने तक लकोई की राखेया।#2:2 प्रेरित 7:20, इब्रानी 11:23 3जेबे से तेसखे ओर लकोई नि सकी, तेबे तेसखे नंगल़ो री एक टोकरी लई ली, तेते पाँदे चिकणी माट्टी ओर राल़ लगाई की, तिदे बाल़क राखी की नील नदिया रे कनारे पाँदे जाड़ो बीचे छाडीता। 4तेस बाल़को री बईण तेसते थोड़ी जी दूर खड़ी री रयी, ताकि देखूँ कि एसरा क्या आल ऊणा।
5तेबे फिरौनो री बेटी नाह्णे खे नदिया रे कनारे आयी, तेसा रिया दासिया नील नदिया रे कनारे कूमणे लगिया; तेबे तेसे जाड़ो बीचे टोकरी देखी की आपणी दासिया खे तिजी खे ल्याऊणे खे बोलेया।#2:5 प्रेरित 7:21 6तेबे तेसे तिजी खे खोली की देखेया कि एक रोंदा ऊआ बाल़क ए; तेसखे देखी की तेसा खे तरस आया ओर तेसे बोलेया, “ये तो केसी इब्रिया रा बाल़क ऊणा।”
7तेबे बाल़को री बईणे फिरौनो री बेटिया खे बोलेया, “क्या आऊँ जाई की इब्री जवाणसा बीचा ते केसी दूद पल्याणे वाल़िया खे तांगे बुलाई की ली आऊँ, जो तेरिया तँईं बाल़को खे दूद पल़्याया करो?”
8फिरौनो री बेटिये तेसा खे बोलेया, “जा।” तेबे बेटी जाई की बाल़को रिया माया खे बुलाई की ली आई। 9फिरौनो री बेटिये तेसा खे बोलेया, “तूँ एस बाल़को खे लई जाई की मेरिया तँईं दूद पल्याया कर ओर मां ताखे त्याड़ी देणी।”
तेबे से जवाणस बाल़को खे लई जायी की दूद पल्याणे लगी। 10जेबे बाल़क थोड़ा बड़ा ऊईगा, तेबे से तेसखे फिरौनो री बेटिया गे लईगी ओर से तेसा रा पाऊ ठईरेया ओर तेसे ये बोली की तेसरा नाओं मूसा राखेया कि मैं ये पाणिए ते निकयाल़ेया था।
मूसे रा मिस्र देशो ते मिद्यान देशो खे नठणा
11तिना दिना रे एड़ा ऊआ कि जेबे मूसा जवान ऊआ ओर बारे जाई की आपणे पाई बंदुआ गे जाई की तिना रे दु:खो पाँदे त्यान करने लगेया; तेबे तिने देखेया कि कोई मिस्री माणूं मेरे एक इब्री पाईए खे कुटणे लगी रा। 12जेबे तिने चऊँ कनारे देखेया की कोई निए, तेबे तिने से मिस्री कायी ता ओर से बालूए रे लकोईता।
13फेर मूसे दूजे दिने बारे जाई की देखेया कि दो इब्री मर्द आपू बीचे कुठणे लगी रे थे; तिने पापिए खे बोलेया, “आपणे पाईए खे कऊँ लगी रा कुटणे?” 14तिने बोलेया, “तूँ किने आसा पाँदे हाकिम ओर न्यायी ठराई राखेया? जिंयाँ तैं मिस्री माणूं काया क्या माखे बी तिंयाँ ई काणा चाएया?” मूसा ये सुणी की डरीगा ओर तिने ये सोचेया कि पक्का एसा गल्ला रा सबी खे पता लगी गा रा। 15जेबे फिरौने ये गल्ल सुणी तेबे से मूसे खे काणे री साजिश करने लगेया। तेबे मूसा तेथा ते नठी की मिद्यान देशो रे जाई की रणे लगेया ओर जेबे से मिद्यान देशो रे पऊँचणे ते बाद तेती एकी कुएँ गे बैठी रा था। 16तेस बखते मिद्यानो रे एकी पुरोईतो रिया सात बेटिया तेती आयी की खुरलिया रे पाणी परने लगिया कि आपणे बाओ रिया पेड़ा-बाकरिया खे पल़याओ। 17तेबे गवाल़े आयी की तिना खे टाणे लगे, ये देखी की मूसे खड़े ऊई की तिना री मताद कित्ती ओर पेडा-बाकरिया खे पाणी पल़्याया। 18जेबे सेयो आपणे बाओ रूएलो#2:18 रूएलएते नाओं रा मतलब ए परमेशरो रा दोस्त गे फेर आईया, तेबे तिने तिना ते पूछेया, क्या बजअ ए जो तुसे आज इतणी चट आई गिया?
19तिने बोलेया, “एक मिस्री माणूंए आसे गवाल़े रे आथो ते छुड़ाईया ओर आसा रिया तँईं बऊत पाणी परी की पेडा-बाकरिया खे पल़्याया।”
20तेबे तिने आपणी बेटिया खे बोलेया, “केयी आ से माणूं? तुसे तेसखे कऊँ छाडी आईया? तेसखे बुलाई की ली आओ, ताकि से रोटी खाई लओ।”
21तेबे मूसा तेस माणूंए रे कअरे आया ओर तिना साथे रणे खे खुश ऊईगा, रूएले मूसे साथे आपणी बेटी सिप्पोरा रा ब्या करी ता। 22तेबे तिना रे एक पाऊ जम्मेया, मूसे ये बोली की कि आऊँ दूजे देशो रे अणजाण ए, तेसरा नाओं गेर्शोम#2:22 गेर्शोम एते रा मतलब ए आँऊ एती परदेशी ए राखेया।#2:22 प्रेरित 7:29, प्रेरित 7:6
23बऊत साला ते बाद मिस्रो रा राजा मरीगा ओर इस्राएली कठण सेवा रिया बजअ ते लाम्बा-लाम्बा साआ लई की आखी परने लगे ओर आका पाणे लगे; तिना री दुहाई जो कठण सेवा रिया बजअ ते ऊई, परमेशरो तक पऊँची। 24परमेशरे तिना रा जोरो रा रोणा सुणी की आपणी वाचा, जो तिने अब्राहम, इसहाक ओर याकूबो साथे बानी थी, याद कित्ती।#2:24 प्रेरित 7:34 25ओर परमेशरे इस्राएलिया खे देखी की तिना री सम्माल़ लई।
Currently Selected:
निर्गमन 2: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
