स्याणेया रा ज्ञान 5

परमेशरो रा डर मानणा ओर वादा पूरा करना

1जेबे तूँ परमेशरो रे पवित्र मईलो दे जाए तो नम्र ओर सम्बल़ी की जाणा। तूँ तेती परमेशरो रा वचन सुणने खे जाया, मूर्खो जेड़ा बलिदान नि चढ़ाणा जेसखे पता ई नि ऊँदा कि क्या खरा क्या बुरा ए! 2गल्ला करने रे जल्दबाजी नि करना ओर ना कोई आपणे मनो री गल्ल परमेशरो सामणे जल्दबाजिया दे बोलणी, कऊँकि परमेशर स्वर्गो रे ए ओर तूँ तरतिया पाँदे। इजी री खातर बोलणे ते पईले ठीक-टंगो रे सोचणा। 3जे तुसे आपणियां परेशानिया रे बारे दे बऊत जादा सोचोगे तो तुसा बुरिया चीजा रे सुफने देखणे लगणे। जे तुसे बऊत जादा गल्ला करोगे तो तुसा मूर्खा जेड़िया गल्ला करनिया। 4जेबे तूँ परमेशरो रे सामणे जाईकी मान्नत मांगे, तेबे तिजी खे पूरी करने रे देरी नि करनी, कऊँकि से मूर्खो ते खुश नि ऊँदा, इजी री खातर जो मान्नत तैं मानी राखी से तैं पक्का पूरी करनी। 5मान्नत मानी की पूरी ना करने ते अच्छा ए कि तू कोई मान्नत ई ना माने। 6सिर्फ एड़िया ई गल्ला बोलणिया जो सच्च ए। तुसे परमेशरो रे दूतो खे ये नि बोलणा चाईयो, “मैं जो वादा कित्तेया था, से गल़ती थी, जेते कि परमेशर नराज ऊई जाओए। परमेशर तिना सबी चीजा खे नाश करी सकोआ जिना रिया तँईं तुसे मईणत करी राखी ए, 7केसी कामो खे करने रा वादा करना ओर फेर तेड़ा ई नि करना एक सुफने जेड़ा ए जेतेरी कोई कीमत नि ए। एतेरे बजाये, परमेशरो रा आदर करो।”

जिन्दगी बेकार ए

8जे तूँ केसी गरीबो रे अक्को खे सरकारा रे जरिये न्याय बिगाड़ी दे ओर तिना पाँदे अन्देर ऊँदा ऊआ देखे, तो इजी ते हैरान नि ऊणा, कऊँकि एकी अधिकारिए ते बड़ा दूजा ओआ, जेसखे इना सबी गल्ला रे बारे दे पता ओआ ओर तिना ते बी बड़ा एक ओर अधिकारी ओआ।

9जमीना री उपज तो सबी खे ओई बल्कि राजे खे बी तिजी ते फाईदा ओआ,

10जो पैसेया साथे प्यार करोआ, तेसखे पैसेया साथे तसल्ली नि ऊणी ओर ना तेसखे जो जादा तअन-दौलता ते प्यार राखोआ तेतेरे फायदे ते। ये बी बेकार ए। 11जेबे तअन-दौलत बढ़ोई, तो तेबे तिजी खे खाणे वाल़े बी बढ़ोए, तेबे तेसरे मालको खे तिजी खे छाडी की ओर क्या फायदा ओआ कि तेसा तअन-दौलता खे आपणियां आखी साथे देखो? 12मईणत करने वाल़ा माणूं चाए थोड़ा खाओ या बऊत, तेबे बी तेसखे सुखो साथे नींज आओई। पर अमीर माणूंए रे तअन बढ़ने ते तेसखे नींज नि आऊँदी।

13मैं एते तरतिया पाँदे एक बड़ी बुरी गल्ल देखी राखी, लोक पैसेया रे मालक तो ऊईगे पर तिजी ते तिना खे कोई बी फाईदा नि ऊँदा, 14सेयो अचाणक आपणा सब कुछ बपारो रे एकी गल़त फैंसले रिया बजा ते खोई देओए, फेर मरने ते बाद आपणे बच्चेया खे कुछ पनि छाडी जांदे। 15जिंयाँ से माया रे पेटो ते नांगा ई निकल़ेया, तिंयाँ ई से मरी बी जाणा; जेड़ा आया था ओर तेसखे आपणी मईणता रे बदले कुछ नि मिलणा, जेतेखे से आपणे आथो रे लई जाई सको।#5:15 1 तीमुथि 6:7 16ये बी एक बड़ी बला ए कि जेड़ा से आया, ठीक तेड़ा ई से जाणा, तेसखे तेते मईणता ते कोई बी फाईदा नि ऊँदा। 17आसा खे न्हेरा ओर दु:ख, चिन्ता, गुस्सा ओर बमारिया देई पूरा जीवन जिऊँणे खे मिलोआ।

18सुण, जो खरी गल्ल मैं परखी की देखी जो ठीक बी ए, से ये कि माणूं खाओ-पियो ओर आपणी मईणता साथे जो से तरतिया पाँदे करदा रओआ, आपणी पूरी जिन्दगी, जो परमेशरे तेसखे देई राखी, सुखी रओ, कऊँकि तेसरा इस्सा ये ईए। 19इजी रा मतलब ए कि हर एक माणूं जेसखे परमेशरे तअन-सम्पत्ति देई राखी ओ ओर तेसखे मजे लणे ओर तिजी बीचा ते आपणा इस्सा लणे ओर काम करदे ऊए मजे करने खे शक्ति बी देई राखी ओ, तो इजी खे आपणा इसा मानी कि ए समजी लओ कि ये परमेशरो रिया तरफा ते आशीष ए। 20एड़े लोक आपणे जीवनो दे हर गल्ला रे बारे दे चिन्ता नि करदे, कऊँकि परमेशर तिना खे सब कुछ करदे बखते खुश रणे दे सक्षम बणाओआ।

Currently Selected:

स्याणेया रा ज्ञान 5: BGH

Highlight

Copy

Compare