निर्गमन 16
16
मन्ना ओर तित्तर
1फेर इस्राएलिया री सारी मण्डल़ी एलीम देशो ते आपणा डेरा चकी की सीन नाओं री सुनसाण जगा रे पऊँचे जो एलीम नाओं री जगा ओर सीनै पाह्ड़ो रे बीचे ए। सेयो तेती मिस्र देशो ते निकल़ने ते बाद, दूजे मीन्ने रे पंद्रुए दिने पऊँचे। 2सुनसाण जगा रे इस्राएलिया री सारी मण्डल़ी मूसा ओर हारूणो रे खलाफ बकबक करने लगी। 3ओर इस्राएली तिना खे बोलणे लगे, “जेबे आसे मिस्र देशो रे मासो री आँडिया गे बैठी की मनमाना खाणा खाऊँ थे, तेबे जे आसे यहोवे रे आथो ते मारे बी जांदे, तो खरा सेई था, पर तुसे आसे एती सुनसाण जगा रे पूखा मारने खे ल्याई राखे।”
4तेबे यहोवे मूसे खे बोलेया, “देखो, मां सर्गो ते तुसा खे खाणे री चीज बरसाणी ओर इना लोका हर रोज बारे जाई की हर एक दिनो खे जरूरता रे मुताबिक खाणे खे कट्ठा करना, ईंयाँ मां तिना री परीक्षा करनी कि यो मेरे बिदिया पाँदे चलणे कि नई। 5ओर एड़ा ऊणा चाईयो कि छठे दिने से आपणी खाणे री चीज ओरी दिना ते दुगणी कट्ठी करो ओर से तिजी खे त्यार करी की बी राखो।”
6तेबे मूसे ओर हारूणे सारे इस्राएलिया खे बोलेया, “आज साँजा तक तुसा जाणी लणा कि जो तुसा खे मिस्र देशो ते निकयाल़ी की ल्याई राखेया, से यहोवा ए। 7ओर प्यागा तुसा खे यहोवे रा तेज दिशणा, कऊँकि यहोवे आपणे खलाफ तुसा रा बड़बड़ाणा सुणी ला रा। आसे क्या ए जो तुसे आसा रे खलाफ बड़बड़ाओए?” 8फेर मूसे बोलेया, “ये तेबे ऊणा जेबे साँजा यहोवे तुसा खे खाणे खे मास ओर प्यागा मनमानी रोटी देणी; कऊँकि तुसे जो तेसरे खलाफ बड़बड़ाओए, से तिने सुणी ला रा ओर आसे कुण ए? तुसा रा बड़बड़ाणा आसा रे खलाफ नि पर यहोवे रेई खलाफ ए।” 9तेबे मूसे हारूणो खे बोलेया, “इस्राएलिया री सारी मण्डल़िया खे आज्ञा दे कि यहोवे सामणे बल्कि तेसरे नेड़े आओ, कऊँकि तिने तिना रा बड़बड़ाणा सुणी राखेया।” 10ओर एड़ा ऊआ कि जेबे हारूण इस्राएलिया री सारी मण्डल़िया साथे एड़िया गल्ला करने ई लगी रा था, तेबे तिने सुनसाण जगा री तरफा खे नजर करी की देखेया ओर तिना खे यहोवे रा तेज बादल़ो पाँदे दिशेया।
11तेबे यहोवे मूसे खे बोलेया, 12“इस्राएली लोका रा बड़बड़ाणा मैं सुणी राखेया; इजी खे तूँ तिना खे बोली दे कि सूरज डूबणे रे बखते तुसा मास खाणा ओर प्यागा खे तुसे रोटिया साथे रज्जाए जाणे ओर तुसा खे पता लगी जाणा कि आऊँ तुसा रा परमेशर यहोवा ए।” 13तेबे एड़ा ऊआ कि साँजा खे तितर आईकि सारे डेरेया पाँदे बैठीगे ओर प्यागा डेरे रे चऊँ कनारे पाल़ा पड़ीगा। 14जेबे पाल़ा सूकीगा तेबे तिने देखेया कि सुनसाण जगा री जमीना पाँदे छोटे-छोटे छिलके पाल़े रे टिप्पेया जेड़े पड़ी रे। 15जेबे इस्राएली लोके ये देखेया तो सेयो आपू बीचे एकी दूजे ते बोलणे लगे कि ये क्या चीज ए? कऊँकि सेयो नि जाणो थे कि ये क्या ए? तेबे मूसे तिना खे बोलेया, “ये तो सेई खाणे री चीज ए जो यहोवे तुसा खे खाणे खे देई राखी। 16यहोवे जो आज्ञा देई राखी से ए कि तुसे आपणी जरूरती रे मुताबिक खाणे जोगी कट्ठी करेया करो। आपणे डेरे रे जितणे माणूं ए तिना सबी खे हर माणूंए रे पीछे दो किलो कट्ठा करेया करना।” 17ओर इस्राएलिये तेड़ा ई कित्तेया ओर किने जादा ओर किने कम कट्ठा कित्तेया। 18जेबे तिने नापणे रे पांडे ते नापेया, तेबे जिने बऊत कट्ठा कित्तेया तेसगे कुछ जादा नि निकल़ेया ओर जिने थोड़ा कट्ठा कित्तेया था तिना गे जरूरती ते कम नि निकल़ेया कऊँकि एकी-एकी माणूंए आपणे खाणे जोगा कट्ठा करी राखेया था।
19तेबे मूसे तिना खे बोलेया, “कोई बी इजी बीचा ते प्यागा खे नि राखो।”
20तेबे बी तिना बीचा ते कुछ माणूंए मूसे री गल्ल नि मानी; जेबे कुछ माणूंए तेते बीचा ते प्यागा खे राखेया तो तिदे कीड़े पड़ी गे ओर बास आऊणे लगी; तेबे मूसा तिना पाँदे रोषे ऊईगा। 21सेयो प्यागा-प्यागा हर रोज आपणे-आपणे खाणे जोगा कट्ठा करी लओ थे ओर जेबे तूप तेज ओ थी तेबे से गल़ी जाओ था 22तेबे एड़ा ऊआ की छठे दिने तिने दुगणा मतलब हर एक माणूंआ रे पीछे चार किलो कट्ठा कित्तेया ओर इस्राएली मण्डल़िया रे सबी परदाने आई की मूसे खे बताईता
23तेबे मूसे तिना खे बोलेया, “ये तो सेई गल्ल ए जो यहोवे बोली थी कऊँकि काल पवित्र रामो रा दिन मतलब यहोवे खे पवित्र रामो रा दिन ऊणा; इजी री खातर तुसा खे जो तन्दूरो रे पकाणा ओ से पकाओ, जो ऊबाल़ना ओ से उबाल़ो ओर इजी बीचा ते जितणा बचो से प्यागा खे राखी देओ।”
24जेबे तिने तिजी खे मूसे री आज्ञा रे मुताबिक प्यागा तक राखी ता तेबे ना तिदे बास आई ओर ना तिदे कीड़े पडे़। 25रामो रे दिने मूसे बोलेया, “काल जो तुसे बचाई की राखी राखेया था आज सेई खाओ, कऊँकि आज यहोवे रा रामो रा दिन ए; इजी खे आज तुसा खे मैदानो रे कुछ नि मिलणा। 26छे दिना तक तो तुसे तिजी खे कट्ठा करी सकोए; पर सातुआ दिन तो रामो रा दिन ए; तेस दिने तुसा खे कुछ नि मिलणा।”
27तेबे बी माणूंआ बीचा ते कोई-कोई माणूं सातुए दिने बी कट्ठा करने खे बारे गये पर तिना खे कुछ नि मिलेया।
28तेबे यहोवे मूसे खे बोलेया, “तुसे लोक मेरी आज्ञा ओर व्यवस्था खे कदुओ तक नि मानोगे? 29देखो, यहोवे जो तुसा खे रामो रा दिन देई राखेया इजी री बजअ ते से तुसा खे छठे दिनो खे दो दिना रा खाणा देणे लगी रा; इजी री खातर तुसे आपणे-आपणे एती बैठे रे रणा ओर सातुए दिने केसी बी आपणी जगा खे छाडी की बारे नि जाणा।”
30इजी खे माणूंए सातुए दिने राम कित्तेया।
31इस्राएली लोके तेते खाणे री चीजा रा नाओं मन्ना राखेया ओर से बेणो जेड़ा छोटा ओर सफेद था, ओर तिजी रा स्वाद सईतो रे बणे रे मालपुड़ेया जेड़ा था।
32तेबे मूसे बोलेया, “यहोवे येई आज्ञा देई राखी कि इजी बीचा ते दो किलो परी की आपणे कुलो रिया पीढ़िया-पीढ़िया खे देखणे खे राखी देओ, ताकि तिना खे पता लगी जाओ कि यहोवा आसा खे मिस्र देशो ते निकयाल़ी की सुनसाण जगा रे केड़ी रोटी खुल़ाओ था।” 33तेबे मूसे हारूणो खे बोलेया, “एक पांडा लई की तिदे दो किलो मन्ना परी की से यहोवे रे आगे राखी दे, ताकि से तुसा आऊणे वाल़ी पीढ़िया खे राखेया रा रओ।”
34जेड़ी आज्ञा यहोवे मूसे खे दित्ती थी, तिजी रे मुताबिक हारूणे से गवाईया रे सन्दूको रे आगे राखी ता ताकि से तेती सई सलामत रओ।
35इस्राएली लोक जदुए तक बसे रे देशो रे नि पऊँचे तदुए तक मतलब चाल़िया साला तक मन्ने खे खांदे रए; सेयो जदुए तक कनान देशो री सीमा तक नि पऊँचे तदुए तक मन्ना खांदे रए।
36एक ओमेरो#16:36 एक ओमेर मतलब दो किलो रा नाप तो एपा#16:36 एपा मतलब बीई किलो रा दसुआ पाअग ओआ
Currently Selected:
निर्गमन 16: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
